മാറിക്കൊണ്ടിരിക്കുന്ന ജീവിതശൈലിയിൽ തൈറോയ്ഡ് രോഗങ്ങൾ വർദ്ധിച്ചുവരുന്നത് പ്രത്യുൽപാദന ആരോഗ്യത്തെ ഗുരുതരമായി ബാധിക്കുന്നതായി ആരോഗ്യ വിദഗ്ധർ. ഹൈപ്പോതൈറോയിഡിസം, ഹൈപ്പർതൈറോയിഡിസം എന്നീ അവസ്ഥകൾ സ്ത്രീകളിലും പുരുഷന്മാരിലും വന്ധ്യതയ്ക്കും മറ്റ് ആരോഗ്യ പ്രശ്നങ്ങൾക്കും കാരണമാകുന്നു.
20 ശതമാനം വന്ധ്യതാ കേസുകളും തൈറോയ്ഡ് മൂലം
ഇന്ത്യയിലെ സ്ത്രീകളിൽ കാണപ്പെടുന്ന വന്ധ്യതാ കേസുകളിൽ ഏകദേശം 20 ശതമാനവും തൈറോയ്ഡ് സംബന്ധമായ തകരാറുകൾ മൂലമാണെന്ന് ‘ജേണൽ ഓഫ് എവിഡൻസ് ബേസ്ഡ് മെഡിസിൻ ആൻഡ് ഹെൽത്ത്കെയർ’ വ്യക്തമാക്കുന്നു. പലപ്പോഴും ലക്ഷണങ്ങൾ പ്രകടമല്ലാത്തതിനാൽ സ്ത്രീകൾ ഇത് തിരിച്ചറിയാൻ വൈകുന്നു. ഇത് ആവർത്തിച്ചുള്ള ഗർഭം അലസലിനും ഗർഭധാരണ തടസ്സങ്ങൾക്കും കാരണമാകുന്നുണ്ട്.
Also Read: ചക്ക ഇനി ‘മോഡേൺ’ ആകും; രുചിയിൽ വിസ്മയിപ്പിക്കാൻ ഏഷ്യൻ ഇൻസ്പയേർഡ് ചക്ക സാലഡ്
ഹോർമോൺ വ്യതിയാനങ്ങളും തടസ്സങ്ങളും
ശരീരത്തിന്റെ മെറ്റബോളിസം, ഊർജ്ജ നില, മാനസികാവസ്ഥ എന്നിവയെ നിയന്ത്രിക്കുന്നതിൽ തൈറോയ്ഡ് ഗ്രന്ഥിക്ക് വലിയ പങ്കുണ്ട്. തൈറോയ്ഡ് ഹോർമോണിലുണ്ടാകുന്ന നേരിയ മാറ്റം പോലും അണ്ഡോത്പാദനം, ആർത്തവചക്രം എന്നിവയെ താളം തെറ്റിക്കുന്നു.
തൈറോയ്ഡ് പ്രശ്നങ്ങൾ പ്രത്യുൽപാദന ഹോർമോണുകളെ ബാധിക്കുന്നതിനെക്കുറിച്ച് ഗുഡ്ഗാവിലെ മദർഹുഡ് ആശുപത്രിയിലെ ഗൈനക്കോളജിസ്റ്റ് ഡോ. സോണാൽ സിംഗാൾ പറയുന്നത് ഇങ്ങനെ.
“തൈറോയ്ഡ് ഗ്രന്ഥി തലച്ചോറ്, അണ്ഡാശയങ്ങൾ, വൃഷണങ്ങൾ എന്നിവയുമായി ചേർന്ന് പ്രവർത്തിക്കുന്ന ഒന്നാണ്. തൈറോയ്ഡ് അളവ് കുറയുമ്പോൾ ശരീരത്തിൽ പ്രോലാക്റ്റിൻ എന്ന ഹോർമോൺ വർദ്ധിക്കുന്നു. ഇത് സ്ത്രീകളിൽ അണ്ഡോത്പാദനത്തെ തടയുകയും പുരുഷന്മാരിൽ ബീജ ഉത്പാദനം കുറയ്ക്കുകയും ചെയ്യുന്നു.”
പ്രധാന ലക്ഷണങ്ങൾ ശ്രദ്ധിക്കുക
- ക്രമരഹിതമായ ആർത്തവം.
- അമിതമായ ക്ഷീണവും ശരീരഭാരത്തിൽ ഉണ്ടാകുന്ന മാറ്റങ്ങളും.
- ഗർഭം ധരിക്കാനുള്ള ബുദ്ധിമുട്ട്.
- മാനസിക സമ്മർദ്ദവും രോഗപ്രതിരോധ ശേഷിക്കുറവും.
ഈസ്ട്രജൻ, പ്രൊജസ്ട്രോൺ തുടങ്ങിയ പ്രധാന സ്ത്രീ ഹോർമോണുകളെയും തൈറോയ്ഡ് നേരിട്ട് ബാധിക്കുന്നുണ്ട്. അതിനാൽ വന്ധ്യതാ ചികിത്സ തേടുന്നവരും ഗർഭം ധരിക്കാൻ ആഗ്രഹിക്കുന്നവരും തൈറോയ്ഡ് പരിശോധന നടത്തുന്നത് ഉചിതമായിരിക്കുമെന്ന് ഡോക്ടർമാർ നിർദ്ദേശിക്കുന്നു.
The post തൈറോയ്ഡ് അസന്തുലിതാവസ്ഥ; ശ്രദ്ധിച്ചില്ലെങ്കിൽ വന്ധ്യതയ്ക്ക് കാരണമായേക്കാം appeared first on Express Kerala.
