ഇന്ത്യ പോസ്റ്റ് ഉടൻ തന്നെ ഗ്രാമിൻ ഡാക്ക് സേവക് റിക്രൂട്ട്മെന്റ് 2025-ലേക്ക് അപേക്ഷകൾ ക്ഷണിക്കുന്നു. ബ്രാഞ്ച് പോസ്റ്റ് മാസ്റ്റർ (ബിപിഎം), അസിസ്റ്റന്റ് ബ്രാഞ്ച് പോസ്റ്റ് മാസ്റ്റർ (എബിപിഎം), ഡാക്ക് സേവക് എന്നീ തസ്തികകളിലായി ആകെ 28,740 ഒഴിവുകളാണുള്ളത്. കേരളം ഉൾപ്പെടെയുള്ള വിവിധ സംസ്ഥാനങ്ങളിലാണ് ഈ ഒഴിവുകൾ റിപ്പോർട്ട് ചെയ്തിരിക്കുന്നത്. ജനുവരി 31 മുതൽ ഫെബ്രുവരി 14 വരെ ഉദ്യോഗാർത്ഥികൾക്ക് ഔദ്യോഗിക വെബ്സൈറ്റായ indiapostgdsonline.gov.in വഴി അപേക്ഷ സമർപ്പിക്കാം. അപേക്ഷകളിൽ തിരുത്തലുകൾ വരുത്താൻ ഫെബ്രുവരി 18, 19 തീയതികളിൽ സൗകര്യമുണ്ടായിരിക്കും.
അതേസമയം അംഗീകൃത ബോർഡിൽ നിന്ന് പത്താം ക്ലാസ് വിജയിച്ചവർക്ക് ഈ തസ്തികകളിലേക്ക് അപേക്ഷിക്കാം. പത്താം ക്ലാസിൽ ഗണിതം, ഇംഗ്ലീഷ് എന്നീ വിഷയങ്ങളിൽ നിർബന്ധമായും വിജയിച്ചിരിക്കണം. 18 നും 40 നും ഇടയിൽ പ്രായമുള്ള ഉദ്യോഗാർത്ഥികൾക്കാണ് അവസരം. പത്താം ക്ലാസിൽ ലഭിച്ച മാർക്കിന്റെ അടിസ്ഥാനത്തിൽ തയ്യാറാക്കുന്ന മെറിറ്റ് ലിസ്റ്റ് വഴിയാണ് തിരഞ്ഞെടുപ്പ് നടക്കുന്നത്. ഈ പട്ടിക ഫെബ്രുവരി 28-ന് പ്രസിദ്ധീകരിക്കും. ഉയർന്ന മാർക്ക് നേടുന്നവർക്ക് മുൻഗണന ലഭിക്കുന്ന രീതിയിലാണ് നടപടിക്രമങ്ങൾ ക്രമീകരിച്ചിരിക്കുന്നത്.
Also Read: നീറ്റ് പിജി, നീറ്റ് എംഡിഎസ് പരീക്ഷാ തീയതികൾ പ്രഖ്യാപിച്ചു; വിശദമായ ടൈംടേബിൾ അറിയാം
പൊതുവിഭാഗത്തിൽപ്പെട്ടവർക്ക് 100 രൂപയാണ് അപേക്ഷാ ഫീസ്. എന്നാൽ സ്ത്രീകൾ, എസ്സി/എസ്ടി വിഭാഗക്കാർ, ഭിന്നശേഷിക്കാർ, ട്രാൻസ്ജെൻഡർ വനിതകൾ എന്നിവരെ അപേക്ഷാ ഫീസിൽ നിന്ന് ഒഴിവാക്കിയിട്ടുണ്ട്. അർഹരായ ഉദ്യോഗാർത്ഥികൾക്ക് നെറ്റ് ബാങ്കിംഗ്, യുപിഐ, ക്രെഡിറ്റ്/ഡെബിറ്റ് കാർഡുകൾ എന്നിവ വഴി ഫീസ് അടയ്ക്കാവുന്നതാണ്. കൂടുതൽ വിവരങ്ങൾക്കും വിജ്ഞാപനത്തിനുമായി ഉദ്യോഗാർത്ഥികൾ ഇന്ത്യ പോസ്റ്റിന്റെ വെബ്സൈറ്റ് സന്ദർശിക്കേണ്ടതാണ്.
The post ഇന്ത്യ പോസ്റ്റിൽ 28,740 ഒഴിവുകൾ; ജിഡിഎസ് റിക്രൂട്ട്മെന്റ് അപേക്ഷകൾ ജനുവരി 31 മുതൽ appeared first on Express Kerala.
