കഴിഞ്ഞ 20 വർഷത്തിനിടയിലെ ഏറ്റവും ശക്തമായ മൺസൂൺ മഴയിൽ മുങ്ങി ഒഡീഷ; തീവ്രന്യൂനമർദ്ദത്തെ തുടർന്ന് അതിതീവ്ര മഴയും പ്രകൃതിക്ഷോഭവും ശക്തമായതോടെ എട്ട് ജില്ലകളിലെ വിദ്യാലയങ്ങൾക്ക് അവധി പ്രഖ്യാപിച്ചു: റോഡ്-റെയിൽ ഗതാഗതം പൂർണ്ണമായും തടസ്സപ്പെട്ടു; അതിർത്തി ഹൈവേകളിൽ കൂറ്റൻ മരങ്ങളും പാറക്കെട്ടുകളും വീണ് ഗതാഗതം സ്തംഭിച്ചു
Current: മലയാളം
ഭുവനേശ്വര്‍: ഒഡീഷയില്‍ ശക്തമായ തീവ്രന്യൂനമര്‍ദ്ദത്തെ തുടര്‍ന്നുണ്ടായ കനത്ത മഴയിലും ഉരുള്‍പൊട്ടലിലും പ്രകൃതിക്ഷോഭത്തിലും വന്‍ നാശനഷ്ടം. കഴിഞ്ഞ 20 വര്‍ഷത്തിനിടയിലെ ഏറ്റവും ഉയര്‍ന്ന മണ്‍സൂണ്‍ മഴയാണ് ഇത്തവണ സംസ്ഥാനത്ത് രേഖപ്പെടുത്തിയത്.
തുടര്‍ച്ചയായി പെയ്യുന്ന അതിതീവ്ര മഴയെയും കാറ്റിനെയും തുടര്‍ന്ന് റോഡ്-റെയില്‍ ഗതാഗതം പൂര്‍ണ്ണമായും തടസ്സപ്പെടുകയും ഭൂരിഭാഗം ജില്ലകളിലും ഗ്രാമങ്ങളിലും ജനജീവിതം ദുസ്സഹമാവുകയും ചെയ്തു.
സ്ഥിതിഗതികള്‍ രൂക്ഷമായതോടെ മുന്‍കരുതല്‍ നടപടിയുടെ ഭാഗമായി കൊരാപ്പുട്ട്, രായഗഡ, മല്‍ക്കന്‍ഗിരി, നബരംഗ്പൂര്‍, ഗജപതി, ഗഞ്ചാം, കാളഹന്ദി, കേന്ദ്രപാറ തുടങ്ങി എട്ട് ജില്ലകളിലെയും കണ്ടമാല്‍ ജില്ലയിലെ നാല് ബ്ലോക്കുകളിലെയും സ്‌കൂളുകള്‍ക്കും അങ്കണവാടികള്‍ക്കും അധികൃതര്‍ അവധി പ്രഖ്യാപിച്ചു.
നബരംഗ്പൂര്‍ ജില്ലയിലെ തെന്തുലിഖുന്തിയില്‍ കഴിഞ്ഞ 24 മണിക്കൂറിനിടെ 395 മില്ലീമീറ്റര്‍ മഴയാണ് ലഭിച്ചത്.
ബംഗാള്‍ ഉള്‍ക്കടലില്‍ രൂപപ്പെട്ട തീവ്രന്യൂനമര്‍ദ്ദം വ്യാഴാഴ്ച പുലര്‍ച്ചെ ആന്ധ്രാപ്രദേശിലെ കലിംഗപട്ടണത്തിന് സമീപം മണിക്കൂറില്‍ 75 കിലോമീറ്റര്‍ വരെ വേഗതയുള്ള കാറ്റോടെ കരതൊട്ടതായി കാലാവസ്ഥാ നിരീക്ഷണ കേന്ദ്രം അറിയിച്ചു.
സംസ്ഥാനത്തെ 6 ജില്ലകളിലെ 37 ബ്ലോക്കുകളെയും 127 ഗ്രാമപഞ്ചായത്തുകളെയും പ്രകൃതിക്ഷോഭം നേരിട്ട് ബാധിച്ചതായി റവന്യൂ-ദുരന്തനിവാരണ മന്ത്രി സുരേഷ് പൂജാരി വ്യക്തമാക്കി.
രായഗഡ, ഗജപതി ജില്ലകളിലാണ് നാശനഷ്ടങ്ങള്‍ ഏറിയതും. രായഗഡ-വിസിയാനഗരം ഹൈവേയില്‍ മരം വീണ് മണിക്കൂറുകളോളം ആന്ധ്രാപ്രദേശുമായുള്ള ഗതാഗതം തടസ്സപ്പെടുകയും, കൊരാപ്പുട്ട്-രായഗഡ റെയില്‍വേ ലൈനില്‍ മണ്ണിടിച്ചില്‍ കാരണം ട്രെയിന്‍ സര്‍വീസുകള്‍ നിര്‍ത്തിവെക്കുകയും ചെയ്തു.
അതേസമയം, അപകടനില മുന്നില്‍ കണ്ട് ഗജപതി ജില്ലയില്‍ ഉരുള്‍പൊട്ടല്‍ ഭീഷണിയുള്ള പ്രദേശങ്ങളില്‍ നിന്ന് 5,000-ത്തോളം പേരെ സുരക്ഷിത കേന്ദ്രങ്ങളിലേക്കും സൈക്ലോണ്‍ ഷെല്‍ട്ടറുകളിലേക്കും മാറ്റിപ്പാര്‍പ്പിച്ചിട്ടുണ്ട്.
