തിരുവനന്തപുരം: തനിക്ക് രാഷ്ട്രീയത്തിൽ പ്രത്യേക താൽപ്പര്യങ്ങളില്ലെന്നും ആര് വന്നാലും ആശംസകൾ നേരുന്നത് തന്റെ രീതിയാണെന്നും പ്രമുഖ വ്യവസായിയും ലുലു ഗ്രൂപ്പ് ചെയർമാനുമായ എം.എ. യൂസഫലി. മുൻപ് പിണറായി വിജയൻ വീണ്ടും മുഖ്യമന്ത്രിയാകട്ടെ എന്ന് ആശംസിച്ചത് വലിയ ചർച്ചയായ പശ്ചാത്തലത്തിൽ മാധ്യമപ്രവർത്തകരുടെ ചോദ്യത്തിന് മറുപടി നൽകുകയായിരുന്നു അദ്ദേഹം. ജയിക്കുന്നതും തോൽക്കുന്നതും ജനങ്ങൾ തീരുമാനിക്കുന്ന കാര്യമാണെന്നും എന്നാൽ കാണാൻ വരുന്നവർക്ക് ആശംസ നേരുന്നതിൽ തനിക്ക് ബുദ്ധിമുട്ടില്ലെന്നും അദ്ദേഹം വ്യക്തമാക്കി.
താനൊരു കച്ചവടക്കാരൻ മാത്രമാണെന്നും രാഷ്ട്രീയക്കാരെപ്പോലെ ജീവിതം ഉഴിഞ്ഞുവെച്ച ആളല്ലെന്നും അദ്ദേഹം പറഞ്ഞു. മുഖ്യമന്ത്രിക്കും പ്രധാനമന്ത്രിക്കും ഒരുപോലെ സ്വാഗതം പറയുന്ന പാരമ്പര്യമാണ് തനിക്കുള്ളത്. എല്ലാവരും മതസൗഹാർദ്ദത്തോടെ കഴിയുന്ന ഈ രാജ്യത്ത് രാഷ്ട്രീയത്തിനപ്പുറം മനുഷ്യർ തമ്മിലുള്ള ഒത്തൊരുമയ്ക്കാണ് താൻ വില നൽകുന്നതെന്നും അദ്ദേഹം കൂട്ടിച്ചേർത്തു. ദുബായിൽ നടന്ന പരിപാടിയിൽ മുഖ്യമന്ത്രിയെ പുകഴ്ത്തിയതിനെക്കുറിച്ച് ഉയർന്ന രാഷ്ട്രീയ വിവാദങ്ങൾക്ക് ഇതോടെ അദ്ദേഹം വിരാമമിട്ടു.
The post ആര് വന്നാലും ആശംസ നേരും, എനിക്ക് രാഷ്ട്രീയമില്ല! പിണറായിയെ പുകഴ്ത്തിയെന്ന വിവാദത്തിൽ മറുപടിയുമായി എം.എ. യൂസഫലി appeared first on Express Kerala.
