സംസ്ഥാനത്തെ ചെറുകിട-നാമമാത്ര കർഷകർക്ക് കൈത്താങ്ങായി പെൻഷൻ പദ്ധതി വിപുലീകരിക്കാൻ മന്ത്രിസഭാ യോഗം തീരുമാനിച്ചു. 2021-ന് ശേഷം 60 വയസ് തികഞ്ഞ 10,115 കർഷകർക്ക് കൂടി പ്രതിമാസം 2,000 രൂപ വീതം പെൻഷൻ നൽകാനാണ് തീരുമാനം. ഇതിനായി 24.276 കോടി രൂപ സർക്കാർ വകയിരുത്തി. നിലവിൽ പദ്ധതിയുടെ ആനുകൂല്യം ലഭിക്കുന്ന 6,201 കർഷകർക്ക് പുറമെയാണ് പുതുതായി ഇത്രയും പേരെ കൂടി ഉൾപ്പെടുത്തുന്നത്. ഇതോടെ സംസ്ഥാനത്തെ ആയിരക്കണക്കിന് കർഷക കുടുംബങ്ങൾക്ക് കൂടുതൽ സാമ്പത്തിക ഭദ്രത ഉറപ്പാക്കാൻ സാധിക്കുമെന്നാണ് വിലയിരുത്തൽ.
പുതിയ അപേക്ഷകർക്ക് പുറമെ, കൃഷിവകുപ്പ് ഡയറക്ടർ സമർപ്പിച്ച 2,225 കർഷകരുടെ അപേക്ഷകൾ കൂടി അടിയന്തരമായി പരിശോധിച്ച് തീരുമാനമെടുക്കാൻ കൃഷി വകുപ്പ് പ്രിൻസിപ്പൽ സെക്രട്ടറിയെ ചുമതലപ്പെടുത്തിയിട്ടുണ്ട്. അർഹരായ മുഴുവൻ കർഷകർക്കും സമയബന്ധിതമായി പെൻഷൻ എത്തിക്കുക എന്ന ലക്ഷ്യത്തോടെയാണ് സർക്കാർ ഈ നടപടികൾ സ്വീകരിച്ചിരിക്കുന്നത്. കൃഷിക്കാരെ ചേർത്തുപിടിക്കുന്നതിന്റെ ഭാഗമായി നടപ്പിലാക്കുന്ന ഈ പദ്ധതി കൂടുതൽ ഗുണഭോക്താക്കളിലേക്ക് എത്തുന്നതോടെ ഗ്രാമീണ മേഖലയിലെ സാമ്പത്തികാവസ്ഥയ്ക്ക് വലിയ കരുത്താകും.
The post കർഷകർക്ക് ആശ്വാസം! പതിനായിരത്തിലധികം പേർക്ക് കൂടി 2,000 രൂപ പെൻഷൻ അനുവദിക്കാൻ സർക്കാർ appeared first on Express Kerala.
