ദുബൈ: 2026-നെ വരവേൽക്കാൻ ജനലക്ഷങ്ങൾ ഒത്തുചൂടിയ ആവേശപ്പോരാട്ടത്തിന് പിന്നാലെ, അത്ഭുതപ്പെടുത്തുന്ന വേഗത്തിൽ നഗരത്തെ പൂർവ്വസ്ഥിതിയിലാക്കി ദുബായ് മുനിസിപ്പാലിറ്റി. പുതുവത്സരാഘോഷങ്ങൾ അവസാനിച്ച് മണിക്കൂറുകൾക്കുള്ളിൽ തന്നെ നഗരത്തിലെ പ്രധാന തെരുവുകളും ബീച്ചുകളും പൊതുസ്ഥലങ്ങളും പൂർണ്ണമായും മാലിന്യമുക്തമാക്കി അധികൃതർ ലോകത്തിന് മാതൃകയായി. ആഘോഷത്തിന്റെ തിരക്കുകൾ ഒഴിഞ്ഞയുടൻ തന്നെ ദ്രുതഗതിയിലുള്ള ശുചീകരണ പ്രവർത്തനങ്ങളിലൂടെ നഗരത്തിന്റെ സൗന്ദര്യം വീണ്ടെടുക്കുകയായിരുന്നു.
Also Read: ലണ്ടൻ ആകാശത്ത് ആശങ്കയുടെ ഒരു മണിക്കൂർ; 500 യാത്രക്കാരുമായി എമിറേറ്റ്സ് വിമാനം തിരിച്ചിറക്കി
ജനുവരി 1 പുലർച്ചയോടെ ആരംഭിച്ച ഈ വൻ ശുചീകരണ യജ്ഞത്തിൽ 3,000-ലധികം തൊഴിലാളികളാണ് പങ്കെടുത്തത്. ഇവരെ ഏകോപിപ്പിക്കാൻ 200 സൂപ്പർവൈസർമാരും ഇൻസ്പെക്ടർമാരും രംഗത്തുണ്ടായിരുന്നു. ആധുനിക സജ്ജീകരണങ്ങളോടു കൂടിയ 400-ഓളം ശുചീകരണ വാഹനങ്ങൾ ഉപയോഗിച്ചാണ് റോഡുകളിലെയും പാർക്കുകളിലെയും അവശിഷ്ടങ്ങൾ നീക്കം ചെയ്തത്. ഗവൺമെന്റ് സ്ഥാപനങ്ങളുടെയും ഇവന്റ് സെക്യൂരിറ്റി കമ്മിറ്റിയുടെയും കൃത്യമായ പ്ലാനിംഗും ഏകോപനവുമാണ് ഇത്രയും ചുരുങ്ങിയ സമയത്തിനുള്ളിൽ മിഷൻ പൂർത്തിയാക്കാൻ സഹായിച്ചത്.
ആഘോഷങ്ങൾക്കിടയിലും തളരാതെ ജോലി ചെയ്യുന്ന ശുചീകരണ തൊഴിലാളികളുടെ വീഡിയോകൾ സോഷ്യൽ മീഡിയയിൽ വൈറലായിട്ടുണ്ട്. ‘ഇതാണ് ദുബായ്’ എന്ന അടിക്കുറിപ്പോടെ താമസക്കാർ പങ്കുവെച്ച ദൃശ്യങ്ങൾ നഗരത്തിന്റെ അച്ചടക്കത്തെയും കാര്യക്ഷമതയെയും പ്രകീർത്തിക്കുന്നതാണ്. ലോകം പുതുവർഷത്തിലേക്ക് ഉറക്കമുണർന്നപ്പോഴേക്കും മാലിന്യത്തിന്റെ ഒരു അംശം പോലും അവശേഷിപ്പിക്കാതെ നഗരത്തെ പഴയപടി മനോഹരമാക്കി മാറ്റാൻ ദുബൈ അധികൃതർക്ക് സാധിച്ചു.
The post ആഘോഷം കഴിഞ്ഞു, നഗരം തിളങ്ങി; പുതുവർഷ പുലരിയിൽ ദുബായുടെ ‘ക്ലീൻ’ മാതൃക appeared first on Express Kerala.
