പാചകവാതക പ്രതിസന്ധി പരിഹരിക്കാൻ കേന്ദ്ര ഗവൺമെൻ്റും പെട്രോളിയം സഹമന്ത്രി സുരേഷ് ഗോപിയും മുന്നോട്ട് വരണം : കേരള മഹിളാസംഘം

ഇരിങ്ങാലക്കുട : സംസ്ഥാനത്തുടനീളം വർദ്ധിച്ചു വരുന്ന പാചകവാതക ക്ഷാമവും വില വർദ്ധനയും തുടർന്നുള്ള കരിഞ്ചന്തയും പൂഴ്ത്തിവയ്പ്പും മൂലം വീട്ടമ്മമാർ, കുഞ്ഞുങ്ങളുടെ സ്കൂൾ ഉച്ചക്കഞ്ഞി വിതരണ സംവിധാനം, ഹോട്ടൽ, തട്ടുകടകൾ, ഗവ. ആശുപത്രി കാന്റീനുകൾ, സിവിൽ സർവ്വീസ് കാന്റീനുകൾ ഉൾപ്പെടെ മലയാളികളുടെ സമസ്ത ഭക്ഷ്യ ലഭ്യതാ സംവിധാനങ്ങളും ദിനംപ്രതി കൂടുതൽ കൂടുതൽ താറുമാറായിക്കൊണ്ടിരിക്കുന്ന സാഹചര്യത്തിൽ പ്രതിസന്ധി പരിഹരിക്കാൻ കേന്ദ്ര ഗവൺമെന്റും പെട്രോളിയം സഹമന്ത്രി സുരേഷ് ഗോപിയും മുന്നോട്ട് വരണമെന്ന് കേരള മഹിളാസംഘം ഇരിങ്ങാലക്കുട മണ്ഡലം കൺവെൻഷൻ പ്രമേയത്തിലൂടെ ആവശ്യപ്പെട്ടു.

കൺവെൻഷൻ സംസ്ഥാന വൈസ് പ്രസിഡന്റ് എം. സ്വർണ്ണലത ഉദ്ഘാടനം ചെയ്തു.

മണ്ഡലം പ്രസിഡന്റ് സുമതി തിലകൻ അധ്യക്ഷത വഹിച്ചു.

സിപിഐ ജില്ലാ എക്സിക്യൂട്ടീവ് അംഗം പി. മണി, മണ്ഡലം സെക്രട്ടറി ഉദയപ്രകാശ്, സംസ്ഥാന കമ്മറ്റി അംഗം ജയന്തി സുരേന്ദ്രൻ, മഹിളാസംഘം മണ്ഡലം സെക്രട്ടറി അൽഫോൻസ തോമസ്, പ്രിയ സുനിൽ എന്നിവർ പ്രസംഗിച്ചു.