മിതമായ വേനൽക്കാലവും കുളിരുള്ള ശൈത്യകാലവും കൊണ്ട് സഞ്ചാരികളുടെ മനം കവരുന്ന ഒമാനിലെ ജബൽ അഖ്ദറിലേക്ക് സന്ദർശകരുടെ ഒഴുക്ക് വർധിക്കുന്നു. ദാഖിലിയ ഗവർണറേറ്റിലെ ഈ മനോഹര മലനിരകളിൽ കഴിഞ്ഞ വർഷം മാത്രം 222,151 പേരാണ് എത്തിയത്. 2024-ൽ ഇതേ കാലയളവിൽ എത്തിയ 203,629 സന്ദർശകരെ അപേക്ഷിച്ച് വലിയ വളർച്ചയാണ് ടൂറിസം മേഖലയിൽ ഉണ്ടായിരിക്കുന്നത്. നാഷണൽ സെന്റർ ഫോർ സ്റ്റാറ്റിസ്റ്റിക്സ് ആൻഡ് ഇൻഫർമേഷൻ പുറത്തുവിട്ട കണക്കുകൾ പ്രകാരം, പ്രകൃതിഭംഗി ആസ്വദിക്കാനെത്തുന്നവരുടെ എണ്ണത്തിൽ ഓരോ വർഷവും വൻ കുതിച്ചുചാട്ടമാണ് പ്രകടമാകുന്നത്.
സന്ദർശകരുടെ കണക്കെടുത്താൽ സ്വദേശികളായ ഒമാനികളാണ് മുന്നിട്ടുനിൽക്കുന്നത്; ഏകദേശം 82,142 പേർ ഇവിടം സന്ദർശിച്ചു. അയൽരാജ്യങ്ങളായ സൗദി അറേബ്യ (14,957), യുഎഇ, കുവൈത്ത്, ഖത്തർ, ബഹ്റൈൻ എന്നിവിടങ്ങളിൽ നിന്നുള്ളവരുടെ സാന്നിധ്യവും ശ്രദ്ധേയമാണ്. എന്നാൽ ഏറ്റവും കൂടുതൽ സന്ദർശകർ എത്തിയത് മറ്റ് വിദേശ രാജ്യങ്ങളിൽ നിന്നാണെന്നത് (110,643 പേർ) ജബൽ അഖ്ദറിന്റെ ആഗോള പ്രശസ്തിയെ അടിവരയിടുന്നു. വിനോദസഞ്ചാരികളെ സ്വീകരിക്കുന്നതിനായി മികച്ച ഹോട്ടലുകളും റിസോർട്ടുകളും ടൂറിസ്റ്റ് ലോഡ്ജുകളും ഇവിടെ സജ്ജമാണ്.
Also Read: ഒമാനിൽ അനധികൃത നുഴഞ്ഞുകയറ്റം; 32 പേർ പോലീസ് പിടിയിൽ
കേവലം കാഴ്ചകൾക്കപ്പുറം സാഹസികതയ്ക്കും പരിസ്ഥിതി ടൂറിസത്തിനും വലിയ പ്രാധാന്യമാണ് ഈ പ്രദേശം നൽകുന്നത്. താഴ്വരകളിലൂടെയുള്ള ട്രെക്കിങ്, ഗുഹാ പര്യവേക്ഷണം, പർവതാരോഹണം തുടങ്ങിയവയ്ക്ക് അനുയോജ്യമായ ഭൂപ്രകൃതി ജബൽ അഖ്ദറിനെ സാഹസികരുടെ പറുദീസയാക്കുന്നു. സാംസ്കാരികവും വിനോദപരവുമായ നിരവധി പരിപാടികൾ വർഷം മുഴുവനും സംഘടിപ്പിക്കുന്നത് ഇവിടേക്കുള്ള സഞ്ചാരികളുടെ വരവ് വർധിപ്പിക്കാൻ പ്രധാന കാരണമാകുന്നുണ്ട്.
The post ജബൽ അഖ്ദർ! സഞ്ചാരികളുടെ പ്രിയപ്പെട്ട പറുദീസ; സന്ദർശകരുടെ എണ്ണത്തിൽ വൻ വർധനവ് appeared first on Express Kerala.
