സംസ്ഥാന ബജറ്റിനെ പരിഹസിച്ച പ്രതിപക്ഷ നേതാവ് വി.ഡി. സതീശന് കടുത്ത ഭാഷയിൽ മറുപടി നൽകി വിദ്യാഭ്യാസ മന്ത്രി വി. ശിവൻകുട്ടി. ഖജനാവിൽ പൂച്ച പെറ്റു കിടക്കുകയാണെന്ന സതീശന്റെ പരാമർശം വസ്തുതാവിരുദ്ധമാണെന്ന് മന്ത്രി പറഞ്ഞു. വിമർശനങ്ങൾ ഉന്നയിക്കുന്ന പ്രതിപക്ഷ നേതാവ് തന്റെ അലവൻസുകളും ആനുകൂല്യങ്ങളും മാസാമാസം കൈപ്പറ്റുന്നത് ഇതേ ഖജനാവിൽ നിന്നാണെന്ന കാര്യം മറക്കരുതെന്നും മന്ത്രി ഓർമ്മിപ്പിച്ചു. ഖജനാവ് അത്രയ്ക്ക് ശൂന്യമാണെങ്കിൽ പ്രതിപക്ഷ നേതാവിന് ലഭിക്കുന്ന ഈ പണം എവിടെ നിന്നാണ് വരുന്നതെന്ന് അദ്ദേഹം ചോദിച്ചു.
ബജറ്റ് വെറും വാക്കുകളല്ല, മറിച്ച് നാടിന്റെ പുരോഗതിക്കുള്ള കൃത്യമായ റോഡ് മാപ്പാണെന്ന് മന്ത്രി ശിവൻകുട്ടി വ്യക്തമാക്കി. ഖജനാവ് കാലിയാണെന്ന് പറയുന്നവർ പൊതുവിദ്യാലയങ്ങളിലെ ഹൈടെക് സംവിധാനങ്ങളും കുട്ടികൾക്ക് ലഭിക്കുന്ന സൗകര്യങ്ങളും കാണാതെ പോകരുത്. പാവപ്പെട്ടവന്റെ ക്ഷേമത്തിനായി സർക്കാർ നീക്കിവയ്ക്കുന്ന ഓരോ രൂപയും കൃത്യമായ ആസൂത്രണത്തോടെയാണ് വിനിയോഗിക്കുന്നത്. സ്വന്തം ആനുകൂല്യങ്ങൾ കൈപ്പറ്റുന്ന ഖജനാവിനെ തള്ളിപ്പറയുന്ന രീതി ശരിയല്ലെന്നും മന്ത്രി കൂട്ടിച്ചേർത്തു.
Also Read: മദ്യം വാങ്ങാൻ ഇനി ഫോൺ പേയോ കാർഡോ വേണം; ബെവ്കോയുടെ പുതിയ പരിഷ്കാരത്തിനെതിരെ ജീവനക്കാർ
നേരത്തെ, സംസ്ഥാന ബജറ്റിനെ ‘കബളിപ്പിക്കൽ’ എന്ന് വിശേഷിപ്പിച്ച വി.ഡി. സതീശൻ, സർക്കാർ ബജറ്റിനെ രാഷ്ട്രീയ രേഖയാക്കി മാറ്റിയെന്ന് കുറ്റപ്പെടുത്തിയിരുന്നു. പത്തുവർഷം ചെയ്യാത്ത കാര്യങ്ങൾ ഇപ്പോൾ ചെയ്യുമെന്ന് പറയുന്നത് ജനങ്ങളെ വിശ്വസിപ്പിക്കാനുള്ള തന്ത്രം മാത്രമാണെന്നും അദ്ദേഹം പറഞ്ഞു. ഇതേ തുടർന്നാണ്, പ്രതിപക്ഷത്തിന്റെ ആരോപണങ്ങൾ ബാലിശമാണെന്നും ആനുകൂല്യങ്ങൾ വാങ്ങുന്ന അതേ ഖജനാവിനെ അപമാനിക്കരുതെന്നും വ്യക്തമാക്കി മന്ത്രി ശിവൻകുട്ടി രംഗത്തെത്തിയത്.
The post ഖജനാവിൽ പൂച്ച പെറ്റെന്ന സതീശന്റെ പരിഹാസത്തിന് മറുപടിയുമായി ശിവൻകുട്ടി; ‘സ്വന്തം പോക്കറ്റിലേക്ക് നോക്കുന്നത് നന്നായിരിക്കും’ appeared first on Express Kerala.
