രണ്ട് പതിറ്റാണ്ടായി കോൺഗ്രസ് പ്രതിനിധികളില്ലാത്ത ജില്ലയായി കോഴിക്കോട് മാറിയിരിക്കുകയാണ്. 2001-ൽ പി. ശങ്കരനും എ. സുജനപാലനും വിജയിച്ചതിന് ശേഷം ജില്ലയിൽ നിന്ന് ഒരു കോൺഗ്രസ് എം.എൽ.എ പോലും നിയമസഭയിൽ എത്തിയിട്ടില്ല. 2021-ലെ തെരഞ്ഞെടുപ്പിൽ 13-ൽ 11 സീറ്റും എൽ.ഡി.എഫ് നേടിയപ്പോൾ, വടകരയിൽ ആർ.എം.പിയും കൊടുവള്ളിയിൽ മുസ്ലിം ലീഗും മാത്രമാണ് യു.ഡി.എഫിനായി വിജയിച്ചത്. എന്നാൽ 2025-ലെ തദ്ദേശ തെരഞ്ഞെടുപ്പിൽ 9 മണ്ഡലങ്ങളിലും മേധാവിത്വം നേടാനായത് യു.ഡി.എഫിന് വലിയ ആത്മവിശ്വാസം നൽകുന്നു.
1. വടകര
ടി.പി. ചന്ദ്രശേഖരൻ വധത്തിന് ശേഷം രാഷ്ട്രീയ ചിത്രം മാറിയ വടകരയിൽ ആർ.എം.പി നേതാവ് കെ.കെ. രമ തന്നെയാണ് യു.ഡി.എഫ് സ്ഥാനാർത്ഥി. എൽ.ഡി.എഫിനായി ആർ.ജെ.ഡി നേതാവ് എം.കെ. ഭാസ്കരനും എൻ.ഡി.എയ്ക്കായി കെ. ദിലീപും മത്സരരംഗത്തുണ്ട്.
2. കുറ്റ്യാടി
ഇഞ്ചോടിഞ്ച് പോരാട്ടം നടക്കുന്ന കുറ്റ്യാടിയിൽ സിറ്റിങ് എം.എൽ.എ കെ.പി. കുഞ്ഞമ്മദ് കുട്ടി (എൽ.ഡി.എഫ്) വീണ്ടും ജനവിധി തേടുന്നു. യു.ഡി.എഫിനായി മുസ്ലിം ലീഗിലെ പാറക്കൽ അബ്ദുള്ളയും എൻ.ഡി.എയ്ക്കായി രാംദാസ് മണലേരിയും മത്സരിക്കുന്നു.
3. നാദാപുരം
സി.പി.ഐയുടെ ഉറച്ച കോട്ടയായ നാദാപുരത്ത് ഇത്തവണ മഹിളാസംഘം സംസ്ഥാന പ്രസിഡന്റ് പി. വസന്തമാണ് എൽ.ഡി.എഫ് സ്ഥാനാർത്ഥി. യു.ഡി.എഫിനായി യൂത്ത് കോൺഗ്രസ് ദേശീയ സെക്രട്ടറി കെ.എം. അഭിജിത്തും ബി.ജെ.പിക്കായി സി.പി. വിപിൻ ചന്ദ്രനും രംഗത്തുണ്ട്.
4. കൊയിലാണ്ടി
ഒരുകാലത്ത് കോൺഗ്രസ് കോട്ടയായിരുന്ന കൊയിലാണ്ടിയിൽ മുൻ എം.എൽ.എ കെ. ദാസനെ എൽ.ഡി.എഫ് തിരികെ ഇറക്കുന്നു. യു.ഡി.എഫിനായി അഡ്വ. കെ. പ്രവീൺകുമാറും ബി.ജെ.പിക്കായി സി.ആർ. പ്രഫുൽകൃഷ്ണയും മാറ്റുരയ്ക്കുന്നു.
Also Read: ഹിന്ദു എംഎൽഎ വേണം; ഗുരുവായൂരിൽ വർഗീയ ചുവയുള്ള ഫ്ലക്സ് ബോർഡുകളുമായി ബി. ഗോപാലകൃഷ്ണൻ
5. പേരാമ്പ്ര
ഇടതുപക്ഷത്തിന്റെ കരുത്തുറ്റ മണ്ഡലത്തിൽ എൽ.ഡി.എഫ് കൺവീനർ ടി.പി. രാമകൃഷ്ണൻ നാലാമൂഴത്തിനിറങ്ങുന്നു. യു.ഡി.എഫ് സ്ഥാനാർത്ഥിയായി മുസ്ലിം യൂത്ത് ലീഗ് നേതാവ് ഫാത്തിമ തഹ്ലിയയും എൻ.ഡി.എയ്ക്കായി എം. മോഹനൻ മാസ്റ്ററും മത്സരിക്കുന്നു.
6. ബാലുശ്ശേരി (SC സംവരണം)
സി.പി.എമ്മിന്റെ ഉറച്ച സീറ്റായ ബാലുശ്ശേരിയിൽ സിറ്റിങ് എം.എ.ൽഎ കെ.എം. സച്ചിൻ ദേവ് (എൽ.ഡി.എഫ്) ജനവിധി തേടുന്നു. വി.ടി. സൂരജ് (യു.ഡി.എഫ്), സി.പി. സതീശൻ (എൻ.ഡി.എ) എന്നിവരാണ് മറ്റ് പ്രധാന സ്ഥാനാർത്ഥികൾ.
7. എലത്തൂർ
2011 മുതൽ എ.കെ. ശശീന്ദ്രന്റെ കൈവശമുള്ള മണ്ഡലമാണിത്. ഇത്തവണയും എ.കെ. ശശീന്ദ്രൻ (എൽ.ഡി.എഫ്) തന്നെ മത്സരിക്കുന്നു. കോൺഗ്രസിനായി വിദ്യ ബാലകൃഷ്ണനും ബി.ജെ.പിക്കായി ടി. ദേവദാസും രംഗത്തുണ്ട്.
8. കോഴിക്കോട് നോർത്ത്
സി.പി.എമ്മിന്റെ കുത്തക സീറ്റായ ഇവിടെ സിറ്റിങ് എം.എൽ.എ തോട്ടത്തിൽ രവീന്ദ്രൻ (എൽ.ഡി.എഫ്) വീണ്ടും മത്സരിക്കുന്നു. കെ. ജയന്ത് (യു.ഡി.എഫ്), നവ്യ ഹരിദാസ് (എൻ.ഡി.എ) എന്നിവരാണ് എതിരാളികൾ.
9. കോഴിക്കോട് സൗത്ത്
കഴിഞ്ഞ തവണ അട്ടിമറി വിജയം നേടിയ ഐ.എൻ.എല്ലിലെ അഹമ്മദ് ദേവർകോവിൽ (എൽ.ഡി.എഫ്) തന്നെ ഇത്തവണയും മത്സരിക്കുന്നു. മുസ്ലിം ലീഗിലെ ഫൈസൽ ബാബു (യു.ഡി.എഫ്), ടി. രണീഷ് (എൻ.ഡി.എ) എന്നിവരാണ് മറ്റ് സ്ഥാനാർത്ഥികൾ.
10. ബേപ്പൂർ
മന്ത്രി പി.എ. മുഹമ്മദ് റിയാസ് (എൽ.ഡി.എഫ്) വീണ്ടും മത്സരിക്കുന്ന ബേപ്പൂരിൽ ഇത്തവണ പോരാട്ടം കടുപ്പമാണ്. പി.വി. അൻവർ യു.ഡി.എഫ് സ്വതന്ത്രനായി എത്തുന്നു എന്നതാണ് ഈ മണ്ഡലത്തിലെ സവിശേഷത. കെ.പി. പ്രകാശ് ബാബുവാണ് എൻ.ഡി.എ സ്ഥാനാർത്ഥി.
11. കുന്ദമംഗലം
സ്വതന്ത്ര പാരമ്പര്യമുള്ള കുന്ദമംഗലത്ത് അഡ്വ. പി.ടി.എ. റഹീം (എൽ.ഡി.എഫ്) വീണ്ടും ജനവിധി തേടുന്നു. മുസ്ലിം ലീഗിലെ എം.എ. റസാഖ് മാസ്റ്റർ (യു.ഡി.എഫ്), വി.കെ. സജീവൻ (എൻ.ഡി.എ) എന്നിവരാണ് പ്രധാന എതിരാളികൾ.
12. കൊടുവള്ളി
കഴിഞ്ഞ തവണ മുസ്ലിം ലീഗ് തിരിച്ചുപിടിച്ച മണ്ഡലത്തിൽ ഇത്തവണ പി.കെ. ഫിറോസാണ് യു.ഡി.എഫ് സ്ഥാനാർത്ഥി. സലീം മടവൂർ (എൽ.ഡി.എഫ്), ഗിരി പാമ്പനാൽ (എൻ.ഡി.എ) എന്നിവരും മത്സരരംഗത്തുണ്ട്.
13. തിരുവമ്പാടി
യു.ഡി.എഫിന് അനുകൂലമായ സാഹചര്യമുള്ള തിരുവമ്പാടിയിൽ സിറ്റിങ് എം.എൽ.എ ലിന്റോ ജോസഫ് (എൽ.ഡി.എഫ്) തന്നെ മത്സരിക്കുന്നു. മുസ്ലിം ലീഗിലെ സി.കെ. കാസിം (യു.ഡി.എഫ്), സണ്ണി തോമസ് (എൻ.ഡി.എ) എന്നിവരാണ് മറ്റ് സ്ഥാനാർത്ഥികൾ
The post കോഴിക്കോട് 2026; രണ്ട് പതിറ്റാണ്ടിലെ കോൺഗ്രസ് ശാപം നീങ്ങുമോ? ജില്ലയിൽ പോരാട്ടം കടുക്കുന്നു appeared first on Express Kerala.
