ബൊളീവിയൻ തലസ്ഥാനമായ ലാ പാസിന് സമീപമുള്ള എൽ ആൾട്ടോ വിമാനത്താവളത്തിൽ പുതുതായി അച്ചടിച്ച കറൻസി നോട്ടുകളുമായി വന്ന ചരക്ക് വിമാനം തകർന്നു വീണു. വ്യോമസേനയുടെ ഉടമസ്ഥതയിലുള്ള ഹെർക്കുലീസ് സി-130 വിമാനമാണ് റൺവേയിൽ നിന്ന് തെന്നിമാറി സമീപത്തെ ദേശീയപാതയിലേക്ക് ഇടിച്ചിറങ്ങിയത്. അപകടത്തെത്തുടർന്നുണ്ടായ തീപിടുത്തത്തിലും ആഘാതത്തിലും കുറഞ്ഞത് 15 പേർ മരിച്ചതായാണ് പ്രാഥമിക വിവരം. വിമാനം ഹൈവേയിലെ ഒരു ഡസനോളം വാഹനങ്ങൾക്ക് മുകളിലൂടെ തെന്നിനീങ്ങിയത് ദുരന്തത്തിന്റെ വ്യാപ്തി വർദ്ധിപ്പിച്ചു.
അപകടസ്ഥലത്ത് വിമാനത്തിലുണ്ടായിരുന്ന കറൻസി നോട്ടുകൾ ചിതറിക്കിടക്കുന്നത് വലിയ പരിഭ്രാന്തിക്കും തിരക്കിനും കാരണമായി. ചിതറിയ നോട്ടുകൾ ശേഖരിക്കാൻ ജനങ്ങൾ തടിച്ചുകൂടിയതോടെ ഇവരെ നിയന്ത്രിക്കാൻ പോലീസിന് ബലം പ്രയോഗിക്കേണ്ടി വന്നു. എന്നാൽ, ഈ നോട്ടുകൾ പ്രചാരത്തിൽ വരാത്തവയായതിനാൽ നിലവിൽ നിയമസാധുതയില്ലെന്ന് ബൊളീവിയൻ സെൻട്രൽ ബാങ്ക് പ്രസിഡന്റ് ഡേവിഡ് എസ്പിനോസ വ്യക്തമാക്കി. സീരിയൽ നമ്പറുകൾ പോലും പതിപ്പിക്കാത്ത നോട്ടുകളാണ് ലാ പാസിലേക്ക് കൊണ്ടുപോയിരുന്നതെന്നും അദ്ദേഹം അറിയിച്ചു.
Also Read: പാകിസ്ഥാനിൽ താലിബാന്റെ അപ്രതീക്ഷിത വ്യോമാക്രമണം
സാന്താക്രൂസിൽ നിന്നാണ് ചരക്കുമായി വിമാനം എത്തിയതെന്ന് വ്യോമസേന ജനറൽ സെർജിയോ ലോറ സ്ഥിരീകരിച്ചു. വിമാനത്തിലുണ്ടായിരുന്ന ആറ് ജീവനക്കാരിൽ രണ്ട് പേരെ കണ്ടെത്താനായിട്ടില്ല. മരിച്ചവർ വിമാനത്തിനുള്ളിൽ ഉള്ളവരാണോ അതോ റോഡിലെ വാഹനങ്ങളിൽ ഉണ്ടായിരുന്നവരാണോ എന്ന കാര്യത്തിൽ വ്യക്തത വരാനുണ്ട്. അപകടത്തെത്തുടർന്ന് എൽ ആൾട്ടോ വിമാനത്താവളത്തിലേക്കുള്ള വിമാന സർവീസുകൾ താൽക്കാലികമായി നിർത്തിവച്ചു. സംഭവത്തിൽ സർക്കാർ ഉന്നതതല അന്വേഷണത്തിന് ഉത്തരവിട്ടിട്ടുണ്ട്.
The post ബൊളീവിയയിൽ കറൻസി നോട്ടുകളുമായി വന്ന വിമാനം തകർന്നു വീണു; 15 മരണം appeared first on Express Kerala.