കർഷക പ്രതിഷേധത്തിന് മുന്നിൽ വഴങ്ങി; പാരന്തൂർ വിമാനത്താവള പദ്ധതി ഉപേക്ഷിക്കുമെന്ന് തമിഴ്നാട് മുഖ്യമന്ത്രി വിജയ് | Parandur Airport Project Cancelled

ചെന്നൈയിൽ പുതിയ വിമാനത്താവളം സ്ഥാപിക്കുന്നതിനായി പാരന്തൂരിൽ നടപ്പാക്കിവന്ന പദ്ധതിയിൽ നിന്ന് പിന്മാറുമെന്ന് തമിഴ്നാട് മുഖ്യമന്ത്രി വിജയ്. കൃഷിഭൂമിയെയും പ്രദേശവാസികളുടെ ഉപജീവനത്തെയും ബാധിക്കുന്നതിനാലാണ് പദ്ധതി ഉപേക്ഷിക്കുന്നതെന്ന് നിയമസഭയിൽ മുഖ്യമന്ത്രി അറിയിച്ചു (Parandur Airport Project Cancelled). ചെന്നൈയിലെ മീനമ്പാക്കം വിമാനത്താവളത്തിന് നിലവിൽ പ്രതിവർഷം മൂന്ന് കോടി യാത്രക്കാരെ കൈകാര്യം ചെയ്യാനുള്ള ശേഷിയുണ്ടെന്ന് വിജയ് പറഞ്ഞു. നഗരത്തിന്റെ വർധിച്ചുവരുന്ന ആവശ്യകത, വ്യവസായ വളർച്ച, ചരക്കുനീക്കം എന്നിവ കണക്കിലെടുത്ത് പുതിയ വിമാനത്താവളം ആവശ്യമാണെന്നും അദ്ദേഹം വ്യക്തമാക്കി. എന്നാൽ കൃഷിഭൂമിയും ജനവാസ മേഖലകളും പരമാവധി ഒഴിവാക്കുന്ന മറ്റൊരു സ്ഥലമാണ് പദ്ധതിക്കായി കണ്ടെത്തേണ്ടതെന്നും അദ്ദേഹം പറഞ്ഞു.

2025 ജനുവരി 20ന് എഗനാപുരം ഉൾപ്പെടെയുള്ള ഗ്രാമങ്ങൾ സന്ദർശിച്ച് പാരന്തൂർ വിമാനത്താവളത്തിനെതിരെ പ്രതിഷേധിക്കുന്നവരുടെ പരാതികൾ നേരിട്ട് കേട്ടിരുന്നുവെന്നും വിജയ് പറഞ്ഞു. കർഷകരാണ് രാജ്യത്തിന്റെ നട്ടെല്ലെന്നും കൃഷിഭൂമി സംരക്ഷിക്കാൻ സമരം ചെയ്യുന്ന ജനങ്ങൾക്കൊപ്പമാണ് താനെന്നും അദ്ദേഹം വ്യക്തമാക്കി.
2024 ഒക്ടോബറിൽ വിക്രവാണ്ടിയിൽ നടന്ന പൊതുയോഗത്തിലും പാരന്തൂർ വിമാനത്താവള പദ്ധതിയെ താൻ എതിർത്തിരുന്നുവെന്ന് വിജയ് നിയമസഭയിൽ ചൂണ്ടിക്കാട്ടി. വ്യവസായ വികസനത്തിനും അതിൽ വിമാനത്താവളങ്ങൾക്കുമുള്ള പ്രാധാന്യം അംഗീകരിക്കുന്നുണ്ടെങ്കിലും, പാരന്തൂർ തന്നെയാകരുത് പദ്ധതിയുടെ സ്ഥലം എന്ന നിലപാടാണ് അദ്ദേഹം ആവർത്തിച്ചത്.

പുതിയ വിമാനത്താവളം സ്ഥാപിക്കുന്നതുമായി ബന്ധപ്പെട്ട് ഉന്നത ഉദ്യോഗസ്ഥരുമായും വിദഗ്ധരുമായും വിശദമായ ചർച്ചകൾ നടത്തിയ ശേഷമാണ് തീരുമാനം എടുത്തതെന്നും മുഖ്യമന്ത്രി പറഞ്ഞു. ജനങ്ങൾക്ക് നൽകിയ വാഗ്ദാനം പാലിക്കുന്നതിന്റെ ഭാഗമായി പാരന്തൂരിൽ പുതിയ വിമാനത്താവളം സ്ഥാപിക്കുന്നതിനായി സർക്കാർ സ്വീകരിച്ച നടപടികൾ ഉപേക്ഷിക്കുമെന്നും അദ്ദേഹം പ്രഖ്യാപിച്ചു.

2025 ഏപ്രിലിൽ കാഞ്ചീപുരം ജില്ലയിലെ പാരന്തൂരിൽ അന്താരാഷ്ട്ര ഗ്രീൻഫീൽഡ് വിമാനത്താവളം സ്ഥാപിക്കുന്നതിന് കേന്ദ്ര വ്യോമയാന മന്ത്രാലയം തത്വത്തിൽ അനുമതി നൽകിയിരുന്നു. പുതിയ സർക്കാർ പദ്ധതി ഉപേക്ഷിക്കുന്നതോടെ ചെന്നൈയുടെ ഭാവി വിമാനത്താവളത്തിനായി മറ്റൊരു സ്ഥലം കണ്ടെത്തേണ്ടിവരും.

Summary: Tamil Nadu Chief Minister Vijay has announced that his government will abandon steps to establish a new airport at Parandur, citing concerns over agricultural land and residents’ livelihoods. He said an alternative location with minimal impact on farming and settlements should be identified for Chennai’s future airport.