ചണ്ഡീഗഡിലെ ബിജെപി ആസ്ഥാനത്തിന് സമീപം വൈകിട്ട് അഞ്ചുമണിയോടെ ഉണ്ടായ സ്ഫോടനം വലിയ പരിഭ്രാന്തി പരത്തി. ഇരുചക്രവാഹനത്തിലെത്തിയ രണ്ട് പേർ ഇംപ്രൊവൈസ്ഡ് എക്സ്പ്ലോസീവ് ഡിവൈസ് എറിഞ്ഞ ശേഷം സംഭവസ്ഥലത്ത് നിന്ന് അതിവേഗം രക്ഷപ്പെടുകയായിരുന്നുവെന്നാണ് പ്രാഥമിക കണ്ടെത്തൽ. സ്ഫോടനത്തിൽ ആർക്കും പരിക്കേറ്റിട്ടില്ലെങ്കിലും സമീപത്ത് പാർക്ക് ചെയ്തിരുന്ന കാറിനും രണ്ട് സ്കൂട്ടറുകൾക്കും കേടുപാടുകൾ സംഭവിച്ചു.
സംഭവത്തെ തുടർന്ന് സ്ഥലത്തെത്തിയ പൊലീസും വിരലടയാള വിദഗ്ധരും പ്രദേശം വളയുകയും പരിശോധനകൾ നടത്തുകയും ചെയ്തു. സ്ഫോടന സ്ഥലത്തുനിന്നും ബോംബിന്റെ അവശിഷ്ടങ്ങൾ എന്ന് കരുതുന്ന ചില ശകലങ്ങൾ അന്വേഷണസംഘം കണ്ടെടുത്തിട്ടുണ്ട്. പ്രതികളെ തിരിച്ചറിയുന്നതിനായി പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ച് ഊർജിതമായ അന്വേഷണം നടന്നുവരികയാണ്. സുരക്ഷാ ക്രമീകരണങ്ങളുടെ ഭാഗമായി കേന്ദ്ര റിസർവ് പോലീസ് സേനയെ പ്രദേശത്ത് വിന്യസിച്ചിട്ടുണ്ട്.
Also Read: പിങ്ക് നിറമടിച്ച ആന ‘ചഞ്ചൽ’ ചരിഞ്ഞു; ജയ്പൂരിലെ വിവാദ ഫോട്ടോഷൂട്ടിനെതിരെ പ്രതിഷേധം ശക്തമാകുന്നു
ബിജെപി ഓഫീസിന് നേരത്തെ പ്രത്യേക ഭീഷണികളൊന്നും ഉണ്ടായിരുന്നില്ലെന്നാണ് ഔദ്യോഗിക വൃത്തങ്ങൾ നൽകുന്ന സൂചന. എന്നിരുന്നാലും സ്ഥിതിഗതികൾ വിലയിരുത്താൻ സെൻട്രൽ ഫോറൻസിക് സയൻസ് ലബോറട്ടറിയിൽ നിന്നുള്ള വിദഗ്ധ സംഘവും സ്ഥലത്തെത്തി തെളിവുകൾ ശേഖരിച്ചു. സ്ഫോടനത്തിന്റെ പശ്ചാത്തലത്തിൽ ചണ്ഡീഗഡിലെ തന്ത്രപ്രധാനമായ ഇടങ്ങളിൽ സുരക്ഷാ ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.
The post ബിജെപി ആസ്ഥാനത്തിന് സമീപം സ്ഫോടനം; ഐഇഡി എറിഞ്ഞത് ബൈക്കിലെത്തിയ രണ്ടംഗ സംഘം appeared first on Express Kerala.
