ക്രിക്കറ്റ് ലോകം കാത്തിരുന്ന ഐസിസി ട്വന്റി-20 ലോകകപ്പിന്റെ കലാശപ്പോരിന് അഹമ്മദാബാദ് ഒരുങ്ങുന്നു. നാളെ വൈകിട്ട് ഏഴ് മണിക്ക് നടക്കുന്ന ആവേശകരമായ ഫൈനലിൽ ഇന്ത്യ കരുത്തരായ ന്യൂസിലൻഡിനെ നേരിടും. ഐസിസി നോക്കൗട്ടുകളിൽ ഇന്ത്യക്ക് എന്നും വെല്ലുവിളി ഉയർത്തിയിട്ടുള്ള ചരിത്രമാണ് കിവീസിനുള്ളത്. 2019 ഏകദിന ലോകകപ്പ് സെമിയിലെ ധോണിയുടെ റണ്ണൗട്ടും, ഐസിസി ടെസ്റ്റ് ചാമ്പ്യൻഷിപ്പ് ഫൈനലിലെ പരാജയവും ആരാധകരുടെ മനസ്സിൽ ഇന്നും മായാതെ നിൽക്കുന്നുണ്ട്. എങ്കിലും, ചാമ്പ്യൻസ് ട്രോഫി ഫൈനലിലും 2023 ഏകദിന ലോകകപ്പ് സെമിയിലും മുഹമ്മദ് ഷമിയുടെയും രോഹിത് ശർമ്മയുടെയും മികവിൽ കിവീസിനെ വീഴ്ത്തിയ ആത്മവിശ്വാസം ഇന്ത്യൻ നിരയ്ക്കുണ്ട്.
Also Read: ‘ബുംറയും മനുഷ്യനാണ്, പിഴവുകൾ സംഭവിക്കാം’; ഇന്ത്യയ്ക്ക് മുന്നറിയിപ്പുമായി ഗ്ലെൻ ഫിലിപ്സ്
ട്വന്റി-20 ലോകകപ്പിന്റെ ചരിത്രം പരിശോധിച്ചാൽ ഇന്ത്യക്ക് മേൽ ന്യൂസിലൻഡിന് വ്യക്തമായ മേൽക്കൈയുണ്ട്. ഇതുവരെ മൂന്ന് തവണ ഏറ്റുമുട്ടിയപ്പോഴും വിജയം കിവീസിനൊപ്പമായിരുന്നു. 2007-ൽ പത്ത് റൺസിനും, 2016-ൽ 47 റൺസിനും, ഒടുവിൽ 2021-ൽ എട്ട് വിക്കറ്റിനും ഇന്ത്യ പരാജയപ്പെട്ടു. ഈ ലോകകപ്പിൽ അഹമ്മദാബാദിൽ വച്ച് ദക്ഷിണാഫ്രിക്കയോട് ഏറ്റുവാങ്ങിയ ഏക തോൽവി മാറ്റിനിർത്തിയാൽ ഇന്ത്യ മികച്ച ഫോമിലാണ്. സെമിയിൽ ഇംഗ്ലണ്ടിനെ ഏഴ് റണ്ണിന് മറികടന്നാണ് ഇന്ത്യ ഫൈനലിലെത്തിയത്. മറുവശത്ത് ദക്ഷിണാഫ്രിക്കയെ ഒൻപത് വിക്കറ്റിന് തകർത്തെറിഞ്ഞാണ് ന്യൂസിലൻഡ് കിരീടപ്പോരാട്ടത്തിന് യോഗ്യത നേടിയത്.
ഇന്ത്യ കിരീടം നിലനിർത്താൻ ലക്ഷ്യമിടുമ്പോൾ, തങ്ങളുടെ കന്നി ട്വന്റി-20 ലോകകപ്പ് ട്രോഫിയാണ് കിവീസ് സ്വപ്നം കാണുന്നത്. മലയാളി താരം സഞ്ജു സാംസണും പേസ് ബൗളർ ജസ്പ്രീത് ബുംറയുമാണ് ഇന്ത്യൻ നിരയിൽ ഏവരും ഉറ്റുനോക്കുന്ന പ്രധാന താരങ്ങൾ. ഫൈനലിന് മുന്നോടിയായുള്ള പരിശീലന സെഷനുകൾ ഇന്ന് നടക്കും; ന്യൂസിലൻഡ് ഉച്ചയ്ക്കും ഇന്ത്യ വൈകിട്ടുമാണ് പരിശീലനത്തിനിറങ്ങുക. തുടർന്ന് നടക്കുന്ന വാർത്താ സമ്മേളനത്തിൽ ഇരു ടീമുകളുടെയും പ്രതിനിധികൾ പങ്കെടുക്കും. അഹമ്മദാബാദിലെ മണ്ണിൽ കിവീസ് ശാപം മറികടന്ന് ഇന്ത്യ കിരീടമുയർത്തുമോ എന്ന ആകാംക്ഷയിലാണ് കായികലോകം.
The post കിവീസ് ചില്ലറക്കാരല്ല! ലോകകപ്പ് ഫൈനലിൽ ഇന്ത്യക്ക് മുന്നിൽ ന്യൂസിലൻഡ് എന്ന വൻമതിൽ; ചരിത്രം തിരുത്താൻ രോഹിതും കൂട്ടരും appeared first on Express Kerala.
