സ്വകാര്യ മേഖലയിലെ ദശലക്ഷക്കണക്കിന് ജീവനക്കാർക്ക് ആശ്വാസവാർത്ത. നിലവിലെ മിനിമം പെൻഷൻ തുകയിൽ വൻ വർദ്ധനവ് വരുത്താൻ എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (EPFO) ഒരുങ്ങുന്നു. പ്രതിമാസ പെൻഷൻ തുക 1,000 രൂപയിൽ നിന്ന് 5,000 രൂപയായി ഉയർത്താനാണ് ആലോചന നടക്കുന്നത്. പണപ്പെരുപ്പവും വർദ്ധിച്ചുവരുന്ന ജീവിതച്ചെലവും കണക്കിലെടുത്താണ് ഇത്തരമൊരു നീക്കം.
വർഷങ്ങളായി മാറ്റമില്ലാതെ തുടരുന്ന പെൻഷൻ തുക വർദ്ധിപ്പിക്കണമെന്ന ജീവനക്കാരുടെ യൂണിയനുകളുടെയും പെൻഷൻ സംഘടനകളുടെയും ദീർഘകാലമായുള്ള ആവശ്യത്തിനാണ് ഇപ്പോൾ ജീവൻ വെച്ചിരിക്കുന്നത്. കേന്ദ്ര സർക്കാരിന്റെ അന്തിമ അനുമതി ലഭിക്കുന്നതോടെ ഇത് സംബന്ധിച്ച ഔദ്യോഗിക പ്രഖ്യാപനം ഉണ്ടാകും. വരാനിരിക്കുന്ന കേന്ദ്ര ബജറ്റിലോ പ്രധാന നയപരമായ ചർച്ചകളിലോ ഇത് സംബന്ധിച്ച പ്രഖ്യാപനം പ്രതീക്ഷിക്കാം.
Also Read: ആശ്വാസം! റെക്കോർഡ് ഉയരത്തിൽ നിന്ന് താഴേക്ക് പതിച്ച് സ്വർണം
എംപ്ലോയീസ് പെൻഷൻ സ്കീം പ്രകാരം 10 വർഷമെങ്കിലും സേവന കാലാവധിയുള്ളവർക്കാണ് ഇതിന്റെ ഗുണം ലഭിക്കുക. നിലവിൽ 58 വയസ്സിന് ശേഷം വിരമിച്ചവർക്ക് ലഭിക്കുന്ന കുറഞ്ഞ പെൻഷൻ തുക 1,000 രൂപയാണ്. ഇതിലാണ് അഞ്ചിരട്ടി വർദ്ധനവ് പ്രതീക്ഷിക്കുന്നത്.
അതേസമയം, ഇപിഎഫ് പദ്ധതിയിൽ ഉൾപ്പെടാനുള്ള വേതന പരിധി ഉയർത്തുന്നത് സംബന്ധിച്ച് നാല് മാസത്തിനുള്ളിൽ തീരുമാനമെടുക്കാൻ സുപ്രീംകോടതി കേന്ദ്ര സർക്കാരിന് നിർദ്ദേശം നൽകി. ഇത് നടപ്പിലായാൽ കൂടുതൽ ജീവനക്കാർക്ക് ഇപിഎഫ് ആനുകൂല്യങ്ങൾ ലഭിക്കാൻ വഴിയൊരുങ്ങും.
The post സ്വകാര്യ മേഖലയിലെ പെൻഷൻകാർക്ക് ബംപർ ലോട്ടറി! മിനിമം പെൻഷൻ 5,000 രൂപയാക്കാൻ ഇപിഎഫ്ഒ appeared first on Express Kerala.
