തമിഴ് സിനിമാ ലോകം ഒന്നടങ്കം ഉറ്റുനോക്കുന്ന ദളപതി വിജയ്യുടെ കരിയറിലെ അവസാന ചിത്രം ‘ജനനായകൻ’ റിലീസിന് മുൻപേ റെക്കോർഡുകൾ തിരുത്തിക്കുറിക്കുന്നു. രാഷ്ട്രീയ പ്രവേശനത്തിന് മുന്നോടിയായുള്ള വിജയ്യുടെ അവസാന ബിഗ് സ്ക്രീൻ വിസ്മയം എന്ന നിലയിൽ വൻ ആവേശമാണ് ആരാധകർക്കിടയിലുള്ളത്. റിലീസിന് ഒരാഴ്ച മാത്രം ബാക്കിനിൽക്കെ, ആഗോള പ്രീ-സെയിൽസിലൂടെ മാത്രം ചിത്രം 15 കോടി രൂപയുടെ കളക്ഷൻ പിന്നിട്ടു കഴിഞ്ഞു.
വിദേശ വിപണിയിൽ തരംഗം
ഇൻഡസ്ട്രി ട്രാക്കറായ സാക്നിൽക്കിന്റെ റിപ്പോർട്ടുകൾ പ്രകാരം, വിദേശ വിപണികളിലാണ് ചിത്രം വമ്പിച്ച മുന്നേറ്റം നടത്തുന്നത്. ആകെ ലഭിച്ച അഡ്വാൻസ് ബുക്കിംഗിൽ 11 മുതൽ 12 കോടി രൂപ വരെയും വിദേശ രാജ്യങ്ങളിൽ നിന്നാണ്. വടക്കേ അമേരിക്ക, യുകെ, ഓസ്ട്രേലിയ തുടങ്ങിയ ഇടങ്ങളിൽ വിജയ്ക്കുള്ള ജനപ്രീതിയാണ് ഈ നേട്ടത്തിന് പിന്നിൽ. ചിത്രത്തിന്റെ ട്രെയിലർ പുറത്തിറങ്ങുന്നതിന് മുൻപേ ഇത്രയും വലിയൊരു തുക അഡ്വാൻസ് ബുക്കിംഗിലൂടെ ലഭിച്ചത് സിനിമാ ലോകത്തെ അമ്പരപ്പിച്ചിരിക്കുകയാണ്.
Also Read: മലയാള സിനിമയ്ക്ക് 2025 കനത്ത തിരിച്ചടിയുടെ വർഷം; നഷ്ടം 530 കോടി രൂപയെന്ന് ഫിലിം ചേംബർ
കേരളത്തിലും കർണാടകത്തിലും ബുക്കിംഗ് ആരംഭിച്ചു
ഇന്ത്യയിൽ നിലവിൽ 3 കോടി രൂപയാണ് അഡ്വാൻസ് ബുക്കിംഗിലൂടെ ചിത്രം സ്വന്തമാക്കിയിരിക്കുന്നത്. നിലവിൽ കേരളത്തിലും കർണാടകത്തിലും മാത്രമാണ് ബുക്കിംഗ് ആരംഭിച്ചിട്ടുള്ളത്. തമിഴ്നാട്ടിലും മറ്റ് സംസ്ഥാനങ്ങളിലും വരും ദിവസങ്ങളിൽ ബുക്കിംഗ് ഓപ്പൺ ചെയ്യുന്നതോടെ ഈ സംഖ്യ കുത്തനെ ഉയരുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ. കേരളത്തിൽ നാളെ മുതൽ കൂടുതൽ തിയേറ്ററുകളിൽ ബുക്കിംഗ് സജീവമാകുമെന്നാണ് റിപ്പോർട്ടുകൾ.
റീമേക്കിനെക്കുറിച്ചുള്ള ചർച്ചകൾക്ക് മറുപടി
നന്ദമൂരി ബാലകൃഷ്ണയുടെ തെലുങ്ക് ചിത്രം ‘ഭഗവന്ത് കേസരി’യുടെ റീമേക്കാണോ ‘ജനനായകൻ’ എന്ന തരത്തിൽ സോഷ്യൽ മീഡിയയിൽ സജീവമായ ചർച്ചകൾക്ക് സംവിധായകൻ എച്ച്. വിനോദ് തന്നെ മറുപടിയുമായി എത്തി.
“ഈ കഥ റീമേക്കാണോ അതോ ഏതെങ്കിലും രംഗങ്ങൾ കടമെടുത്തതാണോ എന്നോർത്ത് പ്രേക്ഷകർ ആശങ്കപ്പെടേണ്ടതില്ല. ഇതൊരു ദളപതി വിജയ് ചിത്രമാണ്. ഭഗവന്ത് കേസരി കണ്ടവർ പോലും തിയേറ്ററിലെത്തി ഈ ചിത്രം കാണണം. ഒരു ഷോ കണ്ടു കഴിയുമ്പോൾ നിങ്ങൾക്ക് തന്നെ ഇതിനുള്ള ഉത്തരം ലഭിക്കും,” – എച്ച്. വിനോദ് വ്യക്തമാക്കി.
ബോബി ഡിയോൾ, പൂജ ഹെഗ്ഡെ, മമിത ബൈജു തുടങ്ങിയ വൻ താരനിര അണിനിരക്കുന്ന ചിത്രത്തിന് അനിരുദ്ധ് രവിചന്ദറാണ് സംഗീതം നൽകുന്നത്. ജനുവരി 9-നാണ് ചിത്രം ലോകമെമ്പാടുമുള്ള തിയേറ്ററുകളിൽ പ്രദർശനത്തിന് എത്തുന്നത്.
The post ബോക്സ് ഓഫീസിൽ ‘ദളപതി’ വിളയാട്ടം; ‘ജനനായകൻ’ പ്രീ-സെയിൽസ് 15 കോടി കടന്നു appeared first on Express Kerala.
