ദുബായ് ആസ്ഥാനമായുള്ള എമിറേറ്റ്സ് എയർലൈൻ ഈ ദശകത്തിന്റെ അവസാനത്തോടെ 20,000 പുതിയ ജീവനക്കാരെ കൂടി നിയമിക്കാൻ ഒരുങ്ങുന്നു. വിമാനങ്ങളുടെ എണ്ണം വർദ്ധിപ്പിക്കുന്നതിനും ആഗോളതലത്തിൽ സർവീസുകൾ വിപുലീകരിക്കുന്നതിനും മുന്നോടിയായാണ് ഈ വമ്പൻ റിക്രൂട്ട്മെന്റ് ഡ്രൈവ്. എമിറേറ്റ്സ് ഡെപ്യൂട്ടി പ്രസിഡന്റും സി.ഒ.ഒയുമായ അദെൽ അൽ റെദ ദുബായിൽ നടന്ന വാർത്താ സമ്മേളനത്തിലാണ് ഇക്കാര്യം പ്രഖ്യാപിച്ചത്. പ്രവാസികൾക്കും മലയാളികൾക്കും ഉൾപ്പെടെ വലിയ പ്രതീക്ഷ നൽകുന്നതാണ് ഈ പ്രഖ്യാപനം.
പ്രധാനമായും ഓപ്പറേഷൻസ് വിഭാഗത്തിലാണ് ഒഴിവുകളുള്ളത്. കാബിൻ ക്രൂ, പൈലറ്റുമാർ, എഞ്ചിനീയർമാർ, ടെക്നീഷ്യൻമാർ, എയർപോർട്ട് സ്റ്റാഫ് എന്നിവർക്ക് പുറമെ ഐടി, അഡ്മിനിസ്ട്രേഷൻ വിഭാഗങ്ങളിലും പുതിയ നിയമനങ്ങൾ നടക്കും. യുഎഇയിൽ നിന്നും അന്താരാഷ്ട്ര തലത്തിൽ നിന്നുമായി ഉദ്യോഗാർത്ഥികളെ കമ്പനി തേടുന്നുണ്ട്. ഈ വർഷം മാത്രം 17 പുതിയ എയർബസ് A350 വിമാനങ്ങൾ എമിറേറ്റ്സ് നിരയിൽ ചേരുന്നതും 2027-ഓടെ ബോയിംഗ് 777X വിമാനങ്ങൾ എത്തുന്നതുമാണ് ജീവനക്കാരുടെ എണ്ണം വർദ്ധിപ്പിക്കാൻ കമ്പനിയെ പ്രേരിപ്പിക്കുന്നത്.
Also Read: നിർമ്മാണത്തിന് ഇനി റോബട്ടുകൾ! ലോകത്തിലെ ആദ്യത്തെ റോബട്ടിക് വില്ലയുമായി ദുബായ്
പല അന്താരാഷ്ട്ര എയർലൈനുകളും പൈലറ്റുമാരുടെ ക്ഷാമം നേരിടുമ്പോൾ എമിറേറ്റ്സിന് അത്തരം പ്രതിസന്ധികളില്ലെന്ന് അൽ റെദ വ്യക്തമാക്കി. ദുബായ് നൽകുന്ന മികച്ച ജീവിതസാഹചര്യങ്ങളും സുരക്ഷയും ലോകമെമ്പാടുമുള്ള ഉദ്യോഗാർത്ഥികളെ ആകർഷിക്കുന്നുണ്ട്. നിലവിലെ രാഷ്ട്രീയ സാഹചര്യങ്ങൾക്കിടയിലും വിമാന സർവീസുകൾ 100 ശതമാനം കാര്യക്ഷമമായി മുന്നോട്ട് കൊണ്ടുപോകാൻ എമിറേറ്റ്സിന് സാധിക്കുന്നുണ്ടെന്നും കമ്പനി അധികൃതർ കൂട്ടിച്ചേർത്തു.
The post എമിറേറ്റ്സിൽ തൊഴിലവസരങ്ങളുടെ വൻവേട്ട! 20,000 പുതിയ ജീവനക്കാരെ നിയമിക്കുന്നു appeared first on Express Kerala.
