കേന്ദ്ര തിരഞ്ഞെടുപ്പ് കമ്മീഷനിൽ യാതൊരുവിധ ആശയക്കുഴപ്പങ്ങളുമില്ലെന്ന് ബി.ജെ.പി എം.പി നരേഷ് ബൻസാൽ: ചീഫ് ഇലക്ഷൻ കമ്മീഷണറുടെ രാജി ആവശ്യപ്പെടുന്ന പ്രതിപക്ഷം അനാവശ്യ വിവാദങ്ങൾ സൃഷ്ടിക്കാൻ ശ്രമിക്കുകയാണെന്ന് കുറ്റപ്പെടുത്തൽ
Current: മലയാളം
ഡല്‍ഹി: കേന്ദ്ര തിരഞ്ഞെടുപ്പ് കമ്മീഷന്റെ പ്രവര്‍ത്തനങ്ങളില്‍ യാതൊരുവിധ ആശയക്കുഴപ്പങ്ങളുമില്ലെന്നും, ഭിന്നതയുണ്ടെന്ന രീതിയില്‍ അനാവശ്യ വിവാദങ്ങള്‍ സൃഷ്ടിച്ച് ഭ്രമാത്മക അന്തരീക്ഷം ഉണ്ടാക്കാനാണ് പ്രതിപക്ഷം ശ്രമിക്കുന്നതെന്നും ബി.ജെ.പി എം.പി നരേഷ് ബന്‍സാല്‍.
ചീഫ് ഇലക്ഷന്‍ കമ്മീഷണര്‍ ജ്ഞാനേഷ് കുമാറിന്റെ രാജിയാവശ്യപ്പെട്ട് കോണ്‍ഗ്രസ് ഉള്‍പ്പെടെയുള്ള പ്രതിപക്ഷ പാര്‍ട്ടികള്‍ രംഗത്തെത്തിയ പശ്ചാത്തലത്തിലാണ് ബി.ജെ.പിയുടെ പ്രതികരണം.
ഏതൊരു ഭരണഘടനാ സ്ഥാപനത്തിലും തീരുമാനം എടുക്കുന്നതിന് മുന്‍പ് അംഗങ്ങള്‍ക്കിടയില്‍ വ്യത്യസ്ത അഭിപ്രായങ്ങള്‍ സ്വാഭാവികമാണെന്നും എന്നാല്‍ അന്തിമ തീരുമാനങ്ങള്‍ എപ്പോഴും ഐക്യകണ്‌ഠേനയാണെന്നും അദ്ദേഹം വ്യക്തമാക്കി.
സുപ്രീം കോടതി വിധികളും ഇ.വി.എം ഫലങ്ങളും തങ്ങള്‍ക്ക് അനുകൂലമാകുമ്പോള്‍ മാത്രം സ്വീകരിക്കുകയും അല്ലാത്തപ്പോള്‍ പഴിചാരുകയും ചെയ്യുന്ന നിലപാടാണ് പ്രതിപക്ഷത്തിനെന്നും അദ്ദേഹം കുറ്റപ്പെടുത്തി.
വോട്ടര്‍ പട്ടികയുടെ പ്രത്യേക തീവ്ര പുനഃപരിശോധനയുമായി ബന്ധപ്പെട്ട് ഇലക്ഷന്‍ കമ്മീഷണര്‍മാരായ സുഖ്ബീര്‍ സിംഗ് സന്ധുവും വിവേക് ജോഷിയും വിയോജിപ്പ് അറിയിച്ചുവെന്ന മാധ്യമ റിപ്പോര്‍ട്ടുകളെ തുടര്‍ന്ന് ഉടലെടുത്ത രാഷ്ട്രീയ പോരിന്റെ പശ്ചാത്തലത്തിലാണ് പ്രതികരണം.
അതേസമയം, എസ്.ഐ.ആര്‍ പ്രവര്‍ത്തനങ്ങള്‍ ഉള്‍പ്പെടെയുള്ള കമ്മീഷന്റെ എല്ലാ തീരുമാനങ്ങളും എല്ലാ അംഗങ്ങളുടെയും പൂര്‍ണ്ണ സമ്മതത്തോടെയാണ് എടുത്തതെന്ന് കമ്മീഷന്‍ ഔദ്യോഗികമായി വ്യക്തമാക്കിയിട്ടുണ്ട്.
അനാവശ്യ ആരോപണങ്ങള്‍ ഉന്നയിച്ച് കമ്മീഷന്റെ വിശ്വസനീയത തകര്‍ക്കാന്‍ ശ്രമിക്കുന്ന പ്രതിപക്ഷ നിലപാടിനെ ജനങ്ങളും മറ്റ് ഭരണഘടനാ സ്ഥാപനങ്ങളും തള്ളിക്കളയുമെന്ന് ഉത്തര്‍പ്രദേശ് മന്ത്രി ദിനേശ് പ്രതാപ് സിംഗും വ്യക്തമാക്കി.
