‘പുതിയ പാർലമെന്റും പ്രധാനമന്ത്രിക്ക് പുതിയ വസതിയും പണിഞ്ഞു, എന്തുകൊണ്ട് ഗ്രാമങ്ങളിൽ പുതിയ സ്കൂളുകൾ ഇല്ല?’: രാജ്യവ്യാപക ക്യാമ്പയിനുമായി CJP | CJP Founder

ന്യൂഡൽഹി: രാജ്യത്തെ ഗ്രാമങ്ങളിലെ സർക്കാർ വിദ്യാലയങ്ങളുടെ അടിസ്ഥാന സൗകര്യങ്ങൾ വികസിപ്പിക്കുന്നതിനായി ‘സർപഞ്ച് ചലഞ്ച്’ എന്ന പേരിൽ രാജ്യവ്യാപക ക്യാമ്പയിൻ പ്രഖ്യാപിച്ച് കോക്രോച്ച് ജനത പാർട്ടി സ്ഥാപകൻ അഭിജീത് ദീപ്കെ. വരാനിരിക്കുന്ന ഓഗസ്റ്റ് 15-ലെ 80-ാം സ്വാതന്ത്ര്യദിനത്തിൽ ക്യാമ്പയിന് തുടക്കമിടും. മഹാരാഷ്ട്രയിലെ ഹിംഗോളിയിലുള്ള സ്വന്തം ഗ്രാമത്തിലെ സർപഞ്ചിനെ കണ്ട് സ്കൂളുകളുടെ അവസ്ഥ മെച്ചപ്പെടുത്താൻ ആവശ്യപ്പെട്ടുകൊണ്ട് അഭിജീത് ഈ ദൗത്യത്തിന് തുടക്കം കുറിക്കും.(CJP Founder Abhijeet Dipke Announces Nationwide Campaign For Rural Government Schools)

കഴിഞ്ഞ 80 വർഷത്തിനിടയിൽ രാജ്യത്ത് ഏറ്റവും കൂടുതൽ അവഗണിക്കപ്പെട്ടത് ഗ്രാമങ്ങളിലെ സർക്കാർ വിദ്യാലയങ്ങളാണെന്ന് അഭിജീത് ദീപ്കെ ചൂണ്ടിക്കാട്ടി. പുതിയ പാർലമെന്റും പ്രധാനമന്ത്രിയുടെ പുതിയ വസതിയും പണിയാൻ കഴിഞ്ഞ നമ്മൾ എന്തുകൊണ്ട് ഗ്രാമങ്ങളിൽ പുതിയ സ്കൂളുകൾ നിർമ്മിക്കുന്നില്ലെന്ന് അദ്ദേഹം ചോദിച്ചു. കർഷകരുടെയും തൊഴിലാളികളുടെയും മക്കൾക്ക് കുടിവെള്ളവും ശൗചാലയവുമില്ലാത്ത വിദ്യാലയങ്ങളാണ് ഇപ്പോഴുമുള്ളത്.

ക്യാമ്പയിന്റെ ഭാഗമായി രാജ്യത്തുടനീളമുള്ള തദ്ദേശഭരണ തലവന്മാർ തങ്ങളുടെ ഗ്രാമങ്ങളിലെ സ്കൂളുകൾ സ്മാർട്ടാക്കി മാറ്റണമെന്ന് സിജെപി ആവശ്യപ്പെട്ടു. മികച്ച രീതിയിൽ സ്കൂളുകൾ നവീകരിക്കുന്ന സർപഞ്ചുമാരുടെ ചിത്രങ്ങൾ പാർട്ടി തങ്ങളുടെ സോഷ്യൽ മീഡിയ പേജുകളിലൂടെ പങ്കുവെച്ച് അവർക്ക് അഭിനന്ദനങ്ങൾ നൽകും. ഇതോടൊപ്പം വിദ്യാലയങ്ങളിൽ രക്ഷിതാക്കളുടെ നേതൃത്വത്തിൽ സോഷ്യൽ ഓഡിറ്റ് നടത്താനും പാർട്ടി ആഹ്വാനം ചെയ്തു. സ്കൂളുകളിലെ വൈദ്യുതി, കുടിവെള്ളം, ഉച്ചഭക്ഷണം, ശൗചാലയങ്ങൾ എന്നിവ പരിശോധിച്ച് പോരായ്മകൾ ഉണ്ടെങ്കിൽ അത് വീഡിയോ സഹിതം പാർട്ടിക്ക് ഇമെയിൽ ചെയ്യാൻ പ്രത്യേക ഫോം നൽകും.

അതിനിടെ, ഝാർഖണ്ഡിൽ പിഎസ്‌സി പരീക്ഷാ ക്രമക്കേടിനെതിരെ സമരം ചെയ്ത് ആരോഗ്യനില വഷളായതിനെ തുടർന്ന് ആശുപത്രിയിലായ വിദ്യാർത്ഥി നേതാവ് ദേവേന്ദ്ര നാഥ് മഹ്തോയ്ക്ക് സിജെപി പൂർണ്ണ പിന്തുണ പ്രഖ്യാപിച്ചു. ഉദ്യോഗാർത്ഥികൾക്ക് നേരെ പോലീസ് നടത്തിയ ലാത്തിച്ചാർജ് ക്രൂരവും മനുഷ്യത്വരഹിതവുമാണെന്ന് അഭിജീത് ദീപ്കെ വിമർശിച്ചു.

Story Summary

The Cockroach Janta Party (CJP), led by Abhijeet Dipke, has announced a nationwide ‘Sarpanch Challenge’ starting August 15 to overhaul neglected government schools in rural India through citizen-led social audits. Additionally, the CJP extended its solidarity to the ongoing JPSC-JSSC student protests in Jharkhand.