ആണവായുധം വെറും പുകമറ! അമേരിക്കയെ യുദ്ധത്തിലേക്ക് തള്ളിയിട്ടത് നെതന്യാഹു; ജോസഫ് കെന്റ്

ഇറാനെതിരെയുള്ള അമേരിക്കയുടെ സൈനിക നീക്കങ്ങൾക്ക് പിന്നിൽ ഇസ്രയേലിന്റെ കടുത്ത സമ്മർദ്ദമാണെന്ന് മുൻ അമേരിക്കൻ ഭീകരവിരുദ്ധ സമിതി മേധാവി ജോസഫ് കെന്റ് നേരത്തെ വെളിപ്പെടുത്തിയിരുന്നു. ഇപ്പോഴിതാ ഇറാന്റെ പക്കൽ ആണവായുധങ്ങൾ ഉണ്ടെന്ന പ്രസിഡന്റ് ഡോണൾഡ് ട്രംപിന്റെ വാദം പൂർണ്ണമായും തെറ്റാണെന്നും ഈ യുദ്ധം അമേരിക്കയെ അനാവശ്യമായി തള്ളിവിട്ടതാണെന്നും അദ്ദേഹം ആരോപിച്ചു. പ്രശസ്ത പോഡ്കാസ്റ്റർ ടക്കർ കാൾസണുമായുള്ള അഭിമുഖത്തിലാണ്, തന്റെ രാജിക്ക് പിന്നിലെ യഥാർത്ഥ കാരണങ്ങൾ കെന്റ് വെളിപ്പെടുത്തിയത്.

ഇറാനെതിരെ നടപടിയെടുക്കാനുള്ള തീരുമാനത്തിലേക്ക് അമേരിക്കയെ നയിച്ചത് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ സർക്കാരാണെന്ന് കെന്റ് കുറ്റപ്പെടുത്തി. ഈ നീക്കം വലിയൊരു സംഘർഷ പരമ്പരയ്ക്ക് തുടക്കമിടുമെന്നും ഇറാൻ തിരിച്ചടിക്കുമെന്നും വ്യക്തമായ ബോധ്യത്തോടെയാണ് ട്രംപ് ഭരണകൂടം മുന്നോട്ട് പോയത്. ഫെബ്രുവരി 28-ന് നടന്ന ആക്രമണങ്ങൾ ദേശീയ സുരക്ഷയെ മുൻനിർത്തിയാണെന്ന് ട്രംപ് അവകാശപ്പെടുമ്പോഴും, ഇറാൻ ആണവായുധ നിർമ്മാണത്തിന്റെ അടുത്തെങ്ങും എത്തിയിരുന്നില്ലെന്ന് കെന്റ് സാക്ഷ്യപ്പെടുത്തുന്നു. 2004 മുതൽ ഇറാൻ പുറപ്പെടുവിച്ചിട്ടുള്ള മതപരമായ വിലക്ക് ലംഘിക്കപ്പെട്ടതായി യാതൊരു രഹസ്യാന്വേഷണ റിപ്പോർട്ടുകളും ലഭിച്ചിട്ടില്ലെന്നും അദ്ദേഹം കൂട്ടിച്ചേർത്തു.

Also Read:അഞ്ച് രാജ്യങ്ങളിൽ നിന്ന് അമേരിക്കയ്ക്ക് ആണവഭീഷണി; 2035-ഓടെ മിസൈലുകളുടെ എണ്ണം 16,000 കടക്കുമെന്ന് റിപ്പോർട്ട്

ഇറാന്റെ പരമോന്നത നേതാവ് ആയത്തുള്ള അലി ഖമേനിയുടെ വധം അമേരിക്കയ്ക്ക് ഗുണകരമായില്ലെന്നും, പകരം അവിടെയുള്ള തീവ്രവാദികളെ കൂടുതൽ കരുത്തരാക്കുകയാണ് ചെയ്തതെന്നും കെന്റ് നിരീക്ഷിക്കുന്നു. അതേസമയം, കെന്റിന്റെ ആരോപണങ്ങളെ വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റ് ശക്തമായി നിഷേധിച്ചു. പ്രസിഡന്റ് ട്രംപ് വിദേശ ശക്തികളുടെ സ്വാധീനത്തിലല്ല പ്രവർത്തിക്കുന്നതെന്നും, ലോകത്തിലെ ഏറ്റവും ശക്തനായ നേതാവ് എന്ന നിലയിൽ അമേരിക്കയുടെ താൽപ്പര്യങ്ങൾ സംരക്ഷിക്കാനാണ് അദ്ദേഹം തീരുമാനങ്ങൾ എടുക്കുന്നതെന്നും വൈറ്റ് ഹൗസ് വ്യക്തമാക്കി.

The post ആണവായുധം വെറും പുകമറ! അമേരിക്കയെ യുദ്ധത്തിലേക്ക് തള്ളിയിട്ടത് നെതന്യാഹു; ജോസഫ് കെന്റ് appeared first on Express Kerala.