പശ്ചിമേഷ്യൻ യുദ്ധത്തെത്തുടർന്നുണ്ടായ കടുത്ത ഊർജ പ്രതിസന്ധി മറികടക്കാൻ സർക്കാർ-സ്വകാര്യ സ്ഥാപനങ്ങളുടെ പ്രവർത്തന സമയം വെട്ടിച്ചുരുക്കി ബംഗ്ലാദേശ്. പുതിയ ഉത്തരവ് പ്രകാരം എല്ലാ ഓഫീസുകളും രാവിലെ 9 മണി മുതൽ വൈകുന്നേരം 4 മണി വരെ മാത്രമേ പ്രവർത്തിക്കുകയുള്ളൂ. രാജ്യത്തെ വൈദ്യുതി ഉത്പാദനത്തിന്റെ 60 ശതമാനവും ഇറക്കുമതി ചെയ്യുന്ന വാതകത്തെ ആശ്രയിച്ചായതിനാലും, ആവശ്യമായ ഇന്ധനത്തിന്റെ 95 ശതമാനവും പശ്ചിമേഷ്യൻ രാജ്യങ്ങളിൽ നിന്ന് എത്തുന്നതിനാലുമാണ് ഇത്തരമൊരു കടുത്ത നിയന്ത്രണം ഏർപ്പെടുത്താൻ സർക്കാർ നിർബന്ധിതരായത്. കൃഷി ആവശ്യങ്ങൾക്കായി വൻതോതിൽ ഡീസൽ ഉപയോഗിക്കുന്നതും പ്രതിസന്ധിയുടെ ആക്കം കൂട്ടിയിട്ടുണ്ട്.
ഓഫീസ് സമയത്തിന് പുറമെ വിവാഹാഘോഷങ്ങൾക്കും മറ്റ് പൊതുപരിപാടികൾക്കും അലങ്കാര വിളക്കുകൾ ഉപയോഗിക്കുന്നതിനും സർക്കാർ കർശന നിയന്ത്രണം ഏർപ്പെടുത്തിയിട്ടുണ്ട്. മാളുകളിലും വാണിജ്യ സ്ഥാപനങ്ങളിലും വൈദ്യുതി ഉപയോഗം കുറയ്ക്കണമെന്ന് നേരത്തെ തന്നെ നിർദ്ദേശം നൽകിയിരുന്നു. ഈ നിയന്ത്രണങ്ങൾ കൃത്യമായി പാലിക്കുകയാണെങ്കിൽ രാജ്യത്തെ വൈദ്യുതി ഉപയോഗത്തിൽ 30 ശതമാനം വരെ കുറവുണ്ടാക്കാൻ സാധിക്കുമെന്നാണ് സർക്കാരിന്റെ കണക്കുകൂട്ടൽ. ആഗോള വിപണിയിലെ ഇന്ധനവില വർദ്ധനവും വിതരണത്തിലെ തടസ്സങ്ങളും പരിഹരിക്കപ്പെടുന്നത് വരെ നിയന്ത്രണങ്ങൾ തുടരാനാണ് സാധ്യത.
The post ഊർജ പ്രതിസന്ധി! ഓഫീസ് സമയം വെട്ടിച്ചുരുക്കി ബംഗ്ലാദേശ്; ആഘോഷങ്ങൾക്കും നിയന്ത്രണം appeared first on Express Kerala.
