സൗദിയിൽ വേനലിന് വിട; ശരത്കാലത്തിന് നാളെ തുടക്കം, രാത്രികൾക്ക് ദൈർഘ്യം കൂടും | Saudi Arabia autumn

റിയാദ്: സൗദി അറേബ്യയിൽ വേനൽക്കാലത്തിന് ഔദ്യോഗികമായി വിടനൽകി നാളെ ശരത്കാലത്തിന് തുടക്കമാകും (Saudi Arabia autumn). സൗദി സമയം പുലർച്ചെ 3.05നാണ് പുതിയ സീസൺ ആരംഭിക്കുകയെന്ന് ജിദ്ദ ആസ്ട്രോണമിക്കൽ സൊസൈറ്റി അറിയിച്ചു.

ശരത്കാലത്തിന്റെ തുടക്കത്തോടനുബന്ധിച്ചുള്ള പ്രധാന ജ്യോതിശാസ്ത്ര പ്രതിഭാസമായ ഇക്വിനോക്സ് നാളെയാണ് സംഭവിക്കുന്നത്. ഈ സമയത്ത് രാവും പകലും ഏകദേശം തുല്യ ദൈർഘ്യമുള്ളതായിരിക്കും. തുടർന്ന് ദിവസങ്ങൾ പിന്നിടുന്നതോടെ രാത്രിയുടെ ദൈർഘ്യം ക്രമേണ വർധിക്കും.

ശരത്കാലം ആരംഭിക്കുന്നതോടെ ഉടൻതന്നെ സൗദിയിൽ ചൂടിന് ശമനമുണ്ടാകണമെന്നില്ല. എന്നാൽ വരും ആഴ്ചകളിൽ കാലാവസ്ഥയിൽ ക്രമേണ മാറ്റം പ്രകടമാകുകയും നവംബർ മാസത്തോടെ തണുപ്പ് അനുഭവപ്പെട്ടു തുടങ്ങുകയും ചെയ്യുമെന്നാണ് പ്രതീക്ഷിക്കുന്നത്.

സീസൺ മാറുന്നതിന്റെ ഭാഗമായി അറബ് രാജ്യങ്ങളുടെയും അറേബ്യൻ ഉപദ്വീപിന്റെയും വിവിധ ഭാഗങ്ങളിൽ ശക്തമായ കാറ്റിനും മഴയ്ക്കും സാധ്യതയുണ്ടെന്നും റിപ്പോർട്ടുകളുണ്ട്.

അതേസമയം, ശരത്കാലത്തോടൊപ്പം വടക്കൻ അർധഗോളത്തിലെ രാത്രികൾ കൂടുതൽ ദൈർഘ്യമേറിയതാകും. ഇതോടെ ആർട്ടിക് സർക്കിളിന് ചുറ്റുമുള്ള പ്രദേശങ്ങളിൽ ‘ഓറോറ ബോറിയാലിസ്’ അഥവാ വടക്കൻ ധ്രുവദീപ്തി കൂടുതൽ വ്യക്തമായും മനോഹരമായും കാണാൻ സാധിക്കും.

English Story Summary:
Saudi Arabia will officially enter the autumn season tomorrow at 3:05 a.m. Saudi time, marking the autumnal equinox when day and night are nearly equal in length. Temperatures are expected to gradually decline in the coming weeks, with cooler weather likely by November.