‘അദ്ദേഹത്തിന്റെ രക്തത്തിന് വലിയ വില നൽകേണ്ടി വരും’; ഇസ്രയേലിനും അമേരിക്കയ്ക്കും മുന്നറിയിപ്പുമായി മുജ്തബ ഖമേനി

അമേരിക്കയും ഇസ്രയേലും നടത്തിയ സംയുക്താക്രമണത്തിൽ സുരക്ഷാ ഉദ്യോഗസ്ഥൻ അലി ലാരിജാനിയുടെ മരണത്തിൽ കടുത്ത തിരിച്ചടി നൽകുമെന്ന് ഇറാന്റെ പരമോന്നത നേതാവ് മുജ്തബ ഖമേനി. അലി ലാരിജാനിയുടെ രക്തത്തിന് അപരാധികൾ ഉടൻതന്നെ വലിയ വില നൽകേണ്ടി വരുമെന്ന് അദ്ദേഹം മുന്നറിയിപ്പ് നൽകി. രാജ്യത്തിന്റെ സുരക്ഷാ-രാഷ്ട്രീയ മേഖലകളിൽ നിർണ്ണായക സ്വാധീനമുള്ള ലാരിജാനിയുടെ മരണം ഇറാന് വലിയ നഷ്ടമാണെങ്കിലും, തങ്ങളുടെ പോരാട്ടവും യുദ്ധനടപടികളും ഒട്ടും തളരാതെ തുടരുമെന്ന് ഇറാൻ ഭരണകൂടം വ്യക്തമാക്കി.

ഇറാനിലെ സുരക്ഷാ സംവിധാനങ്ങളെയും രാഷ്ട്രീയ നേതൃത്വത്തെയും തമ്മിൽ ബന്ധിപ്പിക്കുന്ന പ്രധാന കണ്ണിയായിരുന്നു അലി ലാരിജാനി. ഇസ്ലാമിക് റെവല്യൂഷണറി ഗാർഡ് കോറുമായുള്ള അടുത്ത ബന്ധവും ഭരണതലത്തിലെ ദീർഘകാല അനുഭവപരിചയവും അദ്ദേഹത്തെ ഭരണകൂടത്തിന്റെ കരുത്തുറ്റ തൂണുകളിലൊന്നായി മാറ്റിയിരുന്നു. അതുകൊണ്ടുതന്നെ, ലാരിജാനിയുടെ വധം ഇതുവരെയുണ്ടായ ആക്രമണങ്ങളിൽ വെച്ച് ഏറ്റവും വലിയ ആഘാതമായാണ് കണക്കാക്കപ്പെടുന്നത്. ഇറാൻ രാഷ്ട്രീയത്തിലെ വിവിധ അധികാരകേന്ദ്രങ്ങൾക്കിടയിൽ ഒരു പാലമായി പ്രവർത്തിച്ചിരുന്ന അദ്ദേഹത്തിന്റെ അഭാവം വരുംദിവസങ്ങളിൽ ഇറാന്റെ നിർണ്ണായക തീരുമാനങ്ങളെ ബാധിച്ചേക്കാം.

Also Read: അമേരിക്ക-ഇസ്രയേൽ-ഇറാൻ യുദ്ധത്തിൽ ആരാണ് വിജയിക്കുന്നത്; എങ്ങനെ അവസാനിക്കും?

ലാരിജാനിയുടെ വധത്തോടെ യുദ്ധം കൂടുതൽ അപകടകരമായ മറ്റൊരു തലത്തിലേക്ക് മാറിയിരിക്കുകയാണ്. ഉന്നത സൈനിക കമാൻഡർമാരെ ലക്ഷ്യമിട്ടിരുന്ന ആക്രമണങ്ങൾ ഇപ്പോൾ രാജ്യത്തെ പ്രധാന രാഷ്ട്രീയ-സുരക്ഷാ ഉദ്യോഗസ്ഥരിലേക്കും വ്യാപിച്ചിരിക്കുന്നു. രാജ്യത്തിന്റെ ഉന്നത നേതൃത്വത്തെ തകർക്കുക എന്ന ലക്ഷ്യത്തോടെ ശത്രുക്കൾ നടത്തുന്ന ഇത്തരം നീക്കങ്ങൾ മേഖലയിലെ ഭൗമരാഷ്ട്രീയ സാഹചര്യം കൂടുതൽ സങ്കീർണ്ണമാക്കുകയാണ്. യുദ്ധത്തിന്റെ നിർണ്ണായക ഘട്ടത്തിൽ ലാറിജാനിയെ നഷ്ടപ്പെട്ടത് ഇറാന്റെ പ്രതിരോധ തന്ത്രങ്ങളിൽ വലിയ മാറ്റങ്ങൾക്ക് കാരണമായേക്കാം.

അതേസമയം, ഒരു വ്യക്തിയുടെ അഭാവം രാജ്യത്തിന്റെ രാഷ്ട്രീയ-സാമ്പത്തിക ഘടനയെ ബാധിക്കില്ലെന്ന് ഇറാന്റെ വിദേശകാര്യ മന്ത്രി സയ്യിദ് അബ്ബാസ് അരാഗ്ചി പ്രതികരിച്ചു. രാജ്യത്തെ യുദ്ധത്തിലേക്ക് വലിച്ചിഴച്ചതിനും മാനുഷികവും സാമ്പത്തികവുമായ പ്രത്യാഘാതങ്ങൾക്കും ഉത്തരവാദി അമേരിക്ക ആണെന്ന് അദ്ദേഹം കുറ്റപ്പെടുത്തി. ഇറാനിലെ നിലവിലെ രാഷ്ട്രീയ വ്യവസ്ഥയ്ക്ക് യാതൊരു മാറ്റവും സംഭവിച്ചിട്ടില്ലെന്നും ഭരണകൂടം ഒറ്റക്കെട്ടായി മുന്നോട്ട് പോകുമെന്നും അദ്ദേഹം മാധ്യമങ്ങളോട് വ്യക്തമാക്കി.

The post ‘അദ്ദേഹത്തിന്റെ രക്തത്തിന് വലിയ വില നൽകേണ്ടി വരും’; ഇസ്രയേലിനും അമേരിക്കയ്ക്കും മുന്നറിയിപ്പുമായി മുജ്തബ ഖമേനി appeared first on Express Kerala.