ഇന്ത്യൻ തൊഴിൽ വിപണിയിൽ വൈരുദ്ധ്യങ്ങൾ നിറഞ്ഞ ഒരു വർഷമാണ് 2026 എന്ന് ലിങ്ക്ഡ്ഇൻ പുറത്തുവിട്ട ഏറ്റവും പുതിയ റിപ്പോർട്ട് വ്യക്തമാക്കുന്നു. ഭൂരിഭാഗം പ്രൊഫഷണലുകളും ജോലി മാറാൻ ആഗ്രഹിക്കുന്നുണ്ടെങ്കിലും, ആർട്ടിഫിഷ്യൽ ഇന്റലിജൻസ് സൃഷ്ടിക്കുന്ന മാറ്റങ്ങളെ നേരിടാൻ തങ്ങൾ പ്രാപ്തരല്ലെന്ന ഭയത്തിലാണ് മിക്കവരും. പുതിയ എഐ റിക്രൂട്ട്മെന്റ് രീതികളും മാറുന്ന തൊഴിൽ നൈപുണ്യങ്ങളും ഉദ്യോഗാർത്ഥികളെ ആശങ്കയിലാഴ്ത്തുന്നതായി റിപ്പോർട്ട് പറയുന്നു.
ഇന്ത്യയിലെ 84 ശതമാനം പ്രൊഫഷണലുകളും പുതിയ തൊഴിൽ തേടാൻ ആത്മവിശ്വാസമില്ലാത്തവരാണെന്ന് ലിങ്ക്ഡ്ഇൻ റിപ്പോർട്ട് വ്യക്തമാക്കുന്നു. എഐ സാങ്കേതികവിദ്യയുടെ കടന്നുകയറ്റവും ജോലിക്ക് വേണ്ട പുതിയ കഴിവുകൾ നേടേണ്ടി വരുന്നതുമാണ് ഈ മാനസികാവസ്ഥയ്ക്ക് കാരണം. 2022ന് ശേഷം അപേക്ഷകരുടെ എണ്ണം വൻതോതിൽ വർധിച്ചത് മത്സരത്തിന്റെ തീവ്രത കൂട്ടി. ഉദ്യോഗാർത്ഥികൾക്ക് മാത്രമല്ല, കമ്പനികൾക്കും ഈ സാഹചര്യം വെല്ലുവിളിയാണ്. യോഗ്യരായ ജീവനക്കാരെ കണ്ടെത്താൻ കഴിയുന്നില്ലെന്ന് 74% തൊഴിൽദാതാക്കളും അഭിപ്രായപ്പെടുന്നു.
Also Read: സ്നാപ്ഡ്രാഗൺ 8 ജെൻ 3 ചിപ്സെറ്റും 6000mAh ബാറ്ററിയും; വൺപ്ലസ് 13R ഇപ്പോൾ വൻ ഓഫറിൽ!
എഐ ഇന്ന് ഇന്ത്യയിലെ കരിയർ വളർച്ചയുടെയും റിക്രൂട്ട്മെന്റിന്റെയും അവിഭാജ്യ ഘടകമായി മാറിയിരിക്കുന്നു. തൊഴിൽ വിപണിയിലെ മാറ്റങ്ങളും നിയമന രീതികളും മനസ്സിലാക്കുക എന്നതാണ് പ്രൊഫഷണലുകൾ നേരിടുന്ന പ്രധാന വെല്ലുവിളിയെന്ന് ലിങ്ക്ഡ്ഇൻ കരിയർ വിദഗ്ധ നീരജിത ബാനർജി പറയുന്നു. എന്നാൽ, എഐ ടൂളുകൾ നൈപുണ്യത്തോടെ ഉപയോഗിക്കുന്നതിലൂടെ ഈ വെല്ലുവിളിയെ അവസരമായി മാറ്റാം. ശരിയായ തൊഴിൽ മേഖലകൾ തിരഞ്ഞെടുക്കാനും പ്രൊഫഷണൽ തയ്യാറെടുപ്പുകൾ കാര്യക്ഷമമാക്കാനും എഐ അധിഷ്ഠിത സംവിധാനങ്ങൾ ഉദ്യോഗാർത്ഥികളെ സഹായിക്കും.
2026ൽ ഇന്ത്യയിൽ ഏറ്റവും കൂടുതൽ ആവശ്യക്കാരുള്ള തൊഴിൽ മേഖലകളെക്കുറിച്ചുള്ള ലിങ്ക്ഡ്ഇൻ റിപ്പോർട്ട് പുറത്തുവന്നു. സാങ്കേതിക പ്രതിഭകൾക്ക് വൻ സാധ്യതകൾ പ്രവചിക്കുന്ന ഈ പട്ടികയിൽ എഐ അധിഷ്ഠിത ജോലികളാണ് ആധിപത്യം പുലർത്തുന്നത്. പ്രോംപ്റ്റ് എഞ്ചിനീയർ ആണ് ഡിമാൻഡിന്റെ കാര്യത്തിൽ ഒന്നാമതുള്ളത്. തൊട്ടുപിന്നാലെ എഐ എഞ്ചിനീയർ, സോഫ്റ്റ്വെയർ എഞ്ചിനീയർ എന്നീ തസ്തികകൾ യഥാക്രമം രണ്ടും മൂന്നും സ്ഥാനങ്ങൾ കരസ്ഥമാക്കി. വരും വർഷങ്ങളിൽ തൊഴിൽ വിപണിയിൽ എഐ സാങ്കേതികവിദ്യ ചെലുത്തുന്ന സ്വാധീനമാണ് ഈ കണക്കുകൾ വ്യക്തമാക്കുന്നത്.
The post ജോലി മാറാൻ മോഹം, എഐയെ പേടി; ഇന്ത്യൻ പ്രൊഫഷണലുകൾക്കിടയിൽ ആശങ്കയെന്ന് ലിങ്ക്ഡ്ഇൻ റിപ്പോർട്ട് appeared first on Express Kerala.
