തിരുവനന്തപുരത്ത് ചരിത്രമെഴുതി ബിജെപി; മേയർ വി വി രാജേഷിനെ അഭിനന്ദിച്ച് പ്രധാനമന്ത്രി

ന്യൂഡൽഹി: തിരുവനന്തപുരം കോർപ്പറേഷൻ ഭരണത്തിൽ ചരിത്ര വിജയം നേടിയ ബിജെപി നേതൃത്വത്തെയും പുതിയ മേയർ അഡ്വ. വി വി രാജേഷിനെയും പ്രധാനമന്ത്രി നരേന്ദ്ര മോദി അഭിനന്ദിച്ചു. ഡെപ്യൂട്ടി മേയർ ആശാനാഥിനും ബിജെപി സംസ്ഥാന നേതൃത്വത്തിനും പ്രധാനമന്ത്രി തന്റെ അഭിനന്ദനങ്ങൾ അറിയിച്ചു.

ബിജെപി പ്രവർത്തകർ വർഷങ്ങളായി നടത്തിയ കഠിനാധ്വാനത്തിന്റെയും അർപ്പണബോധത്തിന്റെയും ഫലമാണ് ഈ ഉജ്ജ്വല വിജയമെന്ന് നരേന്ദ്ര മോദി അഭിപ്രായപ്പെട്ടു. കേരളത്തിലെ ബിജെപിക്ക് കരുത്തുപകരുന്ന ഈ നേട്ടത്തിൽ സംസ്ഥാന നേതൃത്വത്തെ അദ്ദേഹം പ്രത്യേകം പ്രശംസിച്ചു. പുതിയ ഭരണസമിതിക്ക് കീഴിൽ തിരുവനന്തപുരം നഗരത്തിന്റെ വികസനത്തിൽ വലിയ മുന്നേറ്റം ഉണ്ടാവുമെന്ന് അദ്ദേഹം ആശംസിച്ചു. തിരുവനന്തപുരം കോർപ്പറേഷനിൽ ബിജെപി നേടിയ ചരിത്രവിജയത്തെ പ്രശംസിച്ചുകൊണ്ട് പ്രധാനമന്ത്രി നരേന്ദ്ര മോദി അയച്ച അഭിനന്ദന കത്ത് മേയർ അഡ്വ. വി.വി. രാജേഷ് ഫെയ്സ്ബുക്കിൽ പങ്കുവെച്ചു. കേരള രാഷ്ട്രീയത്തിലെ പുതിയ മാറ്റത്തെ ഉറ്റുനോക്കുന്നതായിരുന്നു പ്രധാനമന്ത്രിയുടെ വാക്കുകൾ.

Also Read: പുതുവർഷത്തിൽ കുതിച്ചുപാഞ്ഞ് കൊച്ചി മെട്രോ; ഒറ്റ ദിവസം യാത്ര ചെയ്തത് 1.39 ലക്ഷം യാത്രക്കാർ

തിരുവനന്തപുരം കോർപ്പറേഷനിൽ ഇടത്-വലത് മുന്നണികൾ കാലങ്ങളായി നടത്തിയിരുന്ന ‘ഫിക്സഡ് മാച്ച്’ അവസാനിപ്പിച്ചാണ് ബിജെപി ഭരണം പിടിച്ചെടുത്തതെന്ന് പ്രധാനമന്ത്രി കത്തിൽ കുറിച്ചു. വികസിത തിരുവനന്തപുരം എന്ന ബിജെപിയുടെ കാഴ്ചപ്പാടിനും വികസന അജണ്ടയ്ക്കും വോട്ടർമാർ നൽകിയ വലിയ അംഗീകാരമാണ് ഈ വിജയമെന്ന് അദ്ദേഹം ചൂണ്ടിക്കാട്ടി. മേയർക്കും ഡെപ്യൂട്ടി മേയർക്കും പുറമെ, കോർപ്പറേഷനിലേക്ക് തിരഞ്ഞെടുക്കപ്പെട്ട എല്ലാ ബിജെപി കൗൺസിലർമാരെയും അദ്ദേഹം പ്രത്യേകം അഭിനന്ദിച്ചു. വർഷങ്ങളായുള്ള രാഷ്ട്രീയ അനിശ്ചിതത്വത്തിന് അന്ത്യം കുറിച്ച് ജനങ്ങൾ മാറ്റത്തിന് വോട്ട് ചെയ്തുവെന്നും മോദി സന്ദേശത്തിൽ പറഞ്ഞു.

തിരുവനന്തപുരം കോർപ്പറേഷനിൽ ബിജെപിയെ ഭരണത്തിലേറ്റിയ ജനങ്ങൾക്ക് നന്ദി അറിയിച്ച പ്രധാനമന്ത്രി നരേന്ദ്ര മോദി, നഗരവുമായുള്ള തന്റെ ആത്മബന്ധം സന്ദേശത്തിൽ പങ്കുവെച്ചു. തിരുവനന്തപുരം നഗരത്തിന്റെ സാംസ്‌കാരിക വൈവിധ്യത്തെയും ചരിത്രപ്രാധാന്യത്തെയും അദ്ദേഹം എടുത്തുപറഞ്ഞു. ശ്രീ പത്മനാഭസ്വാമിയാൽ അനുഗ്രഹിക്കപ്പെട്ട പുണ്യഭൂമിയാണ് കേരളത്തിന്റെ തലസ്ഥാനമായ തിരുവനന്തപുരമെന്ന് അദ്ദേഹം ഓർമ്മിപ്പിച്ചു. മഹത്തുക്കളായ ചിന്തകർ, സാമൂഹിക പരിഷ്‌കർത്താക്കൾ, കലാകാരന്മാർ, സംഗീതജ്ഞർ, കവികൾ, സന്യാസിമാർ എന്നിവരെ വളർത്തിയെടുത്ത മണ്ണാണ് തിരുവനന്തപുരമെന്ന് പ്രധാനമന്ത്രി പറഞ്ഞു. അത്തരമൊരു ചരിത്ര നഗരം ബിജെപിയെ ഭരണത്തിന് തിരഞ്ഞെടുത്തപ്പോൾ വലിയ വിനയത്തോടെയാണ് ഈ പിന്തുണയെ കാണുന്നതെന്ന് അദ്ദേഹം കുറിച്ചു.
The post തിരുവനന്തപുരത്ത് ചരിത്രമെഴുതി ബിജെപി; മേയർ വി വി രാജേഷിനെ അഭിനന്ദിച്ച് പ്രധാനമന്ത്രി appeared first on Express Kerala.