പ്രതിപക്ഷ നേതാവ് വി.ഡി. സതീശനെതിരെ രൂക്ഷവിമർശനവുമായി എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ രംഗത്തെത്തി. വി.ഡി. സതീശൻ ഒരു ‘പുകഞ്ഞ കൊള്ളിയാണെന്നും’ അദ്ദേഹത്തിന്റെ പ്രസ്താവനകളെ അവജ്ഞയോടെ തള്ളിക്കളയുന്നുവെന്നും വെള്ളാപ്പള്ളി മാധ്യമങ്ങളോട് പറഞ്ഞു. സതീശൻ തനിക്ക് ഒരു ചർച്ചാവിഷയമേ അല്ലെന്നും തന്നെ വർഗീയവാദിയെന്ന് വിളിക്കുന്നവർ, മതം മാത്രമാണ് പ്രശ്നമെന്ന് പറയുന്ന മുസ്ലിം ലീഗിനെ വിമർശിക്കാൻ ഭയപ്പെടുന്നത് എന്തുകൊണ്ടാണെന്നും അദ്ദേഹം ചോദിച്ചു.
വി.ഡി. സതീശന്റെ പരാമർശങ്ങൾക്കെതിരെ എസ്.എൻ.ഡി.പി സംസ്ഥാന ഭാരവാഹി യോഗത്തിൽ ശക്തമായ പ്രതിഷേധമാണ് ഉയർന്നത്. യോഗം ജനറൽ സെക്രട്ടറിയെ വർഗീയവാദിയായി ചിത്രീകരിക്കാൻ കോൺഗ്രസിന് എന്ത് അവകാശമാണുള്ളതെന്ന് ഭാരവാഹികൾ യോഗത്തിൽ ചോദ്യം ചെയ്തു. വി.ഡി. സതീശന്റെ വർഗീയവാദ പരാമർശത്തെ പുച്ഛത്തോടെ തള്ളിക്കളഞ്ഞ യോഗം, വെള്ളാപ്പള്ളി നടേശന് പൂർണ്ണ പിന്തുണ പ്രഖ്യാപിക്കുകയും ചെയ്തു.
Also Read: തിരുവനന്തപുരം ഇനി മാറും! സാറ്റലൈറ്റ് നഗരങ്ങളും വമ്പൻ പദ്ധതികളുമായി മോദി എത്തുന്നു
ജമാഅത്തെ ഇസ്ലാമി അപകടമാണെന്ന് മുമ്പ് പഠിപ്പിച്ച വി.ഡി. സതീശൻ, ഇന്ന് യു.ഡി.എഫ്-ജമാഅത്തെ ഇസ്ലാമി സഖ്യത്തിനൊപ്പമാണെന്ന തരത്തിലുള്ള പഴയ നിലപാടുകളും വാർത്തകളിൽ ചർച്ചയാകുന്നുണ്ട്. വെള്ളാപ്പള്ളി നടേശൻ നടത്തുന്ന അവകാശ പോരാട്ടങ്ങൾക്ക് എല്ലാവിധ ഐക്യദാർഢ്യവും പ്രഖ്യാപിച്ച എസ്.എൻ.ഡി.പി യോഗം, അദ്ദേഹത്തിനെതിരായ നീക്കങ്ങളെ ഒന്നിച്ച് നേരിടുമെന്നും വ്യക്തമാക്കി.
The post വി.ഡി സതീശൻ പുകഞ്ഞ കൊള്ളി; രൂക്ഷവിമർശനവുമായി വെള്ളാപ്പള്ളി നടേശൻ appeared first on Express Kerala.
