സിഎംആർഎൽ-എക്സാലോജിക് ഇടപാട്: ഇഡി റിപ്പോർട്ട് വിജിലൻസിലേക്ക്; കേസ് എടുക്കുന്നതിൽ സർക്കാർ തീരുമാനം നിർണായകം | CMRL Exalogic case ED report
തിരുവനന്തപുരം: സിഎംആർഎൽ-എക്സാലോജിക് ഇടപാടുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയനും മുൻ മന്ത്രി പി.എ. മുഹമ്മദ് റിയാസിനുമുൾപ്പെടെ 13 പേർക്കെതിരെ അഴിമതി നിരോധന നിയമപ്രകാരം കേസെടുത്ത് അന്വേഷണം നടത്തണമെന്ന എൻഫോഴ്സ്മെന്റ് ഡയറക്ടറേറ്റിന്റെ (CMRL Exalogic case ED report) ശുപാർശ കേരള പൊലീസിന്റെ പരിഗണനയിൽ. റിപ്പോർട്ട് വിജിലൻസാണ് പരിശോധിക്കേണ്ടതെന്ന നിലപാടിലാണ് പൊലീസ്. ഇതിന്റെ അടിസ്ഥാനത്തിൽ ഡിജിപി ഇഡി റിപ്പോർട്ട് ആഭ്യന്തര സെക്രട്ടറിക്ക് കൈമാറി.
റിപ്പോർട്ട് വിജിലൻസിന് കൈമാറേണ്ട സമയവും തുടർനടപടികളും സംസ്ഥാന സർക്കാരാണ് തീരുമാനിക്കേണ്ടത്. വിഷയത്തിൽ നിയമോപദേശം തേടണമോയെന്നതടക്കമുള്ള കാര്യങ്ങൾ മുഖ്യമന്ത്രി-ആഭ്യന്തരമന്ത്രി തലത്തിലുള്ള കൂടിയാലോചനകൾക്ക് ശേഷമായിരിക്കും തീരുമാനിക്കുക എന്നാണ് വിവരം.
സിഎംആർഎൽ-എക്സാലോജിക് ഇടപാടുമായി ബന്ധപ്പെട്ട അന്വേഷണത്തിന്റെ ഭാഗമായി ലഭിച്ച മൊഴികളുടെ അടിസ്ഥാനത്തിലാണ് ഇഡി ഗുരുതരമായ ആരോപണങ്ങൾ ഉന്നയിച്ചിരിക്കുന്നത്. സിഎംആർഎല്ലിന്റെ മുൻ ചീഫ് ഫിനാൻഷ്യൽ ഓഫീസറും ചീഫ് ജനറൽ മാനേജരുമായിരുന്ന പി. സുരേഷ്കുമാറിന്റെ മൊഴി ചൂണ്ടിക്കാട്ടി, പിണറായി വിജയൻ മകൾ ടി. വീണ മുഖേന 3.28 കോടി രൂപ കൈക്കൂലിയായി കൈപ്പറ്റിയെന്നാണ് ഇഡിയുടെ റിപ്പോർട്ടിലെ ആരോപണം.
ഈ തുക വീണയും കൂട്ടാളികളും ദുബായിലേക്ക് കടത്താൻ ശ്രമിച്ചതായും ഇഡി റിപ്പോർട്ടിൽ പറയുന്നതായി റിപ്പോർട്ടുകളുണ്ട്. അതേസമയം, ആരോപണങ്ങൾ സംബന്ധിച്ച അന്തിമ വസ്തുതകൾ അന്വേഷണത്തിലൂടെയാണ് വ്യക്തമാകേണ്ടത്.
മുഹമ്മദ് റിയാസ് സുഹൃത്തുക്കൾ മുഖേന അഴിമതിപ്പണം വിദേശത്തേക്ക് കടത്താൻ സഹായിച്ചെന്നും സംസ്ഥാന പൊലീസ് മേധാവിക്ക് നൽകിയ കത്തിൽ ഇഡി ആരോപിക്കുന്നു. പിണറായി വിജയൻ, മുഹമ്മദ് റിയാസ്, ടി. വീണ, സിഎംആർഎൽ എം.ഡി. ശശിധരൻ കർത്ത, പി. സുരേഷ്കുമാർ എന്നിവരടക്കം സ്ഥാപനത്തിലെ ജീവനക്കാർ ഉൾപ്പെടെ 13 പേർക്കെതിരെ കേസ് രജിസ്റ്റർ ചെയ്ത് അന്വേഷണം നടത്തണമെന്നാണ് ഇഡിയുടെ ശുപാർശ.
റിപ്പോർട്ട് വിജിലൻസിന് കൈമാറിയ ശേഷം സ്വീകരിക്കേണ്ട തുടർനടപടികൾ സംബന്ധിച്ച സർക്കാർ തീരുമാനം കേസിൽ നിർണായകമാകും.
Story Summary:
The Enforcement Directorate has recommended registering a case under the Prevention of Corruption Act against Pinarayi Vijayan, P.A. Mohammed Riyas and 11 others in connection with the CMRL-Exalogic transaction. The Kerala Police has forwarded the ED report to the Home Secretary, with the government expected to decide on further action and whether to refer it to the Vigilance department.
