കാർ നിയന്ത്രണം വിട്ട് മതിലിലിടിച്ചു; തീപിടിച്ച വാഹനത്തിനുള്ളിൽ കുടുങ്ങി വയോധികന് ദാരുണാന്ത്യം | Kozhikode car accident

കോഴിക്കോട്: കാർ നിയന്ത്രണം വിട്ട് മതിലിലിടിച്ച് തീപിടിച്ചുണ്ടായ അപകടത്തിൽ വയോധികന് ദാരുണാന്ത്യം. ചേവായൂർ സ്വദേശി, വാഹന-വസ്തു ഇടപാട് വ്യാപാരിയായ സി.പി. സുധാകരനാണ് മരിച്ചത് (Kozhikode car accident). ഇന്ന് പുലർച്ചെ നാലുമണിയോടെയാണ് അപകടമുണ്ടായത്. ബിസിനസ് ആവശ്യത്തിനായി വീട്ടിൽനിന്ന് കൊയിലാണ്ടിയിലേക്ക് പോകുന്നതിനിടെയാണ് അപകടം. വീടിന് സമീപത്തെ ഇറക്കത്തിൽ വാഹനം ഓടിച്ചുവരുന്നതിനിടെ നിയന്ത്രണം നഷ്ടപ്പെട്ട കാർ ആദ്യം റോഡരികിലെ ട്രാൻസ്ഫോർമറിന് സമീപം ഇടിക്കുകയും തുടർന്ന് ശക്തമായി മതിലിൽ ഇടിച്ചുകയറുകയുമായിരുന്നു.

ഇടിയുടെ ആഘാതത്തിന് പിന്നാലെ കാറിന് തീപിടിച്ചു. വാഹനത്തിനുള്ളിൽ കുടുങ്ങിയ സുധാകരന് പുറത്തേക്ക് ഇറങ്ങാൻ സാധിച്ചില്ല. തീ പടരുന്നത് ശ്രദ്ധയിൽപ്പെട്ട നാട്ടുകാർ ഉടൻ അഗ്നിരക്ഷാസേനയെ വിവരമറിയിച്ചു. നാട്ടുകാർ സ്ഥലത്തെത്തുമ്പോഴേക്കും കാർ പൂർണമായും തീപിടിച്ച നിലയിലായിരുന്നു. ഏകദേശം 15 മിനിറ്റോളം വാഹനം കത്തിയതായാണ് വിവരം. അഗ്നിരക്ഷാസേന സ്ഥലത്തെത്തി തീയണച്ചെങ്കിലും അപ്പോഴേക്കും സുധാകരന്റെ ജീവൻ നഷ്ടപ്പെട്ടിരുന്നു. വിവരമറിഞ്ഞ് പൊലീസും സ്ഥലത്തെത്തി തുടർനടപടികൾ സ്വീകരിച്ചു. അപകടത്തിന്റെ കൃത്യമായ സാഹചര്യം സംബന്ധിച്ച് പൊലീസ് പരിശോധന നടത്തി വരികയാണ്.

Summary: A car lost control near the driver’s home in Kozhikode and crashed into a wall before catching fire. The elderly driver, identified as C.P. Sudhakaran, was trapped inside the vehicle and died in the accident.