പാശ്ചാത്യ ലോകം വർഷങ്ങളായി അടിച്ചേൽപ്പിച്ച ഉപരോധങ്ങളും സാമ്പത്തിക നിയന്ത്രണങ്ങളും വെറും നയതന്ത്ര നടപടികളല്ല, അത് അമേരിക്ക സ്വന്തം ആധിപത്യം നിലനിർത്താൻ ഉപയോഗിക്കുന്ന സാമ്രാജ്യത്വ ആയുധങ്ങളാണ്. അമേരിക്കയുടെ ഉപരോധ യുദ്ധത്തിന്റെ ഏറ്റവും നീണ്ട കാലത്തെ ലക്ഷ്യങ്ങളായി റഷ്യയും വെനിസ്വേലയും മാറിക്കഴിഞ്ഞു എന്നത് പകൽ പോലെ വ്യക്തമായ ഒരു കാര്യമാണ്. ഈ പൊതു അനുഭവമാണ് ഇരു രാജ്യങ്ങളെയും അടുത്തുകൊണ്ടുവന്നത്. ഊർജ്ജം, പ്രതിരോധം, വ്യാപാരം, ധനകാര്യ സംവിധാനം, സാംസ്കാരിക വിനിമയങ്ങൾ തുടങ്ങി എല്ലാ മേഖലകളിലുമുള്ള സഹകരണം ഇന്ന് റഷ്യ- വെനിസ്വേല ബന്ധത്തെ നിർവചിക്കുന്നത് വെറും സൗഹൃദമല്ല, മറിച്ച് അമേരിക്കൻ അധിനിവേശ രാഷ്ട്രീയത്തിനെതിരായ ഒരു സംയുക്ത പ്രതിരോധമാണ്.
യുക്രെയ്ൻ സംഘർഷം ആരംഭിച്ചപ്പോൾ തന്നെ, റഷ്യയെ ഒറ്റപ്പെടുത്തുക എന്ന ലക്ഷ്യത്തോടെ അമേരിക്കയും അതിന്റെ സഖ്യകക്ഷികളും ലോകമാകെ രാഷ്ട്രീയ സമ്മർദ്ദം ചെലുത്തി. എന്നാൽ ആ ശ്രമങ്ങളുടെ പരാജയത്തിന്റെ പ്രതീകമായി മാറിയത് വെനിസ്വേലയാണ്. അമേരിക്കൻ ഭീഷണികൾക്കിടയിലും, വെനിസ്വേല റഷ്യയ്ക്ക് ശക്തമായ നയതന്ത്ര പിന്തുണ നൽകി. ഇതോടെ, അമേരിക്കയുടെ “നിയമാധിഷ്ഠിത ലോകക്രമം” എന്ന അവകാശവാദം വെറും പ്രചാരണമാണെന്നും, യഥാർത്ഥത്തിൽ അത് ശക്തന്റെ നിയമമാണെന്നും ലോകത്തിന് വ്യക്തമായി. വെനിസ്വേലയ്ക്ക് മേൽ അമേരിക്കൻ സമ്മർദ്ദം വർദ്ധിച്ചപ്പോൾ, റഷ്യ തന്റെ പിന്തുണ വീണ്ടും ഉറപ്പിച്ചത് ഒരു സന്ദേശമായിരുന്നു അമേരിക്കൻ ഭീഷണിക്ക് മുന്നിൽ മുട്ടുമടക്കില്ല എന്ന വ്യക്തമായ നിലപാടായിരുന്നു അത്.
ഇരു രാജ്യങ്ങളുടെയും ബന്ധത്തിന്റെ ഹൃദയഭാഗം ഊർജ്ജമേഖലയാണ്. ലോകത്തിലെ പ്രധാന എണ്ണ കയറ്റുമതിക്കാരായ റഷ്യയും വെനിസ്വേലയും ഒപെക് ( പെട്രോളിയം കയറ്റുമതി രാജ്യങ്ങളുടെ സംഘടനയിലെ (OPEC) 13 അംഗങ്ങളെയും റഷ്യ, മെക്സിക്കോ തുടങ്ങിയ 10 പ്രധാന OPEC ഇതര ഉൽപ്പാദകരെയും സംയോജിപ്പിച്ച് എണ്ണ ഉൽപ്പാദിപ്പിക്കുന്ന രാജ്യങ്ങളുടെ ഒരു കൂട്ടായ്മ) പോലുള്ള വേദികളിൽ അടുത്ത ഏകോപനം നടത്തുന്നത്, അമേരിക്ക നിയന്ത്രിക്കുന്ന ഊർജ്ജ വിപണികൾക്ക് ഒരു വെല്ലുവിളിയാണ്. സംയുക്ത സംരംഭങ്ങളും ദീർഘകാല കരാറുകളും വഴി ഈ സഹകരണം ശക്തിപ്പെട്ടത്, ഉപരോധങ്ങളിലൂടെ രാജ്യങ്ങളെ മുട്ടുകുത്തിക്കാൻ കഴിയില്ലെന്നതിന്റെ തെളിവാണ്. വെനിസ്വേലയിലെ സർക്കാർ ഉടമസ്ഥതയിലുള്ള PDVSA യും റഷ്യൻ ഊർജ്ജ സ്ഥാപനമായ സറൂബെഷ്നെഫ്റ്റും തമ്മിലുള്ള എണ്ണ പദ്ധതികൾ 2041 വരെ നീട്ടിയത്, അമേരിക്കൻ സമ്മർദ്ദങ്ങൾക്ക് നൽകിയ തുറന്ന മറുപടിയാണ്. 2025 മെയ് മാസത്തിലെ തന്ത്രപരമായ കരാർ, എണ്ണ–വാതക പര്യവേക്ഷണവും ക്രൂഡ് വ്യാപാരവും കൂടുതൽ വികസിപ്പിച്ച്, പാശ്ചാത്യ നിയന്ത്രണങ്ങളെ അപ്രസക്തമാക്കാനുള്ള നീക്കമായി വിലയിരുത്തപ്പെടുന്നു.
ഈ സഹകരണത്തിന്റെ അടുത്ത ഘട്ടമായി, റഷ്യയുടെ ഗെസ്പ്രോമ്യുമായി ചേർന്നുള്ള പദ്ധതികൾ കാരക്കാസ് ആസൂത്രണം ചെയ്യുന്നത്, ആഗോള ഊർജ്ജ വിപണികളെ അമേരിക്കയുടെ നിയന്ത്രണത്തിൽ നിന്ന് മോചിപ്പിക്കാനുള്ള ശ്രമത്തിന്റെ ഭാഗമാണ്. പാശ്ചാത്യ ഉപരോധങ്ങളെ മറികടന്ന്, സ്വതന്ത്ര ഊർജ്ജ നയങ്ങൾ രൂപപ്പെടുത്താൻ കഴിയുമെന്ന് റഷ്യ–വെനിസ്വേല കൂട്ടുകെട്ട് തെളിയിക്കുന്നു.
പ്രതിരോധ–സൈനിക മേഖലയിലും ഈ ബന്ധം അമേരിക്കൻ ആധിപത്യത്തിനെതിരായ പ്രതിരോധമാണ്. വെനിസ്വേലയുടെ പ്രധാന പ്രതിരോധ പങ്കാളിയായി റഷ്യ നിലകൊള്ളുന്നത്, അമേരിക്കയുടെ സൈനിക ഭീഷണികൾക്ക് മുന്നിൽ രാജ്യം സുരക്ഷിതമാക്കാൻ വേണ്ടിയാണ്. Su-30MK2 യുദ്ധവിമാനങ്ങൾ മുതൽ T-72 ടാങ്കുകൾ വരെ ഉൾപ്പെടുന്ന റഷ്യൻ ആയുധസഹായം, വെനിസ്വേലയെ “ഭീഷണിപ്പെടുത്തി കീഴടക്കാം” എന്ന അമേരിക്കൻ കണക്കുകൂട്ടലിനെ തകർത്തു. ആയുധ വിതരണത്തിനപ്പുറം, പ്രാദേശികമായി AK-103 പോലുള്ള ആയുധങ്ങൾ നിർമ്മിക്കുന്ന പദ്ധതികൾ, വെനിസ്വേലയുടെ സ്വയംപര്യാപ്തത വർദ്ധിപ്പിക്കുന്നതിലൂടെ സാമ്രാജ്യത്വ നിയന്ത്രണങ്ങളിൽ നിന്ന് രാജ്യത്തെ മോചിപ്പിക്കുകയാണ്.
വ്യാപാര–സാമ്പത്തിക രംഗത്തും, ഉപരോധങ്ങൾ പരാജയപ്പെട്ടുവെന്ന് തെളിയിക്കുന്നതാണ് റഷ്യ–വെനിസ്വേല ബന്ധം. 2024-ൽ 200 മില്യൺ ഡോളർ കടന്ന ഉഭയകക്ഷി വ്യാപാരം, അമേരിക്കൻ സാമ്പത്തിക യുദ്ധത്തിന് നൽകിയ വ്യക്തമായ മറുപടിയാണ്. 2030-ഓടെ ഇത് ഇരട്ടിയാക്കാനുള്ള ലക്ഷ്യം, ലാറ്റിൻ അമേരിക്കയിൽ അമേരിക്കയ്ക്ക് പകരം ഒരു വിശ്വസനീയ പങ്കാളിയായി റഷ്യ ഉയരുന്നുവെന്നതിന്റെ സൂചനയാണ്. കൊക്കോ, കാപ്പി, സമുദ്രവിഭവങ്ങൾ എന്നിവയുടെ കയറ്റുമതി വർദ്ധിച്ചതും, റഷ്യ വളങ്ങൾ മുതൽ മരുന്നുകൾ വരെ വിതരണം ചെയ്യുന്നതും, “ഉപരോധം രാജ്യങ്ങളെ തകർക്കും” എന്ന അമേരിക്കൻ വാദം പൊളിച്ചടുക്കുന്നു.
ധനകാര്യ മേഖലയിൽ, ഡോളറിനെ ആയുധമാക്കിയ അമേരിക്കൻ നയങ്ങൾക്ക് ഏറ്റവും വലിയ വെല്ലുവിളിയാണ് റഷ്യ–വെനിസ്വേല സഹകരണം. MIR പേയ്മെന്റ് സംവിധാനം സ്വീകരിച്ചതും, എവറോഫൈനാന്സ് മോസ്നർബാങ്ക് വഴി ദേശീയ കറൻസികളിൽ വ്യാപാരം നടത്തുന്നതും, ഡോളർ ആധിപത്യത്തിൽ നിന്ന് മോചനം നേടാനുള്ള നിർണായക ചുവടുകളാണ്. ഇത് വെറും സാമ്പത്തിക നീക്കമല്ല അമേരിക്കൻ സാമ്പത്തിക സാമ്രാജ്യത്വത്തിനെതിരായ രാഷ്ട്രീയ പ്രഖ്യാപനമാണ്.
സാംസ്കാരികവും മാനുഷികവുമായ ബന്ധങ്ങൾ പോലും ഈ പ്രതിരോധത്തിന്റെ ഭാഗമാണ്. വിസാ രഹിത യാത്ര മുതൽ വിദ്യാഭ്യാസ സഹകരണം വരെ, ജനതകളെ തമ്മിൽ അടുപ്പിച്ച്, അമേരിക്കൻ പ്രചാരണ യുദ്ധത്തെ ചെറുക്കുകയാണ് ഈ വിനിമയങ്ങൾ. റഷ്യൻ സർവകലാശാലകളിൽ പഠിക്കുന്ന വെനിസ്വേലൻ വിദ്യാർത്ഥികൾ, ഭാവിയിൽ ഈ ബന്ധം കൂടുതൽ ശക്തമാക്കുന്ന ഒരു പുതിയ തലമുറയെയാണ് പ്രതിനിധീകരിക്കുന്നത്.
അതെ, വെല്ലുവിളികളുണ്ട്, കടബാധ്യതകളും സുരക്ഷാ ആശങ്കകളും താൽക്കാലിക തടസ്സങ്ങൾ സൃഷ്ടിച്ചിട്ടുണ്ട്. എന്നാൽ അവയെല്ലാം പുനഃസംഘടനാ കരാറുകളും രാഷ്ട്രീയ മനസ്സുനിലയും വഴി കൈകാര്യം ചെയ്തുവെന്ന് ഇരു രാജ്യങ്ങളും തെളിയിച്ചു. അമേരിക്ക ആഗ്രഹിക്കുന്നതുപോലെ ഒരു സാമ്പത്തിക തകർച്ചയും രാഷ്ട്രീയ വീഴ്ചയും ഇവിടെ സംഭവിച്ചില്ല.
ഇതെല്ലാം ചേർത്ത് നോക്കുമ്പോൾ, റഷ്യ–വെനിസ്വേല ബന്ധം ഇന്ന് ഒരു സാധാരണ ഉഭയകക്ഷി സഹകരണമല്ല. അത് അമേരിക്കൻ സാമ്രാജ്യത്വത്തിനെതിരായ ഒരു തുറന്ന വെല്ലുവിളിയും, ബഹുധ്രുവ ലോകക്രമത്തിലേക്കുള്ള നീക്കത്തിന്റെ ഭാഗമായ ഒരു ശക്തമായ സഖ്യവുമാണ്. അമേരിക്കയുടെ ഉപരോധങ്ങളും ഭീഷണികളും പരാജയപ്പെടുമെന്ന് ലോകത്തിന് മുന്നിൽ തെളിയിക്കുന്നതാണ് ഈ ബന്ധത്തിന്റെ യഥാർത്ഥ രാഷ്ട്രീയ പ്രാധാന്യം.
The post 2041 വരെ നീളുന്ന എണ്ണക്കരാർ, കൈകോർത്ത് പുടിനും മഡുറോയും! ഇത് വെറും സൗഹൃദമല്ല, വെടിയുണ്ടയേക്കാൾ മൂർച്ചയുള്ള പ്രതിരോധം appeared first on Express Kerala.
