മലയാളികൾക്ക് ഓണാശംസകളുമായി പ്രധാനമന്ത്രി; സന്തോഷവും ഐക്യവും സമൃദ്ധിയും നിറയട്ടെയെന്ന് മോദി | Narendra Modi Onam wishes

ന്യൂഡൽഹി: മലയാളികൾക്ക് ഹൃദയം നിറഞ്ഞ ഓണാശംസകൾ നേർന്ന് പ്രധാനമന്ത്രി നരേന്ദ്ര മോദി (Narendra Modi Onam wishes). ലോകമെമ്പാടും ആവേശത്തോടെ ആഘോഷിക്കുന്ന ഊർജസ്വലമായ ഉത്സവമാണ് ഓണമെന്ന് പ്രധാനമന്ത്രി ആശംസാ സന്ദേശത്തിൽ പറഞ്ഞു. ഓണം സന്തോഷത്തിന്റെയും ഒത്തൊരുമയുടെയും സമൃദ്ധിയുടെയും മനോഭാവത്തിന് കൂടുതൽ കരുത്തേകട്ടെയെന്നും അദ്ദേഹം ആശംസിച്ചു.

മലയാളത്തിലും ഇംഗ്ലീഷിലുമാണ് പ്രധാനമന്ത്രി ആശംസകൾ പങ്കുവെച്ചത്. സമൂഹമാധ്യമമായ എക്സിലൂടെയാണ് അദ്ദേഹം ഓണസന്ദേശം നൽകിയത്.

രാഷ്ട്രപതി ദ്രൗപതി മുർമുവും കേരളീയർക്ക് ഓണാശംസകൾ നേർന്നു. സമ്പന്നമായ കേരളീയ സംസ്കാരത്തിന്റെയും സാഹോദര്യത്തിന്റെയും പ്രതീകമാണ് ഓണമെന്നും ഇത്തരം ആഘോഷങ്ങൾ രാജ്യത്തെ വൈവിധ്യത്തിൽ ഏകത്വം കൂടുതൽ ശക്തിപ്പെടുത്തുന്നതായും രാഷ്ട്രപതി പറഞ്ഞു.

ഓണം എല്ലാവരുടെയും ജീവിതത്തിൽ സന്തോഷവും സമാധാനവും ആയുരാരോഗ്യവും ഐശ്വര്യവും നിറയ്ക്കട്ടെയെന്നും ദ്രൗപതി മുർമു ആശംസിച്ചു. പുതിയ വിളവെടുപ്പ് കാലത്ത് പ്രകൃതിയോട് നന്ദി പ്രകടിപ്പിക്കാനുള്ള അവസരം കൂടിയാണ് ഓണമെന്നും അവർ ചൂണ്ടിക്കാട്ടി. രാജ്യത്തിന്റെ പുരോഗതിക്കായി പ്രവർത്തിക്കാൻ ഓണം എല്ലാവർക്കും പ്രചോദനമാകട്ടെയെന്നും രാഷ്ട്രപതി ആശംസിച്ചു.

വള്ളംകളി, നാടൻ കലകൾ, സംഗീതം, കായിക വിനോദങ്ങൾ തുടങ്ങിയ ഓണാഘോഷങ്ങളിലെ പാരമ്പര്യങ്ങൾ കേരളത്തിന്റെ തനത് സംസ്കാരത്തെയും മൂല്യങ്ങളെയും പ്രതിഫലിപ്പിക്കുന്നതായും രാഷ്ട്രപതി കൂട്ടിച്ചേർത്തു.

അതേസമയം, പ്രതിസന്ധികളെ അതിജീവിക്കാനും ആത്മവിശ്വാസത്തോടെ മുന്നോട്ടുപോകാനും പ്രചോദനം നൽകുന്നതാണ് ഓരോ ഓണാഘോഷങ്ങളുമെന്ന് മുഖ്യമന്ത്രി വി.ഡി. സതീശൻ ആശംസാ സന്ദേശത്തിൽ പറഞ്ഞു. പ്രതിസന്ധി ഘട്ടങ്ങളിൽ നമ്മൾ ഒറ്റയ്ക്കല്ലെന്ന തിരിച്ചറിവ് നൽകുന്നതാണ് ഓണത്തിന്റെ സന്ദേശമെന്നും അദ്ദേഹം വ്യക്തമാക്കി.

സങ്കടങ്ങളും പ്രയാസങ്ങളും മാറ്റിവെച്ച് കുടുംബാംഗങ്ങൾക്കും സുഹൃത്തുക്കൾക്കുമൊപ്പം എല്ലാവർക്കും സന്തോഷത്തോടെ ഓണം ആഘോഷിക്കാൻ സാധിക്കട്ടെയെന്നും മുഖ്യമന്ത്രി ആശംസിച്ചു.

Story Summary:
Prime Minister Narendra Modi, President Droupadi Murmu and Kerala Chief Minister V.D. Satheesan extended Onam greetings to Malayalis. Their messages highlighted Onam as a celebration of happiness, unity, prosperity, cultural heritage, gratitude to nature and the strength to overcome challenges.