ന്യൂസിലൻഡിനെതിരായ ഏകദിന പരമ്പരയിലെ തോൽവിക്ക് പിന്നാലെ രോഹിത് ശർമയുടെ ഫോമിനെച്ചൊല്ലി വിമർശനം ഉയരുമ്പോൾ, സീനിയർ താരത്തിന് പിന്തുണയുമായി ഇന്ത്യൻ നായകൻ ശുഭ്മാൻ ഗിൽ. ഇൻഡോറിലെ അവസാന മത്സരത്തിലും പരാജയപ്പെട്ടതോടെ പരമ്പരയിൽ രോഹിത്തിന്റെ പ്രകടനം ചർച്ചയായിരുന്നു. എന്നാൽ രോഹിത് ഇപ്പോഴും മികച്ച ഫോമിലാണെന്നും ഓരോ ഇന്നിങ്സും സെഞ്ച്വറിയാകണമെന്ന് വാശിപിടിക്കുന്നത് അസാധ്യമാണെന്നും ഗിൽ വാർത്താസമ്മേളനത്തിൽ പറഞ്ഞു.
നായകൻ ഗില്ലിന്റെ വാക്കുകൾ
“രോഹിത് ശർമയുടെ ഫോമിൽ എനിക്ക് ആശങ്കയില്ല. ഓസ്ട്രേലിയ, ദക്ഷിണാഫ്രിക്ക പരമ്പരകളിൽ അദ്ദേഹം എത്രത്തോളം മികച്ച രീതിയിലാണ് ബാറ്റ് ചെയ്തതെന്ന് നമ്മൾ കണ്ടതാണ്. ന്യൂസിലൻഡിനെതിരെയും ചില മത്സരങ്ങളിൽ അദ്ദേഹം മികച്ച തുടക്കങ്ങൾ നൽകി. എന്നാൽ എല്ലാ തുടക്കങ്ങളും സെഞ്ച്വറികളായി മാറണമെന്ന് നിർബന്ധം പിടിക്കാനാവില്ല. അത് പ്രായോഗികവുമല്ല. ലക്ഷ്യത്തിനായി നിരന്തരം പരിശ്രമിക്കുക എന്നതാണ് പ്രധാനം” ഗിൽ വ്യക്തമാക്കി.
Also Read: കോഹ്ലിയുടെ റെക്കോർഡ് സെഞ്ച്വറിക്ക് കൈയ്യടിച്ച് ഗംഭീർ, 2027 ലോകകപ്പിലേക്ക് കണ്ണുവെച്ച് കിംഗ്!
ഇന്ത്യയ്ക്ക് കനത്ത ആഘാതം
ഇന്ത്യൻ മണ്ണിൽ കിവീസ് നേടുന്ന ആദ്യ ഏകദിന പരമ്പര വിജയമാണിത്. ഇൻഡോറിൽ നടന്ന മൂന്നാം ഏകദിനത്തിൽ 41 റൺസിനായിരുന്നു ഇന്ത്യയുടെ പരാജയം. വിരാട് കോഹ്ലി സെഞ്ച്വറിയുമായി (124) മുന്നിൽ നിന്ന് നയിച്ചെങ്കിലും ഇന്ത്യയെ വിജയതീരത്തെത്തിക്കാൻ കഴിഞ്ഞില്ല. വാലറ്റത്ത് നിതീഷ് കുമാർ റെഡ്ഡിയും ഹർഷിത് റാണയും അർധസെഞ്ച്വറികളുമായി പൊരുതി നോക്കിയെങ്കിലും 46 ഓവറിൽ ഇന്ത്യയുടെ പോരാട്ടം അവസാനിക്കുകയായിരുന്നു. പരമ്പരയിലെ മൂന്ന് മത്സരങ്ങളിൽ നിന്ന് വെറും 61 റൺസ് മാത്രമാണ് രോഹിത്തിന് നേടാനായത്.
The post രോഹിതിനെ തൊട്ടുകളിക്കണ്ട! വിമർശകർക്ക് മറുപടിയുമായി ക്യാപ്റ്റൻ ഗിൽ; തോൽവിയിലും സീനിയർ താരത്തിന് പിന്തുണ appeared first on Express Kerala.
