“ലാപ്‌ടോപ്പും ഡയറിയും കാണാനില്ല, മരണത്തിൽ ദുരൂഹത”; മൊഴിയെടുക്കാൻ വൈകിയതിൽ പോലീസിനെതിരെ ആരോപണവുമായി സായയുടെ കുടുംബം | Kollam woman death

കൊല്ലം: ഇരവിപുരത്ത് ഭർതൃവീട്ടിൽ മരിച്ചനിലയിൽ കണ്ടെത്തിയ സായ (26)യുടെ സുഹൃത്തുമായുള്ള വാട്സ്ആപ്പ് ചാറ്റ് പുറത്തുവന്നു (Kollam woman death). ഭർതൃവീട്ടിൽ പ്രശ്നങ്ങളുണ്ടായിരുന്നുവെന്ന സൂചന നൽകുന്ന സെപ്റ്റംബർ 24-ലെ സംഭാഷണമാണ് പുറത്തുവന്നത്.

‘എന്താ പറ്റിയത് നിനക്ക്’ എന്ന സുഹൃത്തിന്റെ ചോദ്യത്തിന് ‘വീട്ടിൽ സീൻ, വിളിക്കാം’ എന്നായിരുന്നു സായയുടെ മറുപടി. ‘ആരുമായിട്ടാണ് പ്രശ്നം, അഫ്സലാണോ’ എന്ന ചോദ്യത്തിന് ‘എല്ലാവരും’ എന്നും മറുപടി നൽകി. പിന്നീട് സുഹൃത്ത് വീഡിയോ കോളിൽ ബന്ധപ്പെട്ടെങ്കിലും സായ ഫോൺ എടുത്തില്ല. തുടർന്ന് ഒരുതവണ മാത്രം കാണാൻ കഴിയുന്ന തരത്തിലുള്ള സന്ദേശവും അയച്ചതായി ചാറ്റിൽ വ്യക്തമാകുന്നു.

മരണത്തിൽ ദുരൂഹതയെന്ന് കുടുംബം
സായയുടെ മരണത്തിൽ ദുരൂഹതയുണ്ടെന്നും മകൾ ആത്മഹത്യ ചെയ്യില്ലെന്നും മാതാവ് റിഹാനി ഷാജി ആരോപിച്ചു. മരണം നടന്ന് നാലു മണിക്കൂറിന് ശേഷമാണ് വിവരം അറിയിച്ചതെന്നാണ് കുടുംബത്തിന്റെ പരാതി. സായയുടെ ലാപ്ടോപ്പും ഡയറിയും കാണാനില്ലെന്നും അവയിൽ നിർണായക വിവരങ്ങളുണ്ടായിരുന്നുവെന്നും കുടുംബം പറയുന്നു. ഇവ ഭർതൃവീട്ടുകാർ നശിപ്പിച്ചിട്ടുണ്ടാകാമെന്നും കുടുംബം സംശയിക്കുന്നു.

സ്വന്തം വീട്ടിലേക്ക് ഫോണിൽ ബന്ധപ്പെടുന്നതുപോലും ഭർത്താവ് അഫ്സൽ വിലക്കിയിരുന്നുവെന്നും കുടുംബം ആരോപിച്ചു. സായയുടെ മരണം നടന്ന് 11 ദിവസത്തിനുശേഷമാണ് പൊലീസ് മൊഴിയെടുത്തതെന്നും ഇതിനിടയിൽ തെളിവുകൾ നശിപ്പിക്കപ്പെട്ടിട്ടുണ്ടാകാമെന്നും കുടുംബം പറയുന്നു. മൊഴിയെടുക്കുന്നതിലെ കാലതാമസത്തിനു പിന്നിൽ രാഷ്ട്രീയമോ സാമ്പത്തികമോ ആയ സ്വാധീനമുണ്ടായിരുന്നോയെന്നും കുടുംബം സംശയം പ്രകടിപ്പിച്ചു.

സംഭവത്തിൽ സമഗ്രമായ അന്വേഷണം നടത്തി മകൾക്ക് നീതി ലഭ്യമാക്കണമെന്നാണ് കുടുംബത്തിന്റെ ആവശ്യം.

ആശുപത്രിയിൽ എത്തിച്ചപ്പോഴേക്കും മരണം
ഹൃദയസംബന്ധമായ അസുഖത്തെ തുടർന്ന് ആശുപത്രിയിൽ പ്രവേശിപ്പിച്ചിരിക്കുകയാണെന്നും ഉടൻ എത്തണമെന്നും അറിയിച്ചാണ് കുടുംബത്തെ വിളിച്ചതെന്ന് ബന്ധുക്കൾ പറഞ്ഞു. വിവരമറിഞ്ഞ് കൊല്ലത്തെത്തിയപ്പോൾ ഭർത്താവ് അഫ്സലും പിതാവും രണ്ട് പൊലീസുകാരും അവിടെയുണ്ടായിരുന്നുവെന്നും കുടുംബം വ്യക്തമാക്കി.

ആംബുലൻസിൽ സായയുടെ മൃതദേഹം കണ്ടപ്പോൾ തന്നെ എന്തോ സംഭവിച്ചിട്ടുണ്ടെന്ന് മനസ്സിലായെന്നും പിന്നീട് മൃതദേഹം മോർച്ചറിയിലേക്ക് മാറ്റിയെന്നും കുടുംബം പറഞ്ഞു. സംഭവസമയത്തെയും ആശുപത്രിയിലെത്തിച്ച സാഹചര്യങ്ങളെയും കുറിച്ച് കുടുംബം ഉന്നയിച്ച സംശയങ്ങളും പരാതികളും അന്വേഷണത്തിന്റെ ഭാഗമായി പരിശോധിക്കേണ്ടതുണ്ട്.

സെപ്റ്റംബർ 31ന് കിടപ്പുമുറിയിൽ മരിച്ചനിലയിൽ
മാടൻനട സ്വദേശി അഫ്സലിന്റെ ഭാര്യ സായയെ കഴിഞ്ഞ മാസം 31ന് രാത്രി 8.30ഓടെയാണ് ഭർതൃവീട്ടിലെ കിടപ്പുമുറിയിൽ മരിച്ചനിലയിൽ കണ്ടെത്തിയത്. ജനലിൽ തൂങ്ങിയനിലയിൽ കണ്ടെത്തിയ സായയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മുറിയിൽനിന്ന് ആത്മഹത്യാക്കുറിപ്പ് പൊലീസ് കണ്ടെത്തിയിരുന്നു. എന്നാൽ മരണകാരണം കുറിപ്പിൽ പരാമർശിച്ചിരുന്നില്ലെന്നാണ് പൊലീസ് അറിയിച്ചത്.

പത്തനാപുരം സ്വദേശിയായ സായയുടെ കുടുംബം എറണാകുളത്താണ് താമസം. വിവാഹം കഴിഞ്ഞിട്ട് നാലു വർഷമായിരുന്നു. സംഭവത്തിൽ ഇരവിപുരം പൊലീസ് അസ്വാഭാവിക മരണത്തിന് കേസെടുത്ത് അന്വേഷണം നടത്തിവരികയാണ്.

Story Summary:
A WhatsApp conversation between 26-year-old Saya, who was found dead at her husband’s home in Kollam, and a friend has surfaced, indicating possible problems at her marital home. Her family has raised suspicions about the circumstances of her death and alleged delays in police questioning and the disappearance of her laptop and diary. Iravipuram police have registered a case of unnatural death and are investigating.