നാസയുടെ ചരിത്രപ്രധാനമായ ആർട്ടെമിസ്-2 ചന്ദ്രദൗത്യത്തിനായുള്ള ഒരുക്കങ്ങൾ അവസാനഘട്ടത്തിലേക്ക് കടക്കുന്നു. ദൗത്യത്തിന്റെ ഭാഗമായ കരുത്തുറ്റ എസ്.എൽ.എസ് റോക്കറ്റിനെ വെഹിക്കിൾ അസംബ്ലി ബിൽഡിങ്ങിൽ നിന്നും കെന്നഡി സ്പേസ് സെന്ററിലെ ലോഞ്ച് പാഡ് നമ്പർ 39 ബിയിലേക്ക് വിജയകരമായി മാറ്റി. ഏകദേശം 12 മണിക്കൂർ നീണ്ടുനിന്ന അതീവ സങ്കീർണ്ണമായ പ്രക്രിയയിലൂടെയാണ് റോക്കറ്റിനെ ലോഞ്ച് പാഡിലെത്തിച്ചത്. സെക്കൻഡിൽ അര മീറ്ററിൽ താഴെ മാത്രം വേഗത്തിൽ സഞ്ചരിക്കുന്ന ഭീമാകാരമായ ക്രോളർ ട്രാൻസ്പോർട്ടർ ഉപയോഗിച്ചായിരുന്നു ഈ മാറ്റം. ഫെബ്രുവരി രണ്ടാം തീയതി റോക്കറ്റിൽ ഇന്ധനം നിറച്ചുകൊണ്ടുള്ള ‘വെറ്റ് ഡ്രസ് റിഹേഴ്സൽ’ നടക്കും.
പത്ത് ദിവസം നീണ്ടുനിൽക്കുന്ന ആർട്ടെമിസ്-2 ദൗത്യത്തിലൂടെ നാല് ബഹിരാകാശ സഞ്ചാരികളാണ് ചന്ദ്രനെ ചുറ്റി ഭൂമിയിലേക്ക് തിരികെ വരിക. നാസയുടെ റീഡ് വൈസ്മാൻ കമാൻഡറായി നയിക്കുന്ന ഈ ദൗത്യത്തിൽ വിക്ടർ ഗ്ലോവർ പൈലറ്റായും ക്രിസ്റ്റീന കോച്ച് മിഷൻ സ്പെഷ്യലിസ്റ്റായും പ്രവർത്തിക്കും. കനേഡിയൻ ബഹിരാകാശ ഏജൻസിയിലെ ജെറമി ഹാൻസെണാണ് സംഘത്തിലെ നാലാമത്തെ അംഗം. അമ്പത് വർഷങ്ങൾക്ക് ശേഷം മനുഷ്യനെ വീണ്ടും ചന്ദ്രനിലെത്തിക്കാനുള്ള നാസയുടെ ശ്രമങ്ങളിലെ നിർണ്ണായകമായ ഘട്ടമാണിത്.
The post ചന്ദ്രനിലേക്ക് വീണ്ടും മനുഷ്യർ; ആർട്ടെമിസ്-2 ദൗത്യത്തിനുള്ള എസ്.എൽ.എസ് റോക്കറ്റ് ലോഞ്ച് പാഡിലെത്തി appeared first on Express Kerala.
