മലയാള സിനിമാ വ്യവസായത്തിന് ഓണക്കാലം എന്നത് തമിഴ് സിനിമയിലെ പൊങ്കൽ പോലെ അതിനിർണ്ണായകമായ ഒരു സീസണാണ്. അതുകൊണ്ട് തന്നെ ഒരു ‘ഓണം റിലീസ്’ സ്വന്തമാക്കുക എന്നത് നിർമ്മാതാക്കളെ സംബന്ധിച്ച് വലിയൊരു അഭിമാനപ്രശ്നമാണ്. സിനിമാ പ്രേമികൾക്ക് വ്യത്യസ്ത രുചികളുള്ള വിഭവങ്ങൾ ചേർത്ത ഒരു ‘സിനിമാ സദ്യ’ തന്നെ ലഭിച്ച മുൻ വർഷങ്ങളുണ്ട്. എന്നാൽ എല്ലാ തവണയും ഇത്തരത്തിൽ വിപുലമായ ഓപ്ഷനുകൾ പ്രേക്ഷകർക്ക് ലഭിക്കാറില്ല. എങ്കിലും, നിലവിലെ വിവരങ്ങൾ പ്രകാരം ഇത്തവണത്തെ ഓണം ബിഗ് സ്ക്രീനിൽ വലിയ താരപ്പകിട്ടോടെയും ആവേശത്തോടെയുമാകും അരങ്ങേറുക.
ഈ വർഷം ഓണത്തിന് (2026 ഓഗസ്റ്റ് അവസാനത്തോടെ) വമ്പൻ ചിത്രങ്ങളാണ് ബോക്സ് ഓഫീസിൽ ഏറ്റുമുട്ടാൻ ഒരുങ്ങുന്നത്. ബേസിൽ ജോസഫ്, ടൊവിനോ തോമസ്, വിനീത് ശ്രീനിവാസൻ എന്നിവർ ഒന്നിക്കുന്ന ‘അതിരടി’, ദുൽഖർ സൽമാന്റെ മാസ്സ് എന്റർടൈനർ ‘ഐ ആം ഗെയിം’, പൃഥ്വിരാജ്-വൈശാഖ് ടീമിന്റെ ‘ഖലീഫ’ എന്നിവയാണ് വരാനിരിക്കുന്ന ഓണക്കാലത്തെ ആവേശമാക്കാൻ തയ്യാറെടുക്കുന്നത്.
Also Read: ജോർജുകുട്ടിയും കുടുംബവും ഏപ്രിലിലെത്തും; ‘ദൃശ്യം 3’ റിലീസ് പ്രഖ്യാപിച്ച് ജീത്തു ജോസഫ്
നവാഗതനായ അരുൺ അനിരുദ്ധൻ സംവിധാനം ചെയ്യുന്ന ‘അതിരടി’ ഓണം റിലീസാണെന്ന് ഇതിനകം ഔദ്യോഗികമായി പ്രഖ്യാപിച്ചു കഴിഞ്ഞു. ‘ആർ.ഡി.എക്സി’ന് ശേഷം നഹാസ് ഹിദായത്ത് സംവിധാനം ചെയ്യുന്ന ദുൽഖർ ചിത്രം ‘ഐ ആം ഗെയിം’ ഓണം ലക്ഷ്യമിട്ടുള്ള തിയേറ്റർ ചാർട്ടിംഗ് ആരംഭിച്ചിട്ടുണ്ട്. ഇതിന് പുറമെ, വൈശാഖ് സംവിധാനം ചെയ്യുന്ന ‘ഖലീഫ’യും ഓണക്കാലത്ത് തന്നെ റിലീസ് ചെയ്യാൻ പദ്ധതിയുള്ള വിവരം നിർമ്മാതാക്കൾ തിയേറ്റർ ഉടമകളെ അറിയിച്ചിട്ടുണ്ട്. വമ്പൻ റിലീസുകളുടെ ഈ വരവ് ഇത്തവണത്തെ ഓണക്കാലം തിയേറ്ററുകളിൽ വലിയ ആഘോഷമാക്കി മാറ്റുമെന്ന് ഉറപ്പാണ്.
The post ഇത്തവണ ഓണം സ്റ്റാറുകൾക്കൊപ്പം; ബേസിൽ, ടൊവിനോ, ദുൽഖർ, പൃഥ്വി ചിത്രങ്ങൾ ഏറ്റുമുട്ടാൻ ഒരുങ്ങുന്നു appeared first on Express Kerala.
