പശ്ചിമേഷ്യയിലെ നിലവിലെ അടിയന്തര സാഹചര്യം പരിഗണിച്ച് ഖത്തറിലെ പൗരന്മാർക്കും പ്രവാസികൾക്കും ആഭ്യന്തര മന്ത്രാലയം അതീവ ജാഗ്രതാ നിർദ്ദേശം നൽകി. അനാവശ്യമായ യാത്രകൾ ഒഴിവാക്കി ജനങ്ങൾ വീടുകൾക്കുള്ളിൽ തന്നെ കഴിയണമെന്നും ജനാലകൾക്കും വാതിലുകൾക്കും സമീപം നിൽക്കരുതെന്നും മന്ത്രാലയം നിർദ്ദേശിച്ചു. കുട്ടികളുടെ കാര്യത്തിൽ രക്ഷിതാക്കൾ പ്രത്യേക ശ്രദ്ധ പുലർത്തണം. സർക്കാർ നൽകുന്ന ഔദ്യോഗിക ‘ഏർളി വാണിംഗ് സിസ്റ്റം’ വഴിയുള്ള മൊബൈൽ അലേർട്ടുകൾ കൃത്യമായി പിന്തുടരാനും അധികൃതർ ആവശ്യപ്പെട്ടു.
റോഡുകളിലോ പൊതുസ്ഥലങ്ങളിലോ സംശയാസ്പദമായ വസ്തുക്കളോ അവശിഷ്ടങ്ങളോ കണ്ടാൽ യാതൊരു കാരണവശാലും സ്പർശിക്കരുത്. ഇത്തരം സാഹചര്യങ്ങളിൽ ഉടൻ തന്നെ 999 എന്ന നമ്പറിൽ വിവരം അറിയിക്കണം. വ്യാജവാർത്തകൾ പ്രചരിപ്പിക്കുന്നത് ഖത്തറിൽ കടുത്ത നിയമനടപടികൾക്ക് കാരണമാകും. ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം വിശ്വസിക്കാനും സോഷ്യൽ മീഡിയ വഴിയുള്ള തെറ്റായ പ്രചാരണങ്ങളിൽ നിന്ന് വിട്ടുനിൽക്കാനും മന്ത്രാലയം മുന്നറിയിപ്പ് നൽകി.
Also Read: നാല് ദിവസം നീളുന്ന മഴ; റിയാദിൽ സുരക്ഷാ മുൻകരുതലുകൾ ശക്തമാക്കി അധികൃതർ
അപകടസ്ഥലങ്ങളിൽ കൂട്ടംകൂടി നിൽക്കുന്നതും രക്ഷാപ്രവർത്തനങ്ങളുടെ ദൃശ്യങ്ങൾ പകർത്തി സോഷ്യൽ മീഡിയയിൽ പങ്കുവെക്കുന്നതും കർശനമായി നിരോധിച്ചിട്ടുണ്ട്. ഇത് ഉദ്യോഗസ്ഥരുടെ പ്രവർത്തനങ്ങളെ തടസ്സപ്പെടുത്തുന്നതിനാൽ ഇത്തരം പ്രവൃത്തികൾ ചെയ്യുന്നവർ കടുത്ത ശിക്ഷാനടപടികൾ നേരിടേണ്ടി വരും. നേരിട്ടുള്ള സന്ദർശനങ്ങൾ ഒഴിവാക്കി മെട്രാഷ് 2 ആപ്പ് വഴി സേവനങ്ങൾ ഉപയോഗപ്പെടുത്തണമെന്നും, രാജ്യത്തെ നിയമങ്ങൾ പാലിച്ച് ഇന്ത്യൻ കമ്മ്യൂണിറ്റി ഉൾപ്പെടെയുള്ളവർ അധികൃതരുമായി സഹകരിക്കണമെന്നും മന്ത്രാലയം അഭ്യർത്ഥിച്ചു.
The post ഖത്തറിൽ സുരക്ഷാ ജാഗ്രത! പ്രവാസികൾക്കും പൗരന്മാർക്കും കർശന നിർദ്ദേശങ്ങളുമായി ആഭ്യന്തര മന്ത്രാലയം appeared first on Express Kerala.
