ഇരിങ്ങാലക്കുട ഫിലിം സൊസൈറ്റിയുടെ വാർഷികം ആഘോഷിച്ചു

ഇരിങ്ങാലക്കുട : ഇരിങ്ങാലക്കുട ഫിലിം സൊസൈറ്റിയുടെ വാർഷിക യോഗം ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡൻ്റ് ടി.ജി. ശങ്കരനാരായണൻ ഉദ്ഘാടനം ചെയ്തു.

കലാമൂല്യമുള്ളതും എന്നാൽ സാമ്പത്തിക പരാജയങ്ങൾ എറ്റുവാങ്ങുന്നതുമായ ചിത്രങ്ങൾക്കും സംവിധായകർക്കും കൈത്താങ്ങായി നിലകൊള്ളാൻ ഫിലിം സൊസൈറ്റി പ്രസ്ഥാനങ്ങൾക്ക് കഴിയേണ്ടതുണ്ടെന്ന് അദ്ദേഹം അഭിപ്രായപ്പെട്ടു.

യോഗത്തിൽ സൊസൈറ്റി പ്രസിഡൻ്റ് മനീഷ് അരിക്കാട്ട് അധ്യക്ഷത വഹിച്ചു.

മികച്ച സാമൂഹ്യ പ്രവർത്തകനുള്ള ബിഎസ്എസ് അവാർഡ് നേടിയ ജോസ് മാമ്പിള്ളിയെ ചടങ്ങിൽ ആദരിച്ചു.

റോട്ടറി ക്ലബ്ബ് പ്രസിഡൻ്റ് പ്രൊഫ. എം.എ. ജോൺ, സൊസൈറ്റി രക്ഷാധികാരി പി.കെ. ഭരതൻ മാസ്റ്റർ, സെക്രട്ടറി നവീൻ ഭഗീരഥൻ, ട്രഷറർ രാജീവ് മുല്ലപ്പിള്ളി, ജോയിൻ്റ് സെക്രട്ടറി ജോസ് മാമ്പിള്ളി തുടങ്ങിയവർ പ്രസംഗിച്ചു.

തുടർന്ന് ടുനീഷ്യൻ ചിത്രമായ “വേർ ദി വിൻഡ് കംസ് ഫ്രം” പ്രദർശിപ്പിച്ചു.