സൗദിയിൽ ഏപ്രിലിലും കനത്ത മഴ തുടരും? ജാഗ്രതാ നിർദ്ദേശവുമായി കാലാവസ്ഥാ നിരീക്ഷണ കേന്ദ്രം

സൗദി അറേബ്യയിൽ വരാനിരിക്കുന്ന ഏപ്രിൽ മാസത്തിൽ സാധാരണ ലഭിക്കുന്നതിനേക്കാൾ കൂടുതൽ മഴ ലഭിക്കാൻ സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. രാജ്യത്ത് മഴക്കാലം അതിന്റെ ഉച്ചസ്ഥായിയിലെത്തുന്നത് ഏപ്രിലിലാണെന്നും ഇത്തവണ മിക്ക പ്രദേശങ്ങളിലും ശരാശരിയിലും കൂടുതൽ മഴയ്ക്ക് സാധ്യതയുണ്ടെന്നും വക്താവ് ഹുസൈൻ അൽ ഖഹ്താനി വ്യക്തമാക്കി. മഴയോടൊപ്പം തന്നെ ചിലയിടങ്ങളിൽ താപനില സാധാരണയേക്കാൾ ഒരു ഡിഗ്രി സെൽഷ്യസ് വരെ വർദ്ധിക്കാനും സാധ്യത പ്രവചിക്കപ്പെടുന്നുണ്ട്.

ജിസാൻ, അസീർ പ്രവിശ്യകളിൽ അതിശക്തമായ മഴയ്ക്കാണ് സാധ്യത. വരും ദിവസങ്ങളിലും രാജ്യത്തിന്റെ വിവിധ ഭാഗങ്ങളിൽ ഇടിമിന്നലോടു കൂടിയ മഴ തുടരുമെന്നതിനാൽ പൊതുജനങ്ങൾ അതീവ ജാഗ്രത പാലിക്കണമെന്ന് സിവിൽ ഡിഫൻസ് ഡയറക്ടറേറ്റ് നിർദ്ദേശിച്ചു. താഴ്ന്ന പ്രദേശങ്ങളിലെ വെള്ളക്കെട്ടുകളിൽ നിന്നും താഴ്വരകളിൽ നിന്നും വിട്ടുനിൽക്കണമെന്നും ഔദ്യോഗിക മാധ്യമങ്ങളിലൂടെ നൽകുന്ന നിർദ്ദേശങ്ങൾ കർശനമായി പാലിക്കണമെന്നും അധികൃതർ ഓർമ്മിപ്പിച്ചു. മഴവെള്ളപ്പാച്ചിലിലോ വെള്ളക്കെട്ടുകളിലോ നീന്താൻ ശ്രമിക്കരുതെന്നും കർശനമായ മുന്നറിയിപ്പുണ്ട്.

Also Read: ശരീരസൗന്ദര്യം വർധിപ്പിക്കാൻ വ്യാജ മരുന്നുകൾ വിറ്റു; സൗദിയിൽ ജിം പരിശീലകർ പിടിയിൽ

തലസ്ഥാനമായ റിയാദ് ഉൾപ്പെടെയുള്ള വിവിധ പ്രവിശ്യകളിൽ വരും ദിവസങ്ങളിൽ നേരിയതോ മിതമായതോ ആയ മഴ പ്രതീക്ഷിക്കാം. മക്ക, ത്വാഇഫ്, അൽ ബാഹ തുടങ്ങിയിടങ്ങളിൽ മഴയ്‌ക്കൊപ്പം ആലിപ്പഴ വർഷത്തിനും ശക്തമായ കാറ്റിനും സാധ്യതയുണ്ട്. കിഴക്കൻ പ്രവിശ്യയിലും വടക്കൻ അതിർത്തി മേഖലകളിലും ശക്തമായ കാറ്റും പൊടിപടലങ്ങളും ഉണ്ടായേക്കാം. വരും വ്യാഴാഴ്ച വരെ മഴ സാഹചര്യം തുടരുമെന്നാണ് നിലവിലെ റിപ്പോർട്ടുകൾ സൂചിപ്പിക്കുന്നത്.

The post സൗദിയിൽ ഏപ്രിലിലും കനത്ത മഴ തുടരും? ജാഗ്രതാ നിർദ്ദേശവുമായി കാലാവസ്ഥാ നിരീക്ഷണ കേന്ദ്രം appeared first on Express Kerala.