കരയുദ്ധത്തിനൊരുങ്ങി അമേരിക്ക! പശ്ചിമേഷ്യയിൽ പാരാട്രൂപ്പുകൾ ഇറങ്ങി; ഇറാന്റെ ആണവ-ഔഷധ കേന്ദ്രങ്ങളിൽ ശക്തമായ ആക്രമണം

ഇറാൻ-അമേരിക്കൻ യുദ്ധം അതിനിർണ്ണായകമായ ഘട്ടത്തിലേക്ക്. ഇറാന്റെ തന്ത്രപ്രധാനമായ ആണവ കേന്ദ്രത്തിന് പുറമെ, രാജ്യത്തെ ഏറ്റവും വലിയ മരുന്ന് നിർമ്മാണ കമ്പനിക്ക് നേരെയും അമേരിക്കൻ -ഇസ്രയേൽ സഖ്യം കടുത്ത വ്യോമാക്രമണം നടത്തി. ഇതിനിടെ, അമേരിക്കയുടെ അത്യാധുനിക പാരാട്രൂപ്പുകൾ പശ്ചിമേഷ്യയിൽ വിന്യസിക്കപ്പെട്ടത് സമ്പൂർണ്ണ കരയുദ്ധത്തിന്റെ സൂചനയായി വിലയിരുത്തപ്പെടുന്നു.

മധ്യ ഇറാൻ നഗരമായ ഇസ്‌ഫഹാനിലെ ആണവ കേന്ദ്രത്തിന് നേരെ നടത്തിയ ആക്രമണത്തിന്റെ ദൃശ്യങ്ങൾ പ്രസിഡന്റ് ഡോണൾഡ് ട്രംപ് നേരിട്ട് പുറത്തുവിട്ടു. 60 ശതമാനം പരിശുദ്ധിയുള്ള 400 കിലോയോളം യുറേനിയം ഇവിടെ ശേഖരിച്ചിട്ടുണ്ടെന്നാണ് അമേരിക്കൻ രഹസ്യാന്വേഷണ വിഭാഗത്തിന്റെ നിഗമനം. കഴിഞ്ഞ ജൂണിലും ഇവിടം ആക്രമിക്കപ്പെട്ടിരുന്നു. ഇറാന്റെ ആരോഗ്യരംഗത്തെ നട്ടെല്ലായ ടോഫീക് ദാരു റിസർച്ച് ആൻഡ് എൻജിനീയറിങ് കമ്പനിക്ക് നേരെയാണ് മറ്റൊരു ആക്രമണം ഉണ്ടായത്. അർബുദ ചികിത്സയ്ക്കും അനസ്തീസിയയ്ക്കും ആവശ്യമായ മരുന്നുകൾ ഉൽപ്പാദിപ്പിക്കുന്ന ഈ കേന്ദ്രം തകർന്നത് ഉപരോധത്താൽ വലയുന്ന ഇറാനിൽ വൻ മരുന്ന് പ്രതിസന്ധിക്ക് കാരണമാകും.

Also Read: ഹോർമുസ് തൽക്കാലം വേണ്ട! ഇറാൻ യുദ്ധം ആറാഴ്ചയ്ക്കുള്ളിൽ അവസാനിപ്പിക്കാൻ ട്രംപിന്റെ ‘മാസ്റ്റർ പ്ലാൻ’

അമേരിക്കൻ കരസേനയുടെ കരുത്തുറ്റ വിഭാഗമായ 82-ാം എയർബോൺ ഡിവിഷനിലെ ആയിരക്കണക്കിന് പാരാട്രൂപ്പുകൾ പശ്ചിമേഷ്യയിൽ നിലയുറപ്പിച്ചു കഴിഞ്ഞു. ഇറാന്റെ പ്രധാന എണ്ണക്കയറ്റുമതി കേന്ദ്രമായ ഖാർഗ് ദ്വീപ് പിടിച്ചെടുക്കുക ആണ് ലക്ഷ്യം. സമാധാന കരാറിന് ഇറാൻ വഴങ്ങാത്ത പക്ഷം നേരിട്ടുള്ള ആക്രമണത്തിന് 2500 അമേരിക്കൻ മറീനുകളെ നേരത്തെ തന്നെ മേഖലയിൽ വിന്യസിച്ചിട്ടുണ്ട്.

അതേസമയം അമേരിക്കൻ നീക്കങ്ങൾക്ക് തിരിച്ചടിയായി ഇറാൻ എണ്ണക്കപ്പലുകൾക്ക് നേരെ ആക്രമണം തുടങ്ങി. ദുബായ് തീരത്ത് കുവൈത്തിന്റെ അൽ സാൽമി കപ്പലിന് നേരെ ഇറാൻ ഡ്രോൺ ആക്രമണം നടത്തി. നാവികർ സുരക്ഷിതരാണെങ്കിലും കപ്പലിന് കേടുപാടുകൾ സംഭവിച്ചു. ബഹ്‌റൈൻ, സൗദി അറേബ്യ എന്നിവിടങ്ങളിലെ യു.എസ് സൈനിക താവളങ്ങൾ ലക്ഷ്യമിട്ട് ഇറാൻ ബാലിസ്റ്റിക് മിസൈലുകളും ഡ്രോണുകളും അയച്ചു. തെക്കൻ ലെബനനിൽ ഹിസ്ബുള്ളയ്ക്കെതിരെയുള്ള പോരാട്ടത്തിനിടെ നാല് ഇസ്രയേൽ സൈനികർ കൊല്ലപ്പെട്ടു. ഇറാന്റെ ഡ്രോണുകൾ തകർക്കുന്നതിനിടെ അവശിഷ്ടങ്ങൾ വീണ് ദുബായിൽ നാല് പേർക്ക് പരിക്കേറ്റതായും റിപ്പോർട്ടുകളുണ്ട്.

The post കരയുദ്ധത്തിനൊരുങ്ങി അമേരിക്ക! പശ്ചിമേഷ്യയിൽ പാരാട്രൂപ്പുകൾ ഇറങ്ങി; ഇറാന്റെ ആണവ-ഔഷധ കേന്ദ്രങ്ങളിൽ ശക്തമായ ആക്രമണം appeared first on Express Kerala.