രുചിയും സുഗന്ധവും ഒത്തുചേരുന്ന മുസംബി കേവലം ഒരു ദാഹശമനി മാത്രമല്ല, ഗുണങ്ങളേറെയുള്ള ഔഷധഫലം കൂടിയാണ്. ഓറഞ്ചുമായി താരതമ്യം ചെയ്യുമ്പോൾ കലോറിയും അമ്ലസ്വഭാവവും കുറവായതിനാൽ ദഹനപ്രശ്നങ്ങളുള്ളവർക്കും പ്രമേഹരോഗികൾക്കും മുസംബി ഏറെ അനുയോജ്യമാണെന്ന് ആരോഗ്യവിദഗ്ധർ ചൂണ്ടിക്കാട്ടുന്നു.
ഗുണങ്ങളേറെ, രോഗങ്ങൾ കുറയും
സംസ്കൃതത്തിൽ ‘മിഷ്ട നിംബു ഫല’ എന്ന് വിളിക്കപ്പെടുന്ന മുസംബി, ആയുർവേദ പ്രകാരം ബല്യം (ശക്തി നൽകുന്നത്), ബൃംഹണം (പോഷണം നൽകുന്നത്) എന്നീ ഗുണങ്ങളാൽ സമ്പന്നമാണ്. മുസംബിയിലടങ്ങിയിരിക്കുന്ന വിറ്റമിൻ എ, സി, ഫൈബർ, പൊട്ടാസ്യം, ഫോളിക് ആസിഡ് തുടങ്ങിയ ഘടകങ്ങൾ പ്രതിരോധശേഷി വർധിപ്പിക്കാനും ചർമസൗന്ദര്യം മെച്ചപ്പെടുത്താനും സഹായിക്കുന്നു.
Also Read: രുചിമേളവുമായി രാജ്മ; തീൻമേശയിൽ വിരുന്നൊരുക്കാൻ പത്ത് വൈവിധ്യങ്ങൾ
അമ്ലത കുറവായതിനാൽ ജി.ഇ.ആർ.ഡി പോലുള്ള അസിഡിറ്റി പ്രശ്നങ്ങൾ ഉള്ളവർക്കും മുസംബി ഉപയോഗിക്കാം. പനി, ജലദോഷം, തൊണ്ടവേദന എന്നിവയുള്ളപ്പോൾ മരുന്നുകൾക്കൊപ്പം മുസംബി കഴിക്കുന്നത് രോഗമുക്തി വേഗത്തിലാക്കും.
പ്രധാന ഗുണങ്ങൾ ചുരുക്കത്തിൽ
ദഹനം സുഗമമാക്കുന്നു: ഇതിലെ ഡയറ്ററി ഫൈബറുകൾ വിശപ്പുണ്ടാക്കുകയും ദഹനം മെച്ചപ്പെടുത്തുകയും ചെയ്യുന്നു.
ഹൃദയാരോഗ്യം: പൊട്ടാസ്യം ധാരാളമുള്ളതിനാൽ മധുരം ചേർക്കാതെ മുസംബി ജ്യൂസ് കുടിക്കുന്നത് ഹൃദയത്തിന് ഗുണകരമാണ്.
പ്രമേഹരോഗികൾക്ക്: ഗ്ലൈസിമിക് ഇൻഡക്സ് കുറവായതിനാൽ പ്രമേഹമുള്ളവർക്കും മിതമായ തോതിൽ ഭക്ഷണത്തിൽ ഉൾപ്പെടുത്താം.
എല്ലുകളുടെ ആരോഗ്യം: കാൽസ്യം, വിറ്റമിൻ സി എന്നിവ അസ്ഥികളുടെയും സന്ധികളുടെയും ആരോഗ്യം ഉറപ്പാക്കുന്നു.
മൂത്ര സംബന്ധമായ പ്രശ്നങ്ങൾ: മൂത്രച്ചുടിച്ചിൽ അനുഭവപ്പെടുമ്പോൾ മുസംബി നീര് വെള്ളം ചേർത്ത് കുടിക്കുന്നത് ആശ്വാസം നൽകും.
വൈവിധ്യമാർന്ന ഇനങ്ങൾ
ഇന്ത്യയിൽ വിവിധയിനം മുസംബികൾ കൃഷിചെയ്യുന്നുണ്ട്. മഹാരാഷ്ട്രയിലെ ‘കറ്റോൾ ഗോൾഡ്’, കർണാടകയിലെ ‘കൂർഗ് മുസംബി’, ആന്ധ്രയിലെ ‘സാത്തുക്കുടി’ എന്നിവ ഇതിൽ പ്രശസ്തമാണ്. കേരളത്തിൽ പാലക്കാടും ചിറ്റാറിലുമാണ് മുസംബി കൃഷി വ്യാപകമായിട്ടുള്ളത്.
ആരോഗ്യ സംരക്ഷണത്തിന് പുറമെ, സൗന്ദര്യവർധക വസ്തുക്കളിലും പെർഫ്യൂമുകളിലും മുസംബിയുടെ തൊലി ഉപയോഗിക്കുന്നുണ്ട്. ഭക്ഷ്യവിഭവങ്ങളിൽ സ്വാദ് പകരാനും മാംസാഹാരങ്ങൾ മൃദുവാക്കാനും വിദേശ രാജ്യങ്ങളിൽ മുസംബി വ്യാപകമായി ഉപയോഗിച്ചുവരുന്നു.
The post ആരോഗ്യത്തിന് ‘മധുരനാരങ്ങ’; അസിഡിറ്റി ഉള്ളവർക്കും മുസംബി ഉത്തമം appeared first on Express Kerala.
