ടി20 ക്രിക്കറ്റിൽ പത്താം സെഞ്ച്വറി തികച്ച് ഓസ്ട്രേലിയൻ ബാറ്റര് ഡേവിഡ് വാർണർ പുതിയ റെക്കോർഡ് കുറിച്ചു. ബിഗ് ബാഷ് ലീഗിൽ സിഡ്നി തണ്ടറിനായി കളത്തിലിറങ്ങിയ വാർണർ, സിഡ്നി സിക്സേഴ്സിനെതിരെ 65 പന്തിൽ പുറത്താകാതെ 110 റൺസാണ് നേടിയത്. ഈ പ്രകടനത്തോടെ ഒൻപത് സെഞ്ച്വറികൾ നേടിയ വിരാട് കോഹ്ലിയെയും റെയ്ലി റൂസോയെയും പിന്തള്ളി ഏറ്റവും കൂടുതൽ ടി20 സെഞ്ച്വറികൾ നേടിയ താരങ്ങളുടെ പട്ടികയിൽ വാർണർ മൂന്നാം സ്ഥാനത്തെത്തി. 11 ഫോറും 4 സിക്സും അടങ്ങുന്നതായിരുന്നു വാർണറുടെ ഉജ്ജ്വല ഇന്നിംഗ്സ്.
ടി20 ഫോർമാറ്റിൽ ഏറ്റവും കൂടുതൽ സെഞ്ച്വറികൾ നേടിയ താരങ്ങളിൽ 22 സെഞ്ച്വറികളുമായി വെസ്റ്റ് ഇൻഡീസ് ഇതിഹാസം ക്രിസ് ഗെയ്ലാണ് ഒന്നാമത്. 11 സെഞ്ച്വറികളുമായി പാകിസ്ഥാൻ താരം ബാബർ അസം രണ്ടാം സ്ഥാനത്ത് നിൽക്കുന്നു. ബിഗ് ബാഷ് ലീഗിലെ മിന്നും പ്രകടനത്തോടെ ഈ എലീറ്റ് പട്ടികയിൽ തന്റെ സ്ഥാനം മെച്ചപ്പെടുത്തിയ വാർണർ, സിഡ്നി തണ്ടറിനെ ആറ് വിക്കറ്റ് നഷ്ടത്തിൽ 189 റൺസ് എന്ന മികച്ച സ്കോറിലെത്തിക്കാനും സഹായിച്ചു.
The post കോഹ്ലിയെ മറികടന്ന് വാർണർ; ടി20 സെഞ്ച്വറികളിൽ മൂന്നാം സ്ഥാനം appeared first on Express Kerala.
