2026 ജനുവരിയിൽ ഇന്ത്യൻ ഇരുചക്ര വാഹന വിപണിയിൽ വൻ മുന്നേറ്റം. മുൻനിര കമ്പനികളായ ഹീറോ, ഹോണ്ട, ടിവിഎസ് എന്നിവയുടെ കരുത്തിൽ വിപണി കഴിഞ്ഞ വർഷത്തേക്കാൾ മികച്ച വളർച്ചയാണ് രേഖപ്പെടുത്തിയത്. ഗ്രാമീണ മേഖലയിലെ വർദ്ധിച്ച ആവശ്യകതയും നഗരങ്ങളിലെ സജീവമായ വിപണിയും കയറ്റുമതിയിലെ കുതിപ്പും ഈ നേട്ടത്തിന് പിന്നിലെ പ്രധാന ഘടകങ്ങളായി.
കഴിഞ്ഞ മാസത്തെ കണക്കുകൾ പ്രകാരം രാജ്യത്തെ പ്രധാന ആറ് കമ്പനികൾ ചേർന്ന് 18,31,853 വാഹനങ്ങളാണ് വിറ്റഴിച്ചത്. 2025 ജനുവരിയെ അപേക്ഷിച്ച് 26.39 ശതമാനത്തിന്റെ വർദ്ധനവാണിത്. വിപണിയിൽ ഒന്നാം സ്ഥാനം ഹീറോ മോട്ടോകോർപ്പ് നിലനിർത്തിയപ്പോൾ വളർച്ചാ നിരക്കിൽ ഹോണ്ടയും ടിവിഎസും കരുത്തുകാട്ടി. 5,20,208 യൂണിറ്റുകൾ വിറ്റഴിച്ച് ഹീറോ ഒന്നാമതെത്തിയപ്പോൾ, 5,19,579 യൂണിറ്റുകളുമായി ഹോണ്ട തൊട്ടുപിന്നാലെയുണ്ട്. ടിവിഎസ് മോട്ടോർ കമ്പനി 30.42 ശതമാനം വാർഷിക വളർച്ചയോടെ 3,83,262 യൂണിറ്റുകളുടെ വിൽപന നടത്തി ശ്രദ്ധേയമായ പ്രകടനം കാഴ്ചവച്ചു.
Also Read: ലേണേഴ്സ് പുതുക്കാൻ ഇനി കാഴ്ചപരിശോധന വേണ്ട; ഡ്രൈവിങ് ടെസ്റ്റ് കഴിഞ്ഞാൽ ഉടൻ ഡിജിറ്റൽ ലൈസൻസ്!
ബജാജ് ഓട്ടോ 2,14,727 യൂണിറ്റുകൾ വിൽപന നടത്തി വിപണിയിലെ സാന്നിധ്യം ശക്തമാക്കി. അതേസമയം, സുസുക്കിയും (1,00,296 യൂണിറ്റുകൾ) റോയൽ എൻഫീൽഡും (93,781 യൂണിറ്റുകൾ) വിൽപന അളവിൽ അല്പം പിന്നിലായിരുന്നെങ്കിലും തങ്ങളുടെ തനതായ വിപണി വിഹിതം നിലനിർത്തി. പ്രീമിയം വിഭാഗത്തിൽ ശ്രദ്ധ കേന്ദ്രീകരിക്കുന്നതിനാൽ റോയൽ എൻഫീൽഡിന് വിൽപന മൂല്യത്തിൽ മികച്ച നേട്ടമുണ്ടാക്കാൻ കഴിഞ്ഞു. വരും മാസങ്ങളിലും വിപണിയിൽ ഈ അനുകൂല സാഹചര്യം തുടരുമെന്നാണ് സാമ്പത്തിക വിദഗ്ധരുടെ വിലയിരുത്തൽ.
The post ഹീറോയോ ഹോണ്ടയോ? വിപണിയിൽ ഇഞ്ചോടിഞ്ച് പോരാട്ടം; ടൂവീലർ വിൽപനയിൽ 26% വളർച്ച appeared first on Express Kerala.
