പശ്ചിമേഷ്യൻ സംഘർഷം രൂക്ഷമായ സാഹചര്യത്തിൽ ചരക്കുനീക്കം വലിയ പ്രതിസന്ധിയിലായതോടെ അബുദാബിയിൽ നിന്ന് കൊച്ചിയിലേക്ക് ഇന്ന് പ്രത്യേക കാർഗോ വിമാനം എത്തും. സാധാരണയായി യാത്രാവിമാനങ്ങളിലാണ് ചരക്കുകൾ കൊണ്ടുപോകാറുള്ളതെങ്കിലും, പച്ചക്കറികൾ മാത്രം എത്തിക്കുന്നതിനായാണ് ഈ പ്രത്യേക വിമാനം ക്രമീകരിച്ചിരിക്കുന്നത്. കൊച്ചിയിൽ നിന്നുള്ള മൊത്തം ചരക്കുനീക്കം നിലവിൽ 60 ശതമാനത്തോളം കുറഞ്ഞതായി വിമാനത്താവള അധികൃതർ വ്യക്തമാക്കി. പച്ചക്കറികൾ കാർഗോയിലേക്ക് എത്തിക്കുന്നതിന് സിയാൽ നിയന്ത്രണം ഏർപ്പെടുത്തിയിട്ടുണ്ടെന്നും ഈ പ്രതിസന്ധി മറികടക്കാൻ ഇനിയും സമയമെടുക്കുമെന്നും കാർഗോ വിഭാഗം മേധാവി സതീഷ് കുമാർ പൈ അറിയിച്ചു.
യുദ്ധസമാനമായ സാഹചര്യം കണക്കിലെടുത്ത് ഗൾഫ് മേഖലയിലെ ഈ മാസം 11 വരെയുള്ള എല്ലാ സിബിഎസ്ഇ പരീക്ഷകളും മാറ്റിവെച്ചിരിക്കുകയാണ്. നാളെ നടക്കേണ്ടിയിരുന്ന പന്ത്രണ്ടാം ക്ലാസ് പരീക്ഷയും ഇതിൽ ഉൾപ്പെടുന്നു. അതേസമയം, വ്യോമമേഖല ഭാഗികമായി തുറന്നതോടെ എയർ ഇന്ത്യ എക്സ്പ്രസ് ഉൾപ്പെടെയുള്ള വിമാന കമ്പനികൾ മസ്ക്കത്തിലേക്കും മറ്റും കൂടുതൽ സർവീസുകളും റിലീഫ് ഫ്ലൈറ്റുകളും ആരംഭിച്ചിട്ടുണ്ട്. ദുബായ്, റാസ് അൽ ഖൈമ എന്നിവിടങ്ങളിൽ നിന്ന് കേരളത്തിലേക്കും പ്രധാന ഇന്ത്യൻ നഗരങ്ങളിലേക്കും അധിക സർവീസുകൾ ലഭ്യമാണ്.
Also Read:തുരങ്കപാതയുടെ പാറതുരക്കലിന് ഇന്ന് തുടക്കം, മുഖ്യമന്ത്രി സ്വിച്ച് ഓൺ നിർവ്വഹിക്കും
ഇറാൻ്റെ പ്രത്യാക്രമണ ശേഷി കുറഞ്ഞെന്ന അമേരിക്കൻ വാദങ്ങൾ നിലനിൽക്കെത്തന്നെ ബഹ്റൈനിലെ മനാമയിലും കുവൈത്തിലും ഇറാൻ ആക്രമണം നടത്തിയതായി റിപ്പോർട്ടുകൾ സൂചിപ്പിക്കുന്നു. ബഹ്റൈനിൽ ഒരു ഹോട്ടലും രണ്ട് അപ്പാർട്ട്മെൻ്റുകളും ലക്ഷ്യമിട്ടായിരുന്നു ആക്രമണം. സൗദിയിലെ പ്രിൻസ് സുൽത്താൻ എയർ ബേസിനു നേരെ ഉണ്ടായ മിസൈൽ ആക്രമണം സൗദി സൈന്യം തടയുകയും ചെയ്തു.
The post പശ്ചിമേഷ്യൻ യുദ്ധം! ചരക്കുനീക്കം നിലച്ചു; കൊച്ചിയിലേക്ക് പ്രത്യേക കാർഗോ വിമാനം appeared first on Express Kerala.
