പത്തനംതിട്ട: രാഹുൽ മാങ്കൂട്ടത്തിൽ എംഎൽഎയ്ക്കെതിരെ പരാതി നൽകിയ യുവതിയുടെ പേരോ മറ്റ് വിവരങ്ങളോ താൻ വെളിപ്പെടുത്തിയിട്ടില്ലെന്ന് ഫെന്നി നൈനാൻ. തനിക്കെതിരെ പത്തനംതിട്ട സൈബർ പോലീസ് രജിസ്റ്റർ ചെയ്ത കേസ് രാഷ്ട്രീയ പ്രേരിതമാണെന്നും ഇതിനെ നിയമപരമായി നേരിടുമെന്നും അദ്ദേഹം ഫേസ്ബുക്കിലൂടെ വ്യക്തമാക്കി. പരാതിക്കാരിയുടെ ഐഡന്റിറ്റി വെളിപ്പെടുത്തിയെന്നും അശ്ലീല ചുവയുള്ള സന്ദേശങ്ങൾ പ്രചരിപ്പിച്ചെന്നുമാരോപിച്ചാണ് ഫെനിക്കെതിരെ ജാമ്യമില്ലാ വകുപ്പുകൾ പ്രകാരം കേസെടുത്തിരിക്കുന്നത്.
എന്നാൽ തന്റെ സോഷ്യൽ മീഡിയ പോസ്റ്റുകൾ പരിശോധിക്കുന്ന ആർക്കും താൻ പരാതിക്കാരിയെ വ്യക്തിഹത്യ ചെയ്തിട്ടില്ലെന്ന് ബോധ്യപ്പെടുമെന്ന് ഫെന്നി നൈനാൻ പറഞ്ഞു. രാഷ്ട്രീയമായി വേട്ടയാടാൻ ലക്ഷ്യമിട്ടാണ് ഇത്തരം നീക്കങ്ങൾ നടക്കുന്നത്. പോലീസ് നടപടിയിൽ ഭയപ്പെട്ട് പിന്നോട്ടില്ലെന്നും എഫ്ഐആറിന്റെ നിയമസാധുത ചോദ്യം ചെയ്ത് ഹൈക്കോടതിയെ സമീപിക്കുമെന്നും അദ്ദേഹം കൂട്ടിച്ചേർത്തു. ജാമ്യത്തിനായി കോടതിയെ സമീപിക്കാനുള്ള ഒരുക്കത്തിലാണ് ഫെന്നി ഇപ്പോൾ.
The post അശ്ലീലം പറഞ്ഞിട്ടില്ല, പേര് വെളിപ്പെടുത്തിയിട്ടില്ല! പൊലീസിന് മറുപടിയുമായി ഫെന്നി നൈനാൻ appeared first on Express Kerala.
