കുവൈത്ത്: രാജ്യത്തെ സുരക്ഷയും ക്രമസമാധാനവും ശക്തമാക്കുന്നതിന്റെ ഭാഗമായി കുവൈത്ത് ആഭ്യന്തര മന്ത്രാലയം ജഹ്റ ഗവർണറേറ്റിൽ വൻ പരിശോധന നടത്തി. അംഘറ സ്ക്രാപ്പ് യാർഡ് മേഖല കേന്ദ്രീകരിച്ചായിരുന്നു ഈ പ്രത്യേക സുരക്ഷാ ക്യാമ്പയിൻ.
ജഹ്റ സെക്യൂരിറ്റി ഡയറക്ടറേറ്റും സ്പെഷ്യൽ സെക്യൂരിറ്റി ഫോഴ്സും സംയുക്തമായാണ് ഈ ഓപ്പറേഷൻ നടത്തിയത്. താമസ നിയമലംഘകരെ കണ്ടെത്തുക, പിടികിട്ടാപ്പുള്ളികളെ പിടികൂടുക, നിയമവിരുദ്ധ പ്രവർത്തനങ്ങൾ തടയുക എന്നിവയായിരുന്നു പരിശോധനയുടെ പ്രധാന ലക്ഷ്യം. മേഖലയിലേക്കുള്ള പ്രവേശന കവാടങ്ങൾ അടച്ച് നടത്തിയ പരിശോധനയിൽ നിരവധി നിയമലംഘകർ പിടിയിലായതായാണ് സൂചന. വരും ദിവസങ്ങളിലും വിവിധ മേഖലകളിൽ പരിശോധന തുടരുമെന്ന് അധികൃതർ വ്യക്തമാക്കി. ലഹരിമരുന്ന് കേസുകളിൽ ഉൾപ്പെട്ട ഒരാളെയും മോഷണക്കേസിൽ പ്രതിയായ മറ്റൊരാളെയും സുരക്ഷാ സേന പിടികൂടി. റെസിഡൻസി നിയമങ്ങൾ ലംഘിച്ച് രാജ്യത്ത് അനധികൃതമായി തങ്ങിയിരുന്ന 20 പേരെ പോലീസ് കസ്റ്റഡിയിലെടുത്തു. സ്പോൺസർമാരിൽ നിന്ന് ഒളിച്ചോടിയതായി റിപ്പോർട്ട് ചെയ്യപ്പെട്ട 12 പേരും പിടിയിലായവരിൽ ഉൾപ്പെടുന്നു. വിവിധ കേസുകളിൽ പോലീസ് തിരഞ്ഞുകൊണ്ടിരുന്ന ഒരു വാഹനവും പരിശോധനയ്ക്കിടെ ഉദ്യോഗസ്ഥർ കണ്ടെത്തി പിടിച്ചെടുത്തിട്ടുണ്ട്.
The post കുവൈത്തിൽ നിയമലംഘകർക്കായി വലവിരിച്ച് സുരക്ഷാ സേന; 34 പേർ കസ്റ്റഡിയിൽ appeared first on Express Kerala.
