സെപ്റ്റംബർ 15ന് മുമ്പ് അമേരിക്കയിലേക്ക് മടങ്ങണം; അന്താരാഷ്ട്ര വിദ്യാർഥികൾക്ക് ഹാർവാർഡിന്റെ നിർദേശം

അമേരിക്കയിലെ പുതിയ വിസ നിയമങ്ങൾ പ്രാബല്യത്തിൽ വരാനിരിക്കെ അന്താരാഷ്ട്ര വിദ്യാർഥികൾക്ക് യാത്രാ നിർദേശവുമായി ഹാർവാർഡ് സർവകലാശാല (Harvard University). F-1, J-1 വിസകളിൽ അമേരിക്കയിൽ പഠിക്കുന്ന വിദ്യാർഥികളും ഗവേഷകരും സെപ്റ്റംബർ 15ന് മുമ്പ് യുഎസിലേക്ക് മടങ്ങുന്നത് പരിഗണിക്കണമെന്നാണ് ഹാർവാർഡ് നിർദേശിച്ചിരിക്കുന്നത്. പുതിയ നിയമം പ്രാബല്യത്തിൽ വന്നതിന് ശേഷം വിദേശയാത്ര നടത്തി തിരിച്ചെത്തുന്നവർക്ക് വ്യത്യസ്തമായ പ്രവേശന നടപടികൾ നേരിടേണ്ടിവരാനിടയുണ്ട്.

നിലവിൽ F-1, J-1 വിസയുള്ളവർക്ക് പഠനപരിപാടിയുടെ കാലയളവിലും വിസാ നിബന്ധനകൾ പാലിക്കുന്നിടത്തോളം ‘Duration of Status’ (D/S) സംവിധാനത്തിന് കീഴിൽ അമേരിക്കയിൽ തുടരാനാകും. എന്നാൽ നിർദിഷ്ട തീയതി വരെ മാത്രം രാജ്യത്ത് തുടരാൻ അനുവദിക്കുന്ന ‘Admit Until Date’ സംവിധാനം കൊണ്ടുവരാനാണ് നിർദേശം. ഇതോടെ വിദ്യാർഥികളുടെ അമേരിക്കയിലെ താമസ കാലാവധി കൂടുതൽ കൃത്യമായി നിശ്ചയിക്കപ്പെടും.

പുതിയ നിയമം പ്രാബല്യത്തിൽ വരുമ്പോൾ അമേരിക്കയിൽ തന്നെ തുടരുകയും വിസാ നിബന്ധനകൾ പാലിക്കുകയും ചെയ്യുന്ന വിദ്യാർഥികൾക്ക് ചില ട്രാൻസിഷൻ വ്യവസ്ഥകളുടെ സംരക്ഷണം ലഭിച്ചേക്കാം. എന്നാൽ സെപ്റ്റംബർ 15നോ അതിന് ശേഷമോ വിദേശത്തേക്ക് യാത്ര ചെയ്ത് അമേരിക്കയിലേക്ക് തിരിച്ചെത്തുന്നവർക്ക് പുതിയ സ്ഥിരകാലാവധി സംവിധാനം ബാധകമായേക്കാം. പഠനം പൂർത്തിയാക്കാൻ കൂടുതൽ സമയം ആവശ്യമുള്ള വിദ്യാർഥികൾക്ക് ഇനി ഔദ്യോഗികമായി കാലാവധി നീട്ടുന്നതിനുള്ള നടപടിക്രമങ്ങൾ പാലിക്കേണ്ടിവരാം. ഗ്രേസ് പിരീഡ്, കോഴ്‌സ് മാറ്റം, സർവകലാശാല മാറ്റം, OPT, STEM OPT തുടങ്ങിയ വിഷയങ്ങളിലും പുതിയ നിയമത്തിന് സ്വാധീനമുണ്ടാകാനിടയുണ്ട്.

ഇന്ത്യൻ വിദ്യാർഥികൾ ഉൾപ്പെടെയുള്ള അന്താരാഷ്ട്ര വിദ്യാർഥികൾ സെപ്റ്റംബർ 15ന് സമീപം നാട്ടിലേക്ക് പോകാനോ മറ്റ് രാജ്യങ്ങളിലേക്ക് യാത്ര ചെയ്യാനോ പദ്ധതിയിടുന്നുണ്ടെങ്കിൽ വിസാ രേഖകൾ, Form I-20 അല്ലെങ്കിൽ DS-2019, I-94 രേഖകൾ എന്നിവ പരിശോധിക്കണമെന്ന് ഹാർവാർഡ് നിർദേശിക്കുന്നു. യാത്രയ്ക്ക് മുമ്പ് സർവകലാശാലയിലെ അന്താരാഷ്ട്ര വിദ്യാർഥി വിഭാഗവുമായി ബന്ധപ്പെടുന്നതും പ്രധാനമാണ്.

അതേസമയം, നിർദിഷ്ട മാറ്റങ്ങൾക്കെതിരെ ഉന്നത വിദ്യാഭ്യാസ മേഖലയിലെ സംഘടനകളും തൊഴിൽ സംഘടനകളും നിയമനടപടികൾ സ്വീകരിച്ചിട്ടുണ്ട്. കോടതിയുടെയോ സർക്കാരിന്റെയോ ഭാഗത്തുനിന്ന് മാറ്റമുണ്ടാകുന്നതുവരെ ഔദ്യോഗിക അറിയിപ്പുകളും സർവകലാശാലയുടെ നിർദേശങ്ങളും നിരീക്ഷിച്ച ശേഷമേ യാത്രാ തീരുമാനങ്ങൾ എടുക്കാവൂ.

Summary: Harvard University has advised international students and scholars to consider returning to the US before September 15, ahead of proposed changes to F-1 and J-1 visa rules. The changes could replace the current duration-of-status system with a fixed authorised stay period, potentially affecting students who travel abroad and return after the deadline.