ബെഗംളൂരൂ: കർണാടകയിലെ ബെല്ലാരിയിൽ വാൽമീകി പ്രതിമ അനാച്ഛാദന പരിപാടിയുമായി ബന്ധപ്പെട്ട തർക്കത്തെത്തുടർന്നുണ്ടായ സംഘർഷത്തിൽ ഒരാൾ കൊല്ലപ്പെട്ടു. പരിപാടിക്ക് മുന്നോടിയായി കോൺഗ്രസ് പ്രവർത്തകർ ബാനർ സ്ഥാപിക്കാൻ ശ്രമിച്ചതാണ് സംഘർഷത്തിന് കാരണമായത്. കല്യാണ രാജ്യ പ്രഗതി പക്ഷ (കെആർപിപി) എംഎൽഎ ജനാർദന റെഡ്ഡിയുടെയും കോൺഗ്രസ് എംഎൽഎ ഭരത് റെഡ്ഡിയുടെയും അനുയായികൾ തമ്മിലാണ് ഏറ്റുമുട്ടലുണ്ടായത്.
കോൺഗ്രസ് എംഎൽഎ ഭരത് റെഡ്ഡിയുടെ അനുയായികൾ ജനാർദന റെഡ്ഡിയുടെ വീടിന് മുന്നിൽ ബാനറുകൾ സ്ഥാപിക്കാൻ ശ്രമിച്ചതാണ് ബെല്ലാരിയിൽ സംഘർഷത്തിന് തുടക്കമിട്ടത്. ഇതിനെ എതിർത്ത് ജനാർദന റെഡ്ഡിയുടെ അനുയായികൾ രംഗത്തെത്തിയതോടെ ഇരുവിഭാഗവും തമ്മിൽ വാക്കുതർക്കമുണ്ടായി. തർക്കം രൂക്ഷമായതോടെ ഇരുവിഭാഗവും പരസ്പരം കല്ലെറിയുകയും ഇത് വലിയ തോതിലുള്ള സംഘർഷത്തിലേക്ക് വഴിമാറുകയും ചെയ്യുകയായിരുന്നു. ബെല്ലാരിയിലെ സംഘർഷസ്ഥലത്ത് മുൻ മന്ത്രി സതീഷ് റെഡ്ഡി എത്തിയതോടെ സ്ഥിതിഗതികൾ കൂടുതൽ വഷളായി. സംഘർഷം നിയന്ത്രിക്കാൻ സതീഷ് റെഡ്ഡിയുടെ ഗൺമാൻ ആകാശത്തേക്ക് രണ്ടുതവണ വെടിയുതിർത്തു. ഏറ്റുമുട്ടലിൽ കൊല്ലപ്പെട്ടത് രാജശേഖർ എന്ന കോൺഗ്രസ് പ്രവർത്തകനാണെന്ന് പോലീസ് സ്ഥിരീകരിച്ചു. ഭരത് റെഡ്ഡി എം.എൽ.എയുടെ അടുത്ത സഹായിയാണ് മുൻ മന്ത്രി സതീഷ് റെഡ്ഡി.
Also Read: മക്കൾ, മരുമക്കൾ, ഭാര്യമാർ; ഇത് ജനാധിപത്യമോ അതോ കുടുംബവാഴ്ചയോ? ബിഎംസി ടിക്കറ്റ് വിതരണത്തിൽ നേതാക്കളുടെ ‘കുടുംബസ്നേഹം’
ബെല്ലാരിയിലെ സംഘർഷം രാഷ്ട്രീയ പ്രേരിതമാണെന്ന് കോൺഗ്രസ് എംഎൽഎ ഭരത് റെഡ്ഡി ആരോപിച്ചു. ജനാർദന റെഡ്ഡിയുടെ വീട്ടിലല്ല, മറിച്ച് പൊതുനിരത്തുകളിലാണ് ബാനറുകൾ സ്ഥാപിച്ചത്. വാൽമീകി സമുദായക്കാർ ബാനറുകൾ സ്ഥാപിക്കുന്നത് തടയാൻ ആർക്കും കഴിയില്ല. ഈ പരിപാടി നടക്കാൻ ചിലർ ആഗ്രഹിക്കുന്നില്ലെന്നും, മനഃപൂർവ്വം സംഘർഷമുണ്ടാക്കാൻ ശ്രമിക്കുകയാണെന്നും ഭരത് റെഡ്ഡി കുറ്റപ്പെടുത്തി.
The post ബെല്ലാരിയിൽ രാഷ്ട്രീയ സംഘർഷം; കോൺഗ്രസ് പ്രവർത്തകൻ കൊല്ലപ്പെട്ടു; മുൻ മന്ത്രിയുടെ ഗൺമാൻ വെടിയുതിർത്തു appeared first on Express Kerala.
