കാലിഫോര്ണിയ: സ്മാർട്ട് ഗാഡ്ജെറ്റുകളുടെ ലോകത്ത് വിപ്ലവകരമായ മാറ്റത്തിനൊരുങ്ങി എഐ ഭീമന്മാരായ ഓപ്പൺഎഐ. സോഫ്റ്റ്വെയർ രംഗത്തെ ആധിപത്യത്തിന് പിന്നാലെ ഹാർഡ്വെയർ വിപണിയിലേക്കും കമ്പനി ചുവടുവെക്കുകയാണ്. ‘ഗംഡ്രോപ്പ്’ എന്ന കോഡുനാമത്തിൽ വികസിപ്പിക്കുന്ന ഈ ഉപകരണം, ഐഫോണിന്റെ ഐതിഹാസിക ഡിസൈനർ ജോണി ഐവുമായി ചേർന്നാണ് ഓപ്പൺഎഐ രൂപകൽപ്പന ചെയ്യുന്നത്.
എന്താണ് ഈ ഗംഡ്രോപ്പ്?
കാഴ്ചയിൽ ഒരു സാധാരണ പേനയുടെ രൂപമാണെങ്കിലും, ഒരു സൂപ്പർ കമ്പ്യൂട്ടറിന്റെ പ്രോസസിംഗ് പവർ ഇതിനുണ്ടാകും. ഐപോഡ് ഷഫിളിന്റെ വലുപ്പമുള്ള ഈ ഉപകരണത്തിന് ഡിസ്പ്ലേ ഉണ്ടാകില്ല. പകരം ഹൈടെക് ക്യാമറകളും സെൻസറുകളും വഴി ഇത് പ്രവർത്തിക്കും. പേന ഉപയോഗിച്ച് എഴുതുന്ന കാര്യങ്ങൾ തൽക്ഷണം ഡിജിറ്റൽ ടെക്സ്റ്റാക്കി മാറ്റി ചാറ്റ് ജിപിടിയിലേക്ക് അപ്ലോഡ് ചെയ്യാൻ ഇതിന് സാധിക്കും. ഫോണില്ലാതെ തന്നെ ഇമെയിലുകൾ, സന്ദേശങ്ങൾ, കോളുകൾ എന്നിവ കൈകാര്യം ചെയ്യാം. മറ്റ് സ്മാർട്ട് ഉപകരണങ്ങളെ നിയന്ത്രിക്കാനും ഇതിന് കഴിയും.
സുരക്ഷാ കാരണങ്ങളാൽ ഫോക്സ്കോൺ ആയിരിക്കും ഇതിന്റെ നിർമ്മാതാക്കൾ. വിയറ്റ്നാമിലോ അമേരിക്കയിലോ വെച്ചായിരിക്കും ഉൽപ്പാദനം നടക്കുക.
സ്ക്രീൻ ഇല്ലാതെ ഗംഡ്രോപ്പ് എങ്ങനെ പ്രവർത്തിക്കും?
ഗംഡ്രോപ്പിന് ഒരു ഐപോഡ് ഷഫിളിന്റെ വലുപ്പമുണ്ടാകും. പക്ഷേ അതിന് സ്ക്രീൻ ഉണ്ടാകില്ല. ചുറ്റുപാടുകൾ കൃത്യമായി നിരീക്ഷിക്കാനും കേൾക്കാനും ശേഷിയുള്ള അത്യാധുനിക ക്യാമറകളും മൈക്രോഫോണുകളുമാണ് ഇതിൽ സജ്ജീകരിച്ചിരിക്കുന്നത്. നിങ്ങളുടെ കൈയക്ഷരം തിരിച്ചറിയാനും നിങ്ങൾ എഴുതുന്ന കുറിപ്പുകൾ തത്സമയം ഡിജിറ്റൽ രൂപത്തിലാക്കി ചാറ്റ് ജിപിടിയിലേക്ക് അപ്ലോഡ് ചെയ്യാനും ഈ ഉപകരണത്തിന് സാധിക്കും. വസ്ത്രത്തിൽ ധരിക്കാവുന്ന രീതിയിലോ പോക്കറ്റിൽ കൊണ്ടുനടക്കാവുന്ന രീതിയിലോ ആയിരിക്കും ഗംഡ്രോപ്പിന്റെ ഘടന.
സ്മാർട്ട്ഫോണുകളുടെ കാലം കഴിയുമോ?
ഭാവിയിൽ മനുഷ്യർക്ക് വലിയ സ്ക്രീനുകളുള്ള ഫോണുകളുടെ ആവശ്യം വരില്ലെന്നാണ് ഓപ്പൺഎഐയുടെ വിലയിരുത്തൽ. എഐ മോഡലുകൾ നേരിട്ട് ഉപകരണത്തിനുള്ളിൽ പ്രവർത്തിക്കുന്നതിനാൽ വളരെ വേഗത്തിൽ കാര്യങ്ങൾ ചെയ്യാൻ സാധിക്കും. 2026-27 കാലയളവിൽ ഗംഡ്രോപ്പ് വിപണിയിലെത്തുമെന്നാണ് സൂചനകൾ. ഇമെയിലുകൾ അയക്കാനും സന്ദേശങ്ങൾക്കും കോളുകൾക്കും മറുപടി നൽകാനും ഈ കൊച്ചു ഗാഡ്ജെറ്റ് മതിയാകും. മറ്റ് സ്മാർട്ട് ഉപകരണങ്ങളുമായി എളുപ്പത്തിൽ ബന്ധിപ്പിക്കാൻ കഴിയുന്ന ഈ ഉപകരണം, അക്ഷരാർത്ഥത്തിൽ നിങ്ങളെ നിഴൽ പോലെ സഹായിക്കുന്ന ഒരു ‘പേഴ്സണൽ അസിസ്റ്റന്റായി’ മാറുമെന്ന് കമ്പനി അവകാശപ്പെടുന്നു.
The post പേനയുടെ രൂപത്തിൽ ഒരു സൂപ്പർ കമ്പ്യൂട്ടർ; ഓപ്പൺഎഐയുടെ ആദ്യ ഗാഡ്ജെറ്റ് ‘ഗംഡ്രോപ്പ്’ വരുന്നു! appeared first on Express Kerala.
