മക്ക: പുണ്യനഗരത്തിലെ മസാജ് പാർലറിന്റെ മറവിൽ അനാശാസ്യ പ്രവർത്തനങ്ങളിൽ ഏർപ്പെട്ട അഞ്ച് പ്രവാസികളെ മക്ക പൊലീസ് അറസ്റ്റ് ചെയ്തു. രഹസ്യ വിവരത്തിന്റെ അടിസ്ഥാനത്തിൽ നടത്തിയ മിന്നൽ പരിശോധനയിലാണ് പ്രതികൾ വലയിലായത്.
നഗരത്തിലെ ഒരു മസാജ് സെന്റർ കേന്ദ്രീകരിച്ച് സദാചാര വിരുദ്ധമായ കാര്യങ്ങൾ നടക്കുന്നുണ്ടെന്ന് പൊലീസിന് രഹസ്യവിവരം ലഭിച്ചിരുന്നു. തുടർന്ന് മക്ക പൊലീസ് നടത്തിയ പരിശോധനയിൽ സ്ഥാപനത്തിനുള്ളിൽ അനാശാസ്യ പ്രവർത്തനങ്ങൾ നടക്കുന്നുണ്ടെന്ന് സ്ഥിരീകരിക്കുകയായിരുന്നു. കമ്മ്യൂണിറ്റി സെക്യൂരിറ്റി ആൻഡ് കോംബാറ്റിങ് ഹ്യൂമൻ ട്രാഫിക് വിഭാഗവുമായി സഹകരിച്ചാണ് പോലീസ് ഈ റെയ്ഡ് നടത്തിയത്.
Also Read: തൊഴിലാളികൾക്ക് സന്തോഷവാർത്ത; ഒമാനിൽ മിനിമം വേതന നയം പുനഃപരിശോധിക്കുന്നു
അറസ്റ്റിലായവരുടെ വിവരങ്ങൾ അധികൃതർ പുറത്തുവിട്ടിട്ടില്ല. ആവശ്യമായ നിയമനടപടികൾ പൂർത്തിയാക്കിയ ശേഷം പ്രതികളെ പബ്ലിക് പ്രോസിക്യൂഷന് കൈമാറി. മസാജ് പാർലർ പ്രവർത്തിച്ചിരുന്നത് മുനിസിപ്പൽ ചട്ടങ്ങൾ ലംഘിച്ചാണെന്നും പരിശോധനയിൽ കണ്ടെത്തിയിട്ടുണ്ട്. ഈ ലംഘനങ്ങൾക്കും ഉടമകൾക്കെതിരെ കർശന ശിക്ഷാനടപടികൾ സ്വീകരിച്ചിട്ടുണ്ട്.
സൗദിയിലെ പൊതുമര്യാദകൾ ലംഘിക്കുന്നവർക്കെതിരെയും നിയമവിരുദ്ധ പ്രവർത്തനങ്ങൾ നടത്തുന്നവർക്കെതിരെയും കർശന നടപടികൾ തുടരുമെന്ന് അധികൃതർ മുന്നറിയിപ്പ് നൽകി. ഇത്തരം സംഭവങ്ങൾ ശ്രദ്ധയിൽപെട്ടാൽ ഉടൻ തന്നെ ബന്ധപ്പെട്ട സുരക്ഷാ ഏജൻസികളെ വിവരം അറിയിക്കണമെന്നും പോലീസ് അഭ്യർത്ഥിച്ചു.
The post മക്കയിൽ മസാജ് പാർലറിന്റെ മറവിൽ അനാശാസ്യം; അഞ്ച് പ്രവാസികൾ പിടിയിൽ appeared first on Express Kerala.
