കല്പറ്റ നാരായണന് പ്രിയദർശിനി ബഹ്‌റൈൻ ചാപ്റ്ററിന്റെ അഭിനന്ദനം

മനാമ: കേരള സാഹിത്യ അക്കാദമി ചെയർമാനായി തിരഞ്ഞെടുക്കപ്പെട്ട പ്രമുഖ എഴുത്തുകാരനും അധ്യാപകനുമായ കല്പറ്റ നാരായണൻ മാസ്റ്റർക്ക് കെ.പി.സി.സി.യുടെ പ്രസിദ്ധീകരണ വിഭാഗമായ പ്രിയദർശിനി പബ്ലിക്കേഷൻസ് ബഹ്‌റൈൻ ചാപ്റ്ററിന്റെ നേതൃത്വത്തിൽ അഭിനന്ദന യോഗം സംഘടിപ്പിച്ചു.

 ഒ.ഐ.സി.സി. സഗയ്യ ഓഫീസിൽ നടന്ന ചടങ്ങിൽ പ്രിയദർശിനി ബഹ്‌റൈൻ ചാപ്റ്റർ കോ-ഓർഡിനേറ്റർ സയ്യിദ് എം.എസ്. അധ്യക്ഷത വഹിച്ചു.

മലയാള ഭാഷയ്ക്കും സാഹിത്യത്തിനും അധ്യാപനത്തിനും നൽകിയ അതുല്യമായ സംഭാവനകൾ പരിഗണിക്കുമ്പോൾ, കല്പറ്റ നാരായണന്റെ നേതൃത്വം കേരള സാഹിത്യ അക്കാദമിക്ക് വലിയ മുതൽക്കൂട്ടാകുമെന്ന് യോഗം അഭിപ്രായപ്പെട്ടു.

അദ്ദേഹത്തിന്റെ നേതൃത്വത്തിൽ മലയാള സാഹിത്യത്തിനും ഭാഷയ്ക്കും പുതിയ ഉണർവും ദിശാബോധവും ലഭിക്കട്ടെയെന്ന് ചടങ്ങിൽ ആശംസിച്ചു. കൂടാതെ കേരളത്തിലെ മറ്റ് സാംസ്കാരിക സ്ഥാപനങ്ങളിലേക്ക് തിരഞ്ഞെടുക്കപ്പെട്ട സാരഥികളെയും യോഗം അഭിനന്ദിച്ചു.

അക്കാദമിക് കൗൺസിൽ അംഗം ജീസൺ ജോർജ് സ്വാഗതം ആശംസിച്ച യോഗത്തിൽ കൗൺസിൽ അംഗങ്ങളായ സൽമാൻ ഫാരിസ്, നൈസാം പി.എ., ജില്ലാ കൺവീനർമാരായ ബിബിൻ മാടത്തേത് (പത്തനംതിട്ട), മനോജ് ചണ്ണപേട്ട (കൊല്ലം), ആൻസൺ പി. ഐസക് (വയനാട്) എന്നിവർ ആശംസകൾ നേർന്നു. കൗൺസിൽ അംഗം പ്രദീപ് മേപ്പയൂർ നന്ദി രേഖപ്പെടുത്തി.