അമേരിക്ക വിചാരിച്ചത്ര എളുപ്പമല്ല കാര്യങ്ങൾ! വെനിസ്വേലയിലെ ‘കട്ടിയുള്ള എണ്ണ’ ശുദ്ധീകരിക്കാൻ ട്രംപ് വിയർക്കും…

വെനിസ്വേലൻ പ്രസിഡന്റ് നിക്കോളാസ് മഡുറോയെ പിടികൂടിയതിന് പിന്നാലെ രാജ്യം “സുരക്ഷിതമായ ഒരു പരിവർത്തനത്തിലേക്ക്” നയിക്കുമെന്ന് പ്രഖ്യാപിച്ച അമേരിക്കയുടെ നടപടി, ആഗോള രാഷ്ട്രീയത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്. ഒരു സ്വതന്ത്ര പരമാധികാര രാഷ്ട്രത്തിന്റെ ആഭ്യന്തര കാര്യങ്ങളിൽ ബലംപ്രയോഗിച്ച് ഇടപെടുക മാത്രമല്ല, അതേ ശ്വാസത്തിൽ അവിടുത്തെ എണ്ണ സമ്പത്ത് സ്വന്തം എണ്ണക്കമ്പനികൾക്കായി ഉപയോഗപ്പെടുത്തുമെന്ന് പരസ്യമായി പ്രഖ്യാപിച്ചതിലൂടെ, അമേരിക്കൻ വിദേശനയത്തിന്റെ യഥാർത്ഥ ലക്ഷ്യം ലോകത്തിന് മുന്നിൽ വീണ്ടും നഗ്നമായി വെളിപ്പെട്ടിരിക്കുകയാണ്, മാത്രമല്ല മറ്റൊരു രാജ്യത്തിന്റെ പരമാധികാരത്തിന് പുല്ലുവില കൽപ്പിച്ചുകൊണ്ട്, അവിടുത്തെ വിഭവങ്ങൾ സ്വന്തം ലാഭത്തിനായി പങ്കിട്ടെടുക്കാൻ തുനിയുന്ന അമേരിക്കയുടെ ഈ സാമ്രാജ്യത്വ ബുദ്ധി ലോകത്തിന് മുന്നിൽ ഒരിക്കൽ കൂടി പരിഹാസ്യമാവുകയാണ്.

പ്രസിഡന്റ് ഡോണാൾഡ് ട്രംപ്, ലോകത്തിലെ ഏറ്റവും വലിയ അസംസ്കൃത എണ്ണ ശേഖരം ഉള്ള രാജ്യമായ വെനിസ്വേലയിലെ ഇതുവരെ പൂർണ്ണമായി ഉപയോഗിക്കപ്പെടാത്ത വിഭവങ്ങൾ അമേരിക്കൻ എണ്ണക്കമ്പനികൾ മുഖേന കൈപ്പിടിയിലാക്കുമെന്ന് തുറന്നടിച്ച് പറഞ്ഞത്, ഈ ഇടപെടലിന്റെ ആന്തരിക പ്രേരണ എന്താണെന്നതിൽ ഒരു സംശയവും ശേഷിപ്പിക്കുന്നില്ല. വെനിസ്വേലയുടെ “മോശമായി തകർന്ന” എണ്ണ അടിസ്ഥാന സൗകര്യങ്ങൾ അമേരിക്കൻ കമ്പനികൾ പുനർനിർമിക്കുമെന്നും, അതുവഴി രാജ്യം “വീണ്ടും പണം സമ്പാദിക്കാൻ തുടങ്ങുമെന്നും” ട്രംപ് അവകാശപ്പെടുമ്പോൾ, വെനിസ്വേലൻ ജനതയുടെ പരമാധികാരമോ സ്വയംനിർണ്ണയാവകാശമോ അദ്ദേഹത്തിന്റെ കണക്കുകൂട്ടലുകളിൽ എവിടെയും ഇടംപിടിക്കുന്നില്ല. മനുഷ്യാവകാശത്തിന്റെ പേരിൽ കടന്നുകയറുകയും, എണ്ണയുടെ പേരിൽ നിയന്ത്രണം പിടിച്ചെടുക്കുകയും ചെയ്യുന്ന ഈ സമീപനമാണ്, അമേരിക്കൻ സാമ്രാജ്യത്വത്തിന്റെ ഏറ്റവും തുറന്ന രാഷ്ട്രീയ പ്രകടനമായി ഇവിടെ പുറത്തുവരുന്നത്.

എന്നാൽ ഈ പ്രഖ്യാപനങ്ങൾ കേൾക്കുമ്പോൾ എളുപ്പത്തിൽ നടപ്പാക്കാൻ കഴിയുന്ന പദ്ധതിയായി തോന്നിയാലും, യാഥാർത്ഥ്യം അത്ര ലളിതമല്ലെന്നാണ് ഊർജ്ജ മേഖലയിലെ വിദഗ്ധർ മുന്നറിയിപ്പ് നൽകുന്നത്. വെനിസ്വേലയിൽ എണ്ണ ഉൽപ്പാദനം ഗണ്യമായി വർദ്ധിപ്പിക്കണമെങ്കിൽ കോടിക്കണക്കിന് ഡോളറുകളുടെ നിക്ഷേപം ആവശ്യമായി വരുമെന്നും, അതിന്റെ ഫലം കാണാൻ ഒരു ദശാബ്ദം വരെ എടുക്കാമെന്നുമാണ് വിലയിരുത്തൽ. ഇതോടെയാണ് “വെനിസ്വേലയുടെ എണ്ണ ശേഖരത്തിന്റെ നിയന്ത്രണം അമേരിക്കക്ക് ശരിക്കും ഏറ്റെടുക്കാനാകുമോ?” എന്ന ചോദ്യവും, “ട്രംപിന്റെ പദ്ധതി യാഥാർത്ഥ്യമാകുമോ?” എന്ന സംശയവും ശക്തമായി ഉയരുന്നത്.

ഏകദേശം 303 ബില്യൺ ബാരൽ അസംസ്കൃത എണ്ണ ശേഖരമുള്ള വെനിസ്വേല ലോകത്തിലെ ഏറ്റവും വലിയ തെളിയിക്കപ്പെട്ട എണ്ണ ശേഖരമുള്ള രാജ്യമാണെങ്കിലും, ഇന്ന് രാജ്യം ഉൽപ്പാദിപ്പിക്കുന്ന എണ്ണയുടെ അളവ് അതിനോട് താരതമ്യപ്പെടുത്തുമ്പോൾ വളരെ ചെറുതാണ്. 2000-കളുടെ തുടക്കം മുതൽ എണ്ണമേഖലയിലെ പ്രവർത്തനങ്ങൾ കടുത്ത വെല്ലുവിളികളിലൂടെയാണ് കടന്നുപോകുന്നത്. മുൻപ് പൊതുമേഖലാ എണ്ണക്കമ്പനിയായ PDVSA-യുടെ പ്രവർത്തനങ്ങളിൽ വരുത്തിയ മാറ്റങ്ങളും ഘടനാപരമായ പുനഃക്രമീകരണങ്ങളും ഉൽപ്പാദനത്തെ ബാധിച്ചിരുന്നു. ഇതിന്റെ ഫലമായി സാങ്കേതിക വിദഗ്ധരുടെ കുറവുണ്ടാവുകയും പ്രവർത്തനക്ഷമത കുറയുകയും ചെയ്തു.

ഇന്നും ഷെവ്‌റോൺ പോലുള്ള ചില പാശ്ചാത്യ എണ്ണക്കമ്പനികൾ വെനിസ്വേലയിൽ സാന്നിധ്യം നിലനിർത്തുന്നുണ്ടെങ്കിലും, അമേരിക്കൻ ഉപരോധങ്ങൾ ശക്തമായതോടെ അവയുടെ പ്രവർത്തനങ്ങൾ ഗണ്യമായി ചുരുങ്ങി. മഡുറോ ഭരണകൂടത്തിന്റെ പ്രധാന സാമ്പത്തിക വരുമാന മാർഗമായ എണ്ണ കയറ്റുമതി തടയുക എന്നതാണ് ഈ ഉപരോധങ്ങളുടെ മുഖ്യലക്ഷ്യം. മനുഷ്യാവകാശ ലംഘനങ്ങൾ ചൂണ്ടിക്കാട്ടി 2015-ൽ, മുൻ പ്രസിഡന്റ് ബരാക് ഒബാമയുടെ ഭരണകാലത്താണ് അമേരിക്ക ആദ്യമായി വെനിസ്വേലയ്ക്ക് മേൽ ഉപരോധങ്ങൾ ഏർപ്പെടുത്തിയത്. അതിനുശേഷം, രാജ്യം അന്താരാഷ്ട്ര നിക്ഷേപങ്ങളിൽ നിന്നും ആവശ്യമായ സാങ്കേതിക സഹായങ്ങളിൽ നിന്നും വലിയ തോതിൽ വിച്ഛേദിക്കപ്പെട്ടു.

വെനിസ്വേല നേരിടുന്ന യഥാർത്ഥ വെല്ലുവിളി എണ്ണ ശേഖരമല്ല, മറിച്ച് അതിന്റെ അടിസ്ഥാന സൗകര്യങ്ങളാണെന്ന് വിദഗ്ധർ പറയുന്നു. ഇൻവെസ്റ്റെക്കിലെ കമ്മോഡിറ്റി വിഭാഗം മേധാവി കല്ലം മാക്ഫെർസന്റെ അഭിപ്രായത്തിൽ, പതിറ്റാണ്ടുകളായി ആവശ്യമായ നിക്ഷേപം ലഭിക്കാത്തതാണ് ഇന്നത്തെ തകർച്ചയ്ക്ക് കാരണം. ഇന്റർനാഷണൽ എനർജി ഏജൻസിയുടെ കണക്കുകൾ പ്രകാരം, 2024 നവംബറിൽ വെനിസ്വേലയുടെ പ്രതിദിന എണ്ണ ഉൽപ്പാദനം 860,000 ബാരലിലൊതുങ്ങി. ഇത് പത്ത് വർഷം മുമ്പുണ്ടായിരുന്നതിന്റെ ഏകദേശം മൂന്നിലൊന്നാണ്, കൂടാതെ ആഗോള എണ്ണ ഉപഭോഗത്തിന്റെ ഒരു ശതമാനത്തിൽ താഴെ മാത്രവുമാണ്.

വെനിസ്വേലയിലെ എണ്ണ ശേഖരത്തിന്റെ മറ്റൊരു വെല്ലുവിളി അതിന്റെ ഗുണനിലവാരമാണ്. ഇവിടെ കൂടുതലായി കാണപ്പെടുന്നത് “കട്ടിയുള്ള, ” എണ്ണയാണ്. ഇത് ശുദ്ധീകരിക്കാൻ കൂടുതൽ ചെലവും സാങ്കേതിക ശേഷിയും ആവശ്യമാണ്. ഡീസൽ, അസ്ഫാൽറ്റ് പോലുള്ള ഉൽപ്പന്നങ്ങൾ നിർമ്മിക്കാൻ ഇത് ഉപയോഗപ്രദമാണെങ്കിലും, അമേരിക്കയിൽ സാധാരണയായി ഉൽപ്പാദിപ്പിക്കുന്ന “ലൈറ്റ്” എണ്ണയേക്കാൾ ഇത് വ്യാപാരപരമായി കൂടുതൽ ബുദ്ധിമുട്ടുള്ളതാണ്.

മഡുറോയെ പിടികൂടുന്നതിനും സൈനിക നടപടികൾ ആരംഭിക്കുന്നതിനും മുൻപ് തന്നെ, വെനിസ്വേലയുടെ തീരത്ത് നിന്ന് രണ്ട് എണ്ണ ടാങ്കറുകൾ അമേരിക്ക പിടിച്ചെടുത്തതും, രാജ്യത്തേക്ക് വരുന്നതും പോകുന്നതുമായ ടാങ്കറുകൾ തടയാൻ ഉത്തരവിട്ടതും സ്ഥിതിഗതികൾ കൂടുതൽ സങ്കീർണ്ണമാക്കി. ഈ നടപടികൾ ലോകമെമ്പാടുമുള്ള സ്വേച്ഛാധിപത്യ ശക്തികൾക്ക് ഒരു അപകടകരമായ മാതൃകയാകുമെന്ന് ചില അന്താരാഷ്ട്ര നിരീക്ഷകർ മുന്നറിയിപ്പ് നൽകി.

വെനിസ്വേലയുടെ എണ്ണ ശേഖരം ഉപയോഗപ്പെടുത്താൻ ആഗ്രഹിക്കുന്ന കമ്പനികൾക്ക് ഏറ്റവും വലിയ തടസ്സങ്ങൾ നിയമപരവും രാഷ്ട്രീയവുമാണെന്ന് ഡാറ്റാ പ്ലാറ്റ്‌ഫോമായ കെപ്ലറിലെ സീനിയർ അനലിസ്റ്റ് ഹോമയൂൺ ഫലാക്ഷാഹി ചൂണ്ടിക്കാട്ടുന്നു. നിലവിലെ സാഹചര്യത്തിൽ, വെനിസ്വേലയിൽ വലിയ നിക്ഷേപം നടത്തണമെങ്കിൽ സർക്കാർതല കരാറുകൾ അനിവാര്യമാണ്. മഡുറോയുടെ പിൻഗാമിയായ ഒരു പുതിയ സർക്കാർ നിലവിൽ വരുന്നതുവരെ ഇത്തരം കരാറുകൾ സാധ്യമാകില്ലെന്നും അദ്ദേഹം പറയുന്നു. അങ്ങനെ സംഭവിച്ചാലും, ഭാവിയിലെ സർക്കാരിന്റെ സ്ഥിരത ഉറപ്പാക്കാതെ കോടിക്കണക്കിന് ഡോളറുകൾ നിക്ഷേപിക്കാൻ കമ്പനികൾ തയ്യാറാകുമോയെന്നത് വലിയ ചോദ്യമാണ്.

ക്യാപിറ്റൽ ഇക്കണോമിക്സിലെ ചീഫ് ഇക്കണോമിസ്റ്റ് നീൽ ഷിയറിങ്ങിന്റെ അഭിപ്രായത്തിൽ, ട്രംപിന്റെ പദ്ധതികൾ ആഗോള എണ്ണ വിതരണത്തിലും വിലയിലും ഹ്രസ്വകാലത്ത് വലിയ സ്വാധീനം ചെലുത്താൻ സാധ്യതയില്ല. മറികടക്കേണ്ട നിരവധി തടസ്സങ്ങളുള്ളതിനാൽ, 2026 വരെ പോലും എണ്ണവിലയിൽ ഗണ്യമായ മാറ്റമുണ്ടാകില്ലെന്നാണ് അദ്ദേഹത്തിന്റെ വിലയിരുത്തൽ. സ്ഥിരതയുള്ള ഒരു സർക്കാർ രൂപപ്പെടുന്നതുവരെ വലിയ എണ്ണക്കമ്പനികൾ വെനിസ്വേലയിൽ നിക്ഷേപം നടത്താൻ സാധ്യത കുറവാണെന്നും, അദ്ദേഹം മുന്നറിയിപ്പ് നൽകി.

2022-ൽ മുൻ പ്രസിഡന്റ് ജോ ബൈഡൻയുടെ ഭരണകാലത്ത് പ്രത്യേക ലൈസൻസ് ലഭിച്ചതിന് ശേഷമാണ് ഷെവ്‌റോൺ വെനിസ്വേലയിൽ പ്രവർത്തനം തുടരുന്നത്. നിലവിൽ രാജ്യത്തെ എണ്ണ ഉൽപ്പാദനത്തിന്റെ ഏകദേശം അഞ്ചിലൊന്ന് ഭാഗം ഷെവ്‌റണിന്റെ പങ്കാളിത്തത്തിലുള്ള പദ്ധതികളിൽ നിന്നാണ്. കമ്പനി തങ്ങളുടെ ജീവനക്കാരുടെ സുരക്ഷയ്ക്ക് മുൻഗണന നൽകുന്നുണ്ടെന്നും, എല്ലാ നിയമങ്ങളും ചട്ടങ്ങളും പാലിച്ചാണ് പ്രവർത്തിക്കുന്നതെന്നും വ്യക്തമാക്കിയിട്ടുണ്ട്. മറ്റ് പ്രധാന എണ്ണക്കമ്പനികൾ ഇതുവരെ പരസ്യ പ്രതികരണം നടത്തിയിട്ടില്ലെങ്കിലും, ഈ അവസരം ഉപയോഗപ്പെടുത്തണോ എന്ന കാര്യത്തിൽ ആന്തരിക ചർച്ചകൾ നടക്കുന്നതായി വിദഗ്ധർ പറയുന്നു.

രാഷ്ട്രീയ അനിശ്ചിതത്വം വലിയതായിരിക്കുമ്പോഴും, വെനിസ്വേലയിലെ എണ്ണ ശേഖരം നൽകുന്ന സാധ്യത “അവഗണിക്കാനാവാത്തത്ര വലുതാണ്” എന്നതാണ് പലരുടെയും വിലയിരുത്തൽ. അതിനാൽ, ട്രംപിന്റെ പ്രഖ്യാപനങ്ങൾ തൽക്ഷണമായി യാഥാർത്ഥ്യമാകില്ലെങ്കിലും, ദീർഘകാലത്തിൽ വെനിസ്വേലയുടെ എണ്ണ സമ്പത്ത് ആഗോള രാഷ്ട്രീയ–സാമ്പത്തിക പോരാട്ടങ്ങളുടെ കേന്ദ്രമായി തുടരാൻ സാധ്യതയുണ്ടെന്ന് ഈ സാഹചര്യങ്ങൾ സൂചിപ്പിക്കുന്നു.

The post അമേരിക്ക വിചാരിച്ചത്ര എളുപ്പമല്ല കാര്യങ്ങൾ! വെനിസ്വേലയിലെ ‘കട്ടിയുള്ള എണ്ണ’ ശുദ്ധീകരിക്കാൻ ട്രംപ് വിയർക്കും… appeared first on Express Kerala.